«نۇر وتان» حالىقتىق دەموكراتيالىق پارتياسى قازاقستان رەسپۋبليكاسىنىڭ پرەزيدەنتى ن.نازاربايەۆتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىندا اتالىپ وتىلگەن تاپسىرمالاردى ىسكە اسىرۋ جونىندەگى جۇمىستاردى بەلسەندى جالعاسىرۋدا. بۇل تۋرالى "قامشى" پورتالى قازاقپاراتقا سىلتەمە جاساي وتىرىپ حابارلايدى.
اتاپ ايتقاندا، بۇگىن پارتيانىڭ ايماقتىق فيليالدارىمەن رەسپۋبليكالىق سەلەكتورلىق كەڭەس ءوتىپ، كۇن تارتىبىندە ەلباسىنىڭ باعدارلامالىق ماقالاسىندا اتالىپ وتىلگەن تاپسىرمالاردى ىسكە اسىرۋ بارىسى قارالدى.
«ۇلت كوشباسشىسى، پارتيا ءتوراعاسى نۇرسۇلتان ءابىش ۇلى نازاربايەۆتىڭ سۇيەنىشى رەتىندە «نۇر وتان» ءۇشىن بۇل تاپسىرمانى جۇزەگە اسىرۋ جانە ونىڭ ورىندالۋىن بارلىق پارتيالىق ۇيىمدار كۇشتەرىمەن باقىلاۋ قازىرگى تاڭدا نەگىزگى باستى باسىمدىعى بولىپ تابىلادى. العاشقى جەدەل ۇيىمداستىرۋشىلىق شارالارى اياسىندا بارلىق 16 ايماقتا پارتيانىڭ ساياسي كەڭەستەرىنىڭ وتىرىستارى، سونىمەن قاتار بارلىق دەڭگەيدەگى ءماسليحاتتارداعى «نۇر وتان» حدپ فراكسيالارىنىڭ وتىرىستارى وتكىزىلدى. وندا باعدارلامالىق ماقالانىڭ ىسكە اسىرىلۋ فورمالارى مەن مەحانيزمدەرى جانە كەشەندى ىس-ارەكەت جوسپارى تالقىلاندى»، - دەلىنگەن باسپا ءسوز بايانىندا.
اقپاراتقا سۇيەنسەك، ەلباسى باستاماسىن تالقىلاۋ بارىسىندا الەۋمەتتىك جاڭعىرتۋ بويىنشا باعدارلامالاردى جۇزەگە اسىرۋعا حالىقتى تارتۋ جونىندەگى فورماتتاردى ازىرلەۋ جانە اقپاراتتىق-ناسيحات جۇمىستارىن ۇيىمداستىرۋ ماقساتىندا ەلىمىزدىڭ ايماقتارىندا باستاۋىش پارتيا ۇيىمدارىندا اشىق جيىندار وتكىزىلۋدە. اتاپ ايتاندا، بۇگىنگى كۇنگە دەيىن 3 000-عا جۋىق باستاۋىش پارتيا ۇيىمدارىندا 420 000 ادامدى قامتىعان ءىس-شارالار وتكىزىلدى.
سونىمەن قاتار، سەلەكتورلىق كەڭەستە پارتيا ورتالىق اپپاراتىنىڭ باسشىسى قۇمار اقساقالوۆ ايماقتىق فيليالداردىڭ ەسەبىنىڭ نەگىزىندە العاشقى جەدەل ۇيىمداستىرۋشىلىق شارالارىنىڭ قورىتىندىسىن شىعارىپ، پارتيالىق قۇرىلىمداردىڭ الدىنا ناقتى تاپسىرما قويدى. سونىڭ ىشىندە، ەڭ ءبىرىنشى كەزەكتە اقپاراتتىق جانە ءتۇسىندىرۋ جۇمىستارىنا كوپ كوڭىل ءبولىنىپ وتىر. ونىڭ ماقساتى ەلباسىنىڭ باعدارلاملىق ماقالاسىندا قويىلعان تاپسىرمالار تۋرالى حالىقتى بارىنشا اقپاراتتاندىرۋ بولىپ تابىلادى. سونىمەن بىرگە، ەلىمىزدىڭ الەۋمەتتىك جاڭعىرتىلۋىنا باعىتتالعان بەلسەندى جۇمىستارعا ءاربىر پارتيا مۇشەلەرىن تارتۋ ىسىنە نازار اۋدارىلىپ وتىر.
