وسكەلەڭ ۇرپاققا ساپالى ءبىلىم، سانالى تالىم-تاربيە بەرۋ ءۇشىن ءبىرىنشى كەزەكتە بىلگىر مامان، بىلىكتى پەداگوگ دايىنداۋىمىز كەرەك. بۇل تۋرالى "قامشى" پورتالى Baq.kz -كە سىلتەمە جاساي وتىرىپ حابارلايدى.

جۇمىس بابىمەن شىمكەنتكە بارعان ق ر ءبىلىم جانە عىلىم ءمينيسترى ءوڭىر باسشىلارىمەن باسقوسۋ بارىسىندا وسى ورتاق مىندەتتى ءمىنسىز اتقارۋعا شاقىردى. ساپار بارىسىندا وڭتۇستىك قازاقستان پەداگوگيكالىق ينستيتۋتىنىڭ سۋ جاڭا جاتاقحاناسىن ارالاپ شىققان مينيستر زاماناۋي ۇلگىدە سالىنعان «ستۋدەنتتەر ءۇيىنىڭ» جاي-كۇيىنە ءتانتى بولدى. 500 ورىنعا لايىقتالعان جاتاقحانا قۇرىلىسىنا 1 ملرد 237 ملن تەڭگە جۇمسالعان. عيمارات ىشىندە كىتاپحانا، اسحانا، ارنايى مەديسينالىق كابينەتتەر، حيميالىق تازارتۋ بولىمشەسى دە بار. ءتىپتى، تالىمگەرلەر ءۇشىن شاشتاراز دا اشىلعان. قوناقۇيدەن كەم تۇسپەيتىن جاتىنجايعا تەك ۇزدىك ستۋدەنتتەر عانا جايعاسا الادى. ءبىلىم جانە عىلىم ءمينيسترى وقۋ وزاتتارىنىڭ العاشقى لەگىنە ءوز قولىمەن بولمە كىلتىن تابىس ەتتى. ايتا كەتەيىك، 3 مىڭداي جاس ءبىلىم الاتىن ىرگەلى وقۋ ورداسى بيىل 900-دەن استام شاكىرت قابىلدادى. ونىڭ 63 پايىزى مەملەكەتتىك ءبىلىم گرانتىنا يە بولدى. سالتاناتتى راسىمنەن سوڭ، وبلىس اكىمى بەيبىت اتامقۇلوۆپەن كەزدەسكەن اسلان ءسارىنجىپوۆ ماماندار دايارلاۋ ماسەلەسىنە ايرىقشا كوڭىل ءبولدى. بەيبىت باكىر ۇلى ۇسىنعان يدەيا مينيستر تاراپىنان قولداۋ تاپتى. وبلىس باسشىسىنىڭ ايتۋىنشا، جوعارى وقۋ ورنىن بىتىرگەن پەداگوگتاردى اۋىل-ايماقتارعا تارتۋ ءۇشىن ۇستازدارعا ارنايى الەۋمەتتىك كومەك تاعايىنداۋ قاجەت.

اسلان ءسارىنجىپوۆ، ق ر ءبىلىم جانە عىلىم ءمينيسترى:

- ەكونوميكالىق قيىندىقتارعا قاراماستان، مەملەكەت تاراپىنان قاراجات بولىنگەن. ستۋدەنتتەردىڭ الەۋمەتتىك جاعدايىن كوتەرۋ ءۇشىن وسى جاتاقحانا سالىندى. بيىل مەملەكەتىمىزدە بىرنەشە جاتاقحانا اشىلادى. مەملەكەت تاراپىنان ستۋدەنتتەرگە وتە ۇلكەن كومەك بەرىلەدى. جىل سايىن 150 گرانت بولەمىز. كەلەسى جىلى ستۋدەنتتەردىڭ ستيپەندياسى 25 پايىزعا وسەدى.