كەزدەسۋگە شەت ەلدەردىڭ كورنەكتى مەملەكەت قايراتكەرلەرى مەن نوبەل سىيلىعىنىڭ لاۋرەاتتارى – ءيزرايلدىڭ بۇرىنعى پرەزيدەنتى ش.پەرەس، پولشانىڭ بۇرىنعى پرەزيدەنتى ل.ۆالەنسا، كولۋمبيانىڭ بۇرىنعى پرەزيدەنتى س.ترۋحيلو، يسپانيانىڭ بۇرىنعى پرەمەر-مينيسترى  ح.ساپاتەرو، ماگاتە-نىڭ بۇرىنعى باس ديرەكتورى  م.ال-بارادەي جانە باسقالار قاتىستى.  بۇل تۋرالى "قامشى" پورتالى اقوردا.كزكە سىلتەمە جاساي وتىرىپ حابارلايدى.

كەزدەسۋگە قاتىسۋشىلار الەمدىك ساياساتتاعى، ەكونوميكا مەن حالىقارالىق قاۋىپسىزدىك سالاسىنداعى احۋالدى تالقىلادى. وسى ورايدا ەلىمىزدىڭ سىرتقى ساياساتقا قاتىستى باستامالارى مەن حالىقارالىق قوعامداستىقتىڭ الەمدەگى ءتۇرلى قاقتىعىستاردى شەشۋ ءۇشىن كۇش جۇمىلدىرۋى بارىسىنداعى ءرولى جونىندە ماسەلە قوزعالدى.

سونىمەن قاتار كەزدەسۋدە قازاقستاننىڭ قالىپتاسقان ەكونوميكالىق جاعدايدا ورنىقتى دامۋدى قامتاماسىز ەتۋ ءۇشىن قابىلداپ جاتقان شارالارىنا ايرىقشا نازار اۋدارىلدى.

قازاقستان پرەزيدەنتى ەلىمىزدىڭ تاۋەلسىزدىك جىلدارى جەتكەن جەتىستىكتەرى تۋرالى ايتتى.

جولىمىزدى باستاعان تۇستا ءبىز كۇن كورۋ ءۇشىن كۇرەستىك، ويتكەنى قازاقستاننىڭ بولاشاعى مەن مۇمكىندىكتەرىنە قاتىستى بولجامدار جاعىمسىز بولاتىن. مۇنداي پەرسپەكتيۆا بىزگە ۇنامادى، سوندىقتان باتىل ارەكەت جاساۋعا كىرىستىك. ەلەۋلى قيىندىقتىڭ ءبىرى سوسياليستىك ەكونوميكانى نارىق جولىنا ءتۇسىرۋ ەدى. ءۇش جىلدا جەكەشەلەندىرۋ جۇرگىزىلدى، ورتالىق ازيا بويىنشا ەڭ اۋقىمدى ينۆەستيسيا تارتىلدى. قازاقستان بۇگىندە باسەكەگە قابىلەتتى 50 ەلدىڭ قاتارىنا، سونداي-اق وتە مول كولەمدە ينۆەستيسيا تارتىلعان مەملەكەتتەردىڭ جيىرمالىعىنا كىرەدى، – دەدى مەملەكەت باسشىسى.

نۇرسۇلتان نازاربايەۆ الەمدىك شيكىزات نارىعىنداعى باعانىڭ تۇراقسىزدىعىنا بايلانىستى قازاقستاندا يندۋستريالاندىرۋ ساياساتى جۇزەگە اسىرىلىپ جاتقانىنا، سونىڭ ارقاسىندا سوڭعى جىلدارى جۇزدەگەن جاڭا كاسىپورىن سالىنعانىنا نازار اۋداردى. مەملەكەت باسشىسى قازىرگى ۋاقىتتا ەلدە يندۋستريالىق-يننوۆاسيالىق باعدارلامانىڭ ەكىنشى بەسجىلدىعى ىسكە اسىرىلىپ جاتقانىن، ونىڭ باستى ماقساتتارىنىڭ ءبىرى ەكونوميكانىڭ شيكىزات رەسۋرستارىنا تاۋەلدىلىگىن جوسپارلى تۇردە ازايتۋ ەكەنىن ايتتى.

قازاقستان پرەزيدەنتى ەلىمىز كولىك-لوگيستيكا الەۋەتى مەن ينفراقۇرىلىم قۇرىلىسىن دامىتۋعا باعدار ۇستاعانىنا توقتالدى. بۇل ورايداعى جۇمسالعان كۇش-جىگەر باعىتتاردى ءارتاراپتاندىرىپ، وزگە ەلدەرمەن تاۋار اينالىمى كولەمىن ەداۋىر ۇلعايتۋعا مۇمكىندىك بەردى.

مەملەكەت باسشىسى سونداي-اق ۇلتتىق قور سياقتى «قاۋىپسىزدىك قۇرالى» قازاقستانعا بەلگىلەنگەن جوسپارلارىن جۇزەگە اسىرىپ، الەۋمەتتىك مىندەتتەمەلەرىن ورىنداۋدى جالعاستىرۋعا مۇمكىندىك بەرەتىنىن ايتتى.

نۇرسۇلتان نازاربايەۆ ەلدە بەيبىتشىلىك پەن تۇراقتىلىقتى ساقتاۋدىڭ ماڭىزدىلىعىنا، سونىڭ ارقاسىندا بۇگىندە قازاقستاندىقتار بولاشاققا نىق سەنىممەن قارايتىنىنا نازار اۋداردى.