بۇگىن ورتالىق كوممۋنيكاسيالار قىزمەتىنىڭ الاڭىنداعى باسپا ءسوز ءماسليحاتىندا ينۆەستيسيالار جانە دامۋ ۆيسە-مينيسترى البەرت راۋ مەن يندۋستريا جانە تۋريزم دەپارتامەنتىنىڭ ديرەكتورى تيمۋر دۇيسەنعالييەۆ فورس-ماجورلىق جاعدايدا تۋريستەرگە وتەماقى تولەۋ ماسەلەسى ەكى ءتۇرلى تەتىكپەن شەشۋ جايى قاراستىرىلىپ جاتقاندىعىن مالىمدەدى. بۇل تۋرالى "قامشى" پورتالى Baq.kz –كە سىلتەمە جاساي وتىرىپ حابارلايدى.

- ونىڭ العاشقىسى – تۋريستىك ساياحاتتى ۇيىمداستىراتىن وپەراتورلىق كومپانيانىڭ چارتەرلىك رەيستى ۇستاۋى ءۇشىن كەپىلزات رەتىندە بانككە الدىن الا بەلگىلى ءبىر مولشەردە قاراجاتتىڭ تۇراقتى تۇردە ءۋزىلىسسىز جاتۋىن قامتاماسىز ەتۋ بولىپ تابىلادى. ماسەلەن، تۋروپەراتوردىڭ بانكتىك ەسەپ-شوتىندا ءۇش-تورت بورتتىق رەيستىڭ تولەمىنە جەتكىلىكتى قارجى بولۋى كەرەك دەگەن سەكىلدى تالاپ قويىلادى. سەبەبى، ساياحات بارىسىندا قاندايدا ءبىر كەلەڭسىز جاعداي ورىن الار بولسا، شەت ەلدە قالىپ قويعان تۋريستەر جوعارىدا اتاپ وتىلگەن كەپىل قارجىمەن ەلگە جەتكىزىلۋى ءتيىس، - دەپ ءتۇسىندىردى ديرەكتور.

سونىمەن قاتار، بۇل ويدى ينۆەستيسيالار جانە دامۋ ۆيسە-مينيسترى البەرت راۋ دا قۇپتايتىندىعىن ءبىلدىردى.

- سول سياقتى ءبىز ءاربىر تۋريستەن 0،5 اەك كولەمىندە الىم الۋ ەسەبىنەن كەپىلدەندىرۋ قورىن قۇرۋدى كوزدەپ وتىرمىز. مۇنداي قاجەتتىلىك تۋريستەر قۇقىنىڭ قورعالۋىن قامتاماسىز ەتۋ ماقساتىنان تۋىنداپ وتىر. وزدەرىڭىز بىلەسىزدەر، ەلىمىزدە تۋريستەرگە قاتىستى پروبلەمالار ءجيى تۋىنداپ جاتادى. ءتىپتى، قوناق ءۇي ماسەلەسىنە قاتىستى پروبلەما شىققان جاعدايدا كەپىلدەندىرۋ قورى ارقىلى ماسەلە ءتۇيىنىن وڭاي تارقاتاتىن بولامىز، - دەدى البەرت پاۆلوۆيچ.