قازاقستاندا ەلباسىنىڭ باستاماسىمەن جۇزەگە اسقان «مادەني مۇرا» باعدارلاماسى اياسىندا 160 توم كىتاپ جالپى تارالىمى 350 مىڭ تارالىممەن شىعارىلدى. بۇگىن ورتالىق كوممۋنيكاسيالار قىزمەتىندە وتكەن بريفينگ بارىسىندا ق ر ۇلتتىق كىتاپحاناسىنىڭ ديرەكتورى الىبەك اسقاروۆ وسىلاي ءمالىم ەتتى. ەسكە سالا كەتەيىك، بريفينگ «ەلدىڭ تاريحى مەن مادەنيەتى - بولاشاعى تۇتاس ۇلت» تاقىرىبىندا وتكەن بولاتىن. بۇل تۋرالى "قامشى"پورتالى قازاقپاراتقا سىلتەمە جاساي وتىرىپ حابارلايدى. 

«مەملەكەت باسشىسى ايقىنداعان بەس ينستيتۋسيونالدىق رەفورمانىڭ نەگىزگى ءبىر باعىتى - بولاشاعى تۇتاس ۇلت قالىپتاستىرۋ. ال ەلدىڭ وتكەندى باعالاپ، ۇلت تاريحى مەن مادەنيەتىن تەرەڭ زەردەلەمەي تۇرىپ ەلدىڭ بولاشاعى تۋرالى اڭگىمە ايتۋ دا مۇمكىن ەمەس»، - دەدى الىبەك اسقاروۆ. ونىڭ ايتۋىنشا، تاريحتى زەرتتەۋ، ەڭ الدىمەن، كونە قولجازبالار مەن كىتاپتارعا جۇگىنىپ، كىتاپحانالارداعى قولجازبالارمەن تىنىمسىز ءارى مۇقيات جۇمىستى تالاپ ەتەدى.

«وسى باعىتتا الماتىداعى ۇلتتىق كىتاپحانا قازاق حاندىعىنىڭ 550 جىلدىعىن مەرەكەلەۋ مەن «ماڭگىلىك ەل» پاتريوتتىق جوباسى اياسىندا ءتۇرلى شارالار وتكىزىپ كەلەدى. ايتالىق، بيىلعى جىلدىڭ باسىنان بەرى ءبىز كىتاپحانادا ۇلكەن كورمە ۇيىمداستىرىپ جاتىرمىز، وندا كەلۋشىلەر ءۇش مىڭنان استام قولجازبالارمەن، سيرەك كەزدەسەتىن تاريحي قۇجاتتارمەن، كىتاپتارمەن تانىسا الادى»، - دەدى ءا. اسقاروۆ.