بيىل جەتىسۋلىق قىزىلشاشىلار ونىمدەرىن قايدا، قالاي وتكىزۋ، تابان ەت ماڭداي تەرلەرىنىڭ وتەۋىنە قول جەتكىزۋ تۋرالى باس قاتىرمايدى. بۇل تۋرالى "قامشى" پورتالى ايقىنعا سىلتەمە جاساي وتىرىپ حابارلايدى.
ەندى ءبىراز ۋاقىتتان سوڭ جيىن-تەرىمگە كىرىسەتىندەردىڭ بۇيىرعان ءونىمىن قابىلداۋعا دايىندىققا ەرتە كوكتەمنەن باستاپ كىرىسكەن كوكسۋ قانت زاۋىتىنداعىلار العاشقى 10-12 مىڭ توننا شيكىزاتتىڭ جەتكىزىلۋىن كۇتىپ، بىلەكتەرىن سىبانىپ وتىر.
كاسىپورىن ديرەكتورى التىنبەك اباتوۆتىڭ ايتۋىنشا، قازىرگى كەزدە مۇندا ەكى جۇزدەن استام ادام ەڭبەك ەتۋدە. قايتا وڭدەۋ ناۋقانى باستالعاندا، جەرگىلىكتى تۇرعىندار قاتارىنان تاعى 600 كىسى ەكى قولىنا ءبىر كۇرەك تابادى. سوڭعى جىلدارى ءبىرقاتار ماماندىقتار بويىنشا تاپشىلىق سەزىلگەن ەدى، كاسىپورىنداعى بايىرعى مامانداردىڭ كومەگىمەن جاستاردى وقىتىپ-ۇيرەتۋدەن وتكىزگەننەن كەيىن بۇل ماسەلە دە وڭ شەشىمىن تاۋىپتى. ەڭبەكاقى دا ۋاقىتىندا تولەنەدى، الەۋمەتتىك كەپىلدىكتەر دە زاڭ تالابىنا ساي ورىندالادى.
زاۋىتتا ءبىر اۋىسىمدا ەكى مىڭ توننا ءتاتتى ءتۇبىردى قايتا وڭدەۋدەن ءوتكىزۋدىڭ مۇمكىندىگى بار. جالپى، بيىلعى كۇزدە 100 مىڭ توننا قانت قىزىلشاسىن قايتا وڭدەۋدەن وتكىزىپ، 12 مىڭ توننا ساپالى قانت الۋ جوسپارلانىپتى. ءبىزدىڭ وڭىردە وسىرىلگەن قانت قىزىلشاسىنان، وسى جەردە ءوڭدەلىپ الىنعان دايىن ءونىمنىڭ ساپاسى اسا جوعارى، سۇرانىس تا كوپ. سوندىقتان كوكسۋلىق قانتتى وزىمىزدە عانا ەمەس، رەسەي مەن قىرعىزستاندا دا اسىعا كۇتىپ وتىرعان ءىرى تۇتىنۋشىلار قاتارى بارشىلىق.
ءبىرىنشى بولىپ سارقان اۋدانىنداعى شارۋالار ءتاتتى ءتۇبىر جيناۋعا كىرىسەدى. قازان ايى تۋىسىمەن، باسقا اۋدانداعىلار دا القاپقا شىعادى. اماندىق بولىپ، بارلىعى جوسپارداعىداي جۇزەگە اسسا، ديقاندار ءونىمدەءرىن وتكىزگەننەن كەيىن ءۇش كۇننەن سوڭ تاپسىرعان شيكىزاتىنىڭ اقشاسىن الا الادى. بۇل تۋرالى كوكتەمدە قىزىلشاشىلار مەن قايتا وڭدەۋشىلەرءدىڭ القالى باسقوسۋىندا وبلىس اكىمى اماندىق باتالوۆ پەن قانت زاۋىتىنىڭ ينۆەستورى نۇرلان تىلەۋبايەۆ ءوزارا كەلىسىمگە كەلگەن بولاتىن. بۇرىندارى ءۇش ايدا تيەسىلى اقشالارىن ارەڭ الاتىندار بيىلعى جاڭالىق ويداعىداي جۇزەگە اسسا، كەلەر جىلدان باستاپ قانت قىزىلشاسىن وسىرەتىن القاپتار اۋقىمىن ارتتىرادى دەگەن ءۇمىت تە ۇلكەن. باستىسى – الداعى كۇزگى ءناتيجە. زاۋىت باسشىلىعى دا تابىسسىز قالمايمىز دەپ وتىر. ولار ءۇسءتىمىزدەگى جىلدىڭ كىرىسىنىڭ باسىم ءبوءلىگىن كاسىپورىندا ودان ارى جەتىلدىرۋگە، جاڭعىرتۋعا سالماق.
