ناعىز كاسىپ يەلەرىنىڭ قولداۋى
ەلباسى «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا: «جالپىعا ورتاق ەڭبەك قوعامى يدەياسى كوز جەتپەيتىن كوكجيەكتە ويلاپ تابىلماعان. بۇل — پراكتيكالىق، پراگماتيكالىق يدەيا. ول ماعان ءتىپتى ەتەنە جاقىن، ويتكەنى مەن قازاقستاندىقتار جاقسى بىلەتىندەي، ءوزىمنىڭ كاسىبي جولىمدى «اق ساۋساقتار» سەكىلدى كابينەتتە دە، پاركەتتە دە ەمەس، جۇمىسشى-مەتاللۋرگ رەتىندە باستادىم. ال بۇل، اتاپ ايتسام، ناعىز كاسىپ بولىپ تابىلادى!» — دەپ جازدى.
سەيسەنبى كۇنى اقتوبە فەرروقورىتپا زاۋىتىنىڭ اكت زالىنا ناعىز كاسىپ يەلەرى — جۇمىسشى-مەتاللۋرگتەر «نۇر وتان» حدپ اقتوبە فەرروقورىتپا زاۋىتى اكسيونەرلىك قوعامىنداعى باستاۋىش پارتيا ۇيىمىنىڭ جينالىسىنا جينالدى. جۇمىسشى-مەتاللۋرگتەردىڭ اڭگىمەسىنىڭ ارقاۋى ەلباسىنىڭ باعدارلامالىق ماقالاسىنا بايلانىستى ءوربىدى. العاشقى كەزەكتە ءسوز العان اقتوبە فەرروقورىتپا زاۋىتىنىڭ ديرەكتورى مۇرات مۇقاشيەۆ:
— ەلباسى ماقالاسىندا ايتىلعانداي، تۇرمىس-تىرشىلىكتىڭ جاقسارعانىن ءار قازاقستاندىق سەزىنەتىن بولۋى كەرەك. «نۇر وتان» حدپ قىزمەتىنىڭ نەگىزگى باعىتى بۇل. حالقىمىزدىڭ ءال-اۋقاتىنىڭ نىعايۋى ەلىمىزدىڭ ەكونوميكاسىمەن تىعىز بايلانىستى. ال ەكونوميكا — ءوندىرىس قالىپتى جۇمىس جاساعاندا عانا جوعارى بولادى. ەل ەكونوميكاسىن كوتەرۋدە وزىندىك ورنى بار ءوندىرىستىڭ ءبىرى — ءبىزدىڭ زاۋىت. ول تەك ەلىمىزدەگى ەمەس، كەشەگى كەڭەستىك كەڭىستىكتەگى ايتۋلى ءىرى ونەركاسىپ. قازىرگى كەزدە مۇندا قازاقستاننىڭ ۇدەمەلى يندۋستريالىق-يننوۆاسيالىق دامۋ باعدارلاماسىنا كىرەتىن جوبالار جۇزەگە اسىرىلۋدا. فەرروقورىتپا زاۋىتىنىڭ ءتورتىنشى سەحى سالىنۋدا. ءىس جۇزىندەگى بۇل جاڭا زاۋىتتىڭ ىرگەتاسىن قالاۋ راسىمىنە ەلباسى نۇرسۇلتان نازاربايەۆتىڭ ءوزى قاتىسقان بولاتىن. سوندىقتان دا زاۋىت جۇمىسشىلارى ۇلكەن جاۋاپكەرشىلىك ارقالاۋدا. بۇل تۋرالى "قامشى" پورتالى aktobegazeti.kz-كە سىلتەمە جاساي وتىرىپ حابارلايدى.
مەملەكەت باسشىسىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قادامىنا قاراي 20 قادام» اتتى ماقالاسى زاۋىت ۇجىمىنا جاڭا مىندەتتەر جۇكتەيدى. ءبىز وندىرىستە جۇمىس ىستەيتىن جۇمىسشىلاردىڭ الەۋمەتتىك جاعدايىن بۇرىنعىدان دا جاقسارتا ءتۇسۋدى كوزدەپ وتىرمىز، — دەپ تۇيىندەدى ويىن.
«نۇر وتان» حدپ وبلىستىق فيليالىنىڭ ءتوراعاسى بالعالي وردابايەۆ:
— ەلباسىنىڭ باعدارلامالىق ماقالاسىنان بارىمىزگە بەرىلگەن ۇلكەن تاپسىرمالاردى كورىپ وتىرمىز. ول ەڭ اۋەلى پارتيانىڭ باستاۋىش ۇيىمدارىنىڭ جۇمىستارىنا قاتىستى. وبلىستا ءتورت ءجۇزدىڭ ۇستىندە باستاۋىش ۇيىم بار، وندا 38 مىڭنان ارتىق پارتيا مۇشەلەرى جۇمىس ىستەيدى. ءبىزدىڭ بۇگىنگى تاڭداعى ماقساتىمىز — ەلباسىنىڭ ماقالاسىنداعى ەل الدىنا قويىلعان مىندەتتەردى، تاپسىرمالاردى حالىققا كەڭىنەن جەتكىزۋ. بۇل ماڭىزدى قۇجاتتا الەۋمەتتىك سالالارعا ەرەكشە نازار اۋدارىلعان. ونى جۇزەگە اسىرۋ — ءبىزدىڭ ءارقايسىمىزدىڭ ءوز قولىمىزدا.
ءبىزدىڭ پارتيامىزدىڭ باسشىسى ۇزاق مەرزىمگە بەلگىلەگەن مەملەكەتتىك باعدارلامالاردا تالاي زور مىندەتتەردىڭ العا قويىلعانىن بىلەمىز. ءقايسىبىر جوبالار مەن جوسپارلاردىڭ اۋقىمدىلىعى العاشقى ساتتە ويلاندىرعانى دا راس ەدى. ءبىراق سولاردىڭ كوپشىلىگى ءقازىر مەرزىمىنەن بۇرىن ورىندالدى. سوندىقتان دا مەملەكەت باسشىسى اتالعان باعدارلامالىق ماقالادا بۇگىنگى ۋاقىتتىڭ تالابىنا ساي، جاڭا تاپسىرمالار بەلگىلەگەنىن كورەمىز. ونى شەشۋ جاسامپاز حالقىمىزدىڭ قولىنان كەلەتىنى داۋسىز،— دەپ پارتيالىق ارىپتەستەرىمەن وي ءبولىستى.
«ەۋرازيا» مەديسينا ورتالىعىنىڭ باس ديرەكتورى ەلەنا پونومارەنكو دەنساۋلىق ساقتاۋ سالاسىنا قاتىستى الەۋمەتتىك ماسەلەلەردىڭ وڭ شەشىلىپ وتىرعانىن اڭگىمەلەسە، اكسيونەرلىك قوعامنىڭ كۇردەلى قۇرىلىس ءبولىمىنىڭ باستىعى مارات قالەنوۆ قۇرىلىس سالاسىنداعى قارقىندى جۇمىستاردى حابارلادى. زاۋىتتىڭ جاستار كەڭەسىنىڭ ءتوراعاسى شىڭعىس احمەتوۆ زاۋىتتىڭ جۇمىسشى جاستارىنىڭ ەلباسىنىڭ باعدارلامالىق ماقالاسىن قىزۋ قولداپ وتىرعانىن جەتكىزدى.
زاۋىتتا وتكەن باسقوسۋعا جۇمىسشى-مەتاللۋرگتەر، باستاۋىش ۇيىم مۇشەلەرىمەن بىرگە، قالالىق فيليالدىڭ ساياسي كەڭەسىنىڭ مۇشەلەرى، قالالىق ءماسليحات دەپۋتاتتارى، ەڭبەك ارداگەرلەرى، «جاس وتان» جاستار قاناتىنىڭ بەلسەندىلەرى جانە بۇقارالىق اقپارات قۇرالدارىنىڭ وكىلدەرى قاتىستى.
امانقوس ورىنعالي ۇلى.
جالپىعا ورتاق مىندەت
ەلباسىنىڭ جالپىعا ورتاق ەڭبەك قوعامىنا قاراي نۇسقاعان 20 تاپسىرماسىنداعى ءپىسۋى جەتىلگەن، وزەكتى ماسەلەنىڭ ءبىرى — مادەنيەت سالاسىنداعى جۇمىستى جاڭا ساپاعا كوتەرۋ. ءبىر سوزبەن ايتقاندا، بۇل — قولدا بار پوتەنسيالدى پايدالانىپ، جاڭاشا، جاناشىرلىقپەن جۇمىس جاساۋ دەگەن ۇعىم. سوڭعى 10 جىلدا عانا ەلدە كىتاپحانالار سانى — 579-عا، مۇراجايلار — 58-گە، مادەنيەت ۇيلەرىنىڭ سانى 1،5 مىڭعا ارتقان ەكەن. «سونىمەن بىرگە، — دەپ كورسەتتى پرەزيدەنت، — مادەنيەت مەكەمەلەرىنە بارۋ دەڭگەيى وسى سالانىڭ دامۋ ديناميكاسىنان كەيىن قالۋدا». ونىڭ ارتىندا سونشاما رۋحاني ورىنداردى، ءزاۋلىم عيماراتتاردى كىمدەر ءۇشىن سالىپ جاتىرمىز دەگەن ساۋال تۇر. بۇل ارادا ادامداردىڭ بويىنداعى ەنجارلىق — ءبىر ماسەلە. ەكىنشى ماسەلە — سول ەنجارلىق نەدەن تۋادى؟ «سۇلۋىنان — جىلۋى» دەگەن ءسوز بار. الگى ايتىپ وتىرعان مادەنيەت وشاقتارىنىڭ مارتەبەسىنە، كوز تارتار كوركىنە ساي، ادام تارتار جىلۋى مولىراق بولسا قولى بوستا كىم-كىم دە سونى اينالشىقتاپ جۇرەر-اق ەدى. ايتپەسە تىرلىكتىڭ نىشانى جوق، قالقيىپ تۇرعان عيماراتتاردا قانداي جىلۋ بولادى؟
ءبىزدىڭ كۇنى بۇگىنگە دەيىن كورىپ كەلگەنىمىز — اۋىلدا مادەنيەت ءۇيى نەمەسە كلۋب بار. ونىڭ كەيبىرەۋىنىڭ ىشىندە كىتاپحانا بولادى. ءبىر بولمەدە شاڭ باسقان ەكى-ۇش دومبىرا تۇرادى، ت.ب. بۇل — ەگەر سوعان كىرە الساڭ عانا كورەتىنىڭ. كىرە الماساڭ، سىرتىنان قاراپ كەتە بەرەسىڭ. نەمەسە قاسىڭداعى ەرتىپ بارعان باستىق: «ءاي، مىناۋ نەگە جابىق، كىم قايدا، شاقىر، اشسىن» دەپ بىرەۋدى جۇمساپ جاتادى. كىتاپحاناشى ءبىر ءتىزىمدى سۋىرىپ الادى دا: «مىنە، پالەنباي وقىرمان، بالەندەي كىتاپ بار» دەيدى. ءبىراق جۋىق ماڭدا كىرىپ-شىعىپ جاتقان وقىرمان كورمەيسىڭ. مادەنيەت ءۇيىنىڭ نەمەسە كلۋبتىڭ مەڭگەرۋشىسى مەشىن جىلى وتكەن ءبىر كونسەرتتى جىر عىپ ايتقاندا، كوز الدىڭا توپىرلاعان حالىق ەلەستەيدى دە قويادى. ال شىندىعىنا كەلگەندە، بۇل عيماراتتار مەرەكە كۇندەرى نەمەسە ءبىر ماسەلە جونىندە جينالىس وتكىزەتىن ورىن دارەجەسىندە عانا قالىپ ەدى.
ونەردىڭ ارقاسىندا ءبىرقاتار اۋدانداردا، ءتىپتى اۋىلداردا حالىق تەاترى، حالىق وركەسترى اتاعىن الىپ، مارقايىپ وتىرعان ۇجىمدار بار. بۇلار ايلاپ، جىلداپ توماعا تۇيىق، تەك اۋداندىق، وبلىستىق بايقاۋلار كەزىندە عانا «سىرنايلاتىپ-كەرنەيلەتىپ» شىعا كەلەدى. حالىق تەاترى اندا-ساندا حالىققا ءوزىن كورسەتىپ تۇرماسا، ونىڭ اتاعىن ارقالانىپ وتىرعاننان نە پايدا؟ پايداسى سول — كەزى كەلگەندە بىزدە وسىنداي بار، وسىنداي بار دەپ ەسەپ بەرەمىز، ابىروي الامىز.
مادەنيەت — كونسەرت قويۋ عانا دەگەن ونەردىڭ اينالاسىنان شىقپايتىن تۇسىنىك تە كەزدەسەدى. مادەنيەتتىڭ اۋقىمى ول عانا ەمەس. دەسەك تە اڭگىمەنى كلۋبتان باستاعان سوڭ، اۋىل تۇرعىندارىنىڭ بوس ۋاقىتىن رۋحاني جاعىنان قولداۋدى مەڭزەپ وتىرمىن. بۇل — ءبىر جاعىنان اۋىل تۇرعىندارىنىڭ رۋحاني سۇرانىسى، تىرلىكتىڭ ءبىر ءسانى، اۋىلدىڭ اجارى. ءبىرسىدىرعى كۇيبەڭ تىرلىكپەن تاڭدى اتىرىپ، كۇندى باتىرىپ ءومىر وتكىزەتىن زامان ەمەس قوي بۇل. ءبىراق سوعان كىم باس-كوز بولۋ كەرەك؟ ەڭ الدىمەن، جوعارىدا ايتقانداي، جاناشىرلىق كەرەك.
«بۇدان جامانىمىزدا دا تويعا باردىق» دەمەكشى، ءقازىر قارعاپ-سىلەپ جۇرگەن اناۋ ءبىر كەزدەردە اۋدان ورتالىقتارىندا، قالالاردا اۆتوكلۋب، قىزىل بۇرىش، قىزىل وتاۋ، دالا قوسى دەگەندەر بولاتىن ەدى. سولاردىڭ ءوزى-اق تالاي شارۋانى تىندىراتىن. اۆتوكلۋب كەلسە اۋىلعا ارتىستەر كەلدى، شاي-شەكەر، ۇن كەلدى. اۋىل ءبىر كوتەرىلىپ قالدى. ونىڭ قۇرامىنداعىلار ەشقانداي الماتى اسىپ كەلگەن انشى-كۇيشىلەر ەمەس، ءوزىمىزدىڭ-اق اينالايىندار. سولار-اق حالىقتىڭ كوڭىلىن كوتەرىپ، باتاسىن الىپ جاتاتىن. «قىزىل وتاۋ» دەگەندەر — مالشىلار جايلاۋى مەن قىستاۋىنداعى، تراكتور بريگاداسىنداعى شاعىن «فيلارمونيا»، ەكىنشى جاعىنان — ۇگىتشى، ناسيحاتشى، شاعىن كىتاپحانا. ءال-اۋقات جاعىن، سالىستىرماي-اق قويايىن، ەڭبەك ادامىنا كوڭىل ءبولۋ جاعىنان قۇپتارلىق جايلار بولاتىن. بۇرىن مەكەمەلەردە، ۇجىمداردا مادەني-بۇقارالىق جۇمىستار جونىندەگى نۇسقاۋشىلار (ينسترۋكتور پو كۋلتماسسوۆوي رابوتە) دەگەن جاۋاپتى ادامدار تاعايىندالىپ، سولار دا ءبىراز جۇمىستاردىڭ باسىن قايىراتىن. موينىنا مىندەت العان سوڭ قاراپ وتىرمايدى عوي.
تەلەديداردان اندا-ساندا ەلىمىزگە تانىمال انشىلەردى، كۇيشىلەردى كورەمىز. ولار ونەر ساپارىمەن موڭعوليا، جۇڭگو سياقتى ەلدەرگە بارىپ، قانداستارىمىزعا كونسەرت بەرەدى ەكەن. سونداعى ايتاتىندارى: «ويپىرماي، قانداستارىمىز ۇلتتىق ونەرگە، ان-كۇيگە ابدەن شولدەپ قالعان ەكەن، بىزدەردى ساحنادان تۇسىرمەيدى، العىستارىن ايتادى»، — دەيدى. سوندا ءبىر وي كەلەدى: «شامنىڭ جارىعى تۇبىنە تۇسپەيدى» دەگەندەي، شەتەل تۇگىل شالعاي اۋىلدارداعى ءوز اعايىندارىمىز دا سونداي ونەردى اڭساپ وتىرعان جوق پا. الگىندەي ءسوزدى وتكەندە اۋىل جاققا گاسترولدىك ساپارمەن بارىپ قايتقان ءوز جەرلەستەرىمىزدەن دە ەستىگەنبىز.
ءقازىر كوركەمونەر قاتتى دامىدى، ونەرلىلەر دە كوپ. ولاردىڭ دارەجەسى بۇرىنعى اۆتوكلۋبتارداعىدان الدەقايدا جوعارى. سوسىن كەلەدى دە ءبىز ورتالىقتاعى ساحنالارعا عانا لايىقپىز، اۋىل ساحناسى بىزگە تار، كورەرمەندەردىڭ دارەجەسى تومەن دەگەن پىكىرلەرىن كەيدە جاسىرمايدى دا. بولسا — جۇلدىز، بولماسا — سوعان جەتەر-جەتپەس.
بۇدان ءبىراز جىل بۇرىنعى ءبىر وقيعا ەسىمە ءتۇسىپ وتىر. بۇرىنعى يساتاي اۋدانىنىڭ ورتالىعى اقىراپتا 23 اقپان — كەڭەس قارۋلى كۇشتەرىنىڭ كۇنىنە بايلانىستى جيىن بولدى. مادەنيەت ءۇيى حالىققا لىق تولدى. باسىم بولىگى — زەينەتكەر قارتتار، اق جاۋلىقتى اجەلەر. بۇل جيىننىڭ ەشقانداي مادەني، رۋحاني سيپاتى جوق ەدى. اۋداننىڭ اسكەري كوميسسارى ورىس تىلىندە جارتى ساعاتتىق بايانداما جاسادى. قارۋلى كۇشتەر قالاي قۇرىلدى، ونىڭ قازىرگى قۋاتى… ت.ب. سونىمەن جينالىس اياقتالدى. جۇرت تاراپ جاتقاندا اۋداندىق پارتيا كوميتەتىندەگى ءبىر دوكەي: «ويپىرماي، مىنا كىسىلەردى ەشكىم شاقىرعان جوق، ۇيلەرىندە قاراپ جاتا المايدى ا» دەگەنى بار. بۇل ۇلكەندەر ەرىككەننەن كەلگەن جوق. تاياق تاستام جەرگە جەتە الاتىن قۋاتى بولسا، ارينە، جاتا المايدى. ال بۇل جولى كونسەرت بولا ما، باسقاداي قىزىقتى شارا وتە مە دەپ كەلگەن ادامدار عوي. جارتى ساعاتتىق جيىننىڭ سوڭىنا ەڭ بولماسا جارتى ساعاتتىق كونسەرت ۇيىمداستىرا الماعانىمىزعا ۇيالۋىمىز كەرەك ەدى.
اناۋ ءبىر جىلدارى گەنناديي شۋلگانىڭ توپ باسقارىپ، ەلدى مەكەندەردى انگە بولەگەنى بىزبەن قاتار ادامداردىڭ ەسىندە. ەرسايىن ەلۋبايەۆ، گيمالاي اتشىبايەۆ سياقتى ءبىرقاتار ازاماتتاردىڭ دا ونەرى كوپشىلىككە ورتاق ەدى.
جوعارىدا حالىق تەاترلارى ساحناعا كوپ شىقپايدى دەگەندى مەڭزەپ ەدىك. كەزىندە ىرعىزداعى حالىق تەاترىن قازىبەك قوزييەۆ دەگەن ازامات باسقارىپ، ىرعىز تۇگىل اقتوبەگە دەيىن كەلىپ، سپەكتاكلدەر قوياتىن ەدى. بايعانين اۋدانىنىڭ مادەنيەت سالاسىن مارقۇم سۇندەت سارىبايەۆ باسقارعان تۇستا اۋىل ساحنالارى سۋىمايتىن ەدى. ايسان تاجىبايەۆانىڭ شىرقاتا سالعان «اقبايان» ءانى اۋىلدان اسىپ، اقتوبەگە دەيىن جەتىپ جاتاتىن.
ارينە، ءقازىر اۋدانداردا، اۋىلداردا ەشقانداي مادەني شارالار ۇيىمداستىرىلمايدى دەۋگە بولماس. ىرعىزداعى «ايماقتى انمەن تەربەتىپ»، باسقا اۋداندارداعى كەيبىر شارالار بار. ءبىراق نەگىزگى جۇمىس ءتيىپ-قاشتىدان اسا المايتىنىن مويىنداۋ كەرەك. پرەزيدەنت «قازىرگى زامانعى ءتيىمدى بۇقارالىق مادەني ويىن-ساۋىق ءىس-شارالاردىڭ نەگىزى ولاردى ۇيىمداستىرۋعا ازاماتتاردىڭ ۇەۇ-لاردىڭ وزدەرىنىڭ تىكەلەي قاتىسۋلارى بولماق» دەپ اتاپ ايتتى. ءتىپتى، بۇل ماسەلەدە بىرۇلگىلىك ەرەجەلەر قابىلداۋ قاجەتتىگى دە ءسوز بولدى.
ءقازىر قاي جەردە دە جاعداي بار. تەك باستاماشىلىق، بەلسەندىلىك قاجەت ەكەنى ايقىن.
امانكەلدى سماعۇلوۆ.
دەنى ساۋدىڭ — جانى ساۋ
مەنىڭ ويىمشا، ەلباسى نۇرسۇلتان نازاربايەۆتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسى كوپشىلىك كوڭىلىنەن شىقتى. نۇرسۇلتان ءابىش ۇلى ءبىزءدىڭ قوعامدا ازاماتتاردى ەڭبەكپەن، جۇمىسپەن قامتۋ قازىرگى ەڭ باستى مىندەتتەردىڭ ءبىرى ەكەءنىن اتاپ كورسەتتى.
مەملەكەت باسشىسى ءاردايىم دەنساۋلىق ساقتاۋ سالاسىنا ءجىتى ءمان بەرەدى. «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا دا دەنساۋلىق ساقتاۋ سالاسىنا ەرەكشە توقتالعان. ءبىزدىڭ سالا قىزمەتكەرلەرىنە جۇكتەلگەن تاپسىرمالاردىڭ ءبىرى — سالاۋاتتى ءومىر سالتىن قالىپتاستىرۋ. ناقتىراق ايتساق، ەلباسى مىناداي مىندەت جۇكتەدى: «ءاربىر قازاقستاندىق سالاماتتى ءومىر سالتىنسىز، تاماقتى تارتا ىشپەيىنشە، قيمىل-قوزعالىسسىز جانە سپورتسىز ۇزاق ءومىر ءسۇرۋ مۇمكىن ەمەس ەكەنىن بىلۋگە ءتيىس. بۇل – ءومىردىڭ اششى شىندىعى. ەگەر ءبىز قازاقستانداعى ورتاشا ءومىر جاسى ەۋروپاداعىداي بولعانىن قالاساق، وندا ءوزىمىزدىڭ دەنساۋلىعىمىز تۋرالى ويلانۋعا ءتيىسپىز.
ءاربىر ەلدى مەكەندە، سونىڭ ىشىندە اۋىلدىق جەرلەردە، سونداي-اق ءاربىر مەكەمە مەن كاسىپورىندا بەلسەندى دەمالىستى، دەنە تاربيەسى مەن بۇقارالىق سپورتتى دامىتۋ ءۇشىن بىرتە-بىرتە جاعداي جاساۋ ءجون. ەلدىڭ وقۋ ورىندارىندا دەنە تاربيەسىنىڭ وقۋدان تىس ساباقتارى مەن سەكسيالارىن كەڭەيتۋ كەرەك».
وبلىستىق جەدەل جاردەم اۋرۋحاناسىنىڭ ۇجىمى دەنە تاربيەسىنە ەرەكشە كوڭىل بولەدى. ءبىزدىڭ ۇجىمنىڭ ناقتى 50 پايىزى سالاۋاتتى ءومىر سالتىن ۇستانىپ، دەنە تاربيەسىمەن بەلسەندى اينالىسادى. قىزمەتكەرلەردىڭ 70 پايىزى — سپورتتىق ءتۇرلى ويىنداردىڭ جانكۇيەرى. ءبىزدىڭ ۇجىم وبلىستىق دەنساۋلىق ساقتاۋ باسقارماسى سالاۋاتتى ءومىر سالتىن قالىپتاستىرۋ ماقساتىندا ۇيىمداستىرعان ءتۇرلى شارالارعا بەلسەنە قاتىسىپ، الدىڭعى ورىنداردى يەلەنىپ ءجۇر.
ال وزىمە توقتالاتىن بولسام، بالا كەزىمنەن بەرى سپورتپەن شۇعىلدانامىن. قىستا اپتاسىنا ەكى رەت — سەنبى، جەكسەنبى كۇندەرى مىندەتتى تۇردە قالا سىرتىنا بارىپ، شاڭعى تەبەمىن. سونىمەن قاتار قىستا سالقىن سۋعا شومىلامىن. سالقىن سۋمەن جۋىنۋدىڭ ادام اعزاسىنا پايداسى كوپ. مىسالى، ادامدى جاسارتادى جانە ۇزاق ءومىر سۇرۋگە كومەكتەسەدى. سونداي-اق، سالقىن سۋعا تۇسكەننەن كەيىن ادام راحاتتانادى. ياعني، قانعا «قۋانىش گورموندارى» (ەندورفيندەر) كوبىرەك بولىنەدى. كوڭىلدى كۇي جانە جوعارى تونۋس سۋعا ءتۇسىپ شىققاننان كەيىنگى بىرنەشە ساعاتتان سوڭ دا بويدا ساقتالىپ قالادى. شىنىعۋدىڭ بۇل ءتۇرىنىڭ تاعى ءبىر پايداسى — تۇماۋ اۋرۋىنىڭ ىقتيمالدىعى 5 ەسەگە تومەندەيدى. يممۋندىق جۇيەنى قالىپىنا كەلتىرىپ، يممۋنيتەتتى ارتتىراتىن دارىلەردىڭ ءوزى مۇنداي ناتيجە بەرمەيدى: قاۋىپتىلىكتى 1،3-3 ەسەگە عانا تومەندەتە الادى.
مەن فۋتبول دا وينايمىن. بوكسپەن دە شۇعىلدانامىن. زىلتەمىر كوتەرەمىن. جاتتىعۋ زالدارىنا بارىپ شىنىعامىن. ۇيىمدە دە بىرنەشە جاتتىعۋ قۇرال-جابدىقتارى بار.
قورىتا ايتقاندا، سپورتپەن شۇعىلدانۋدىڭ ادام دەنساۋلىعى ءۇشىن پايداسى زور.
حيكمەتوللا كارىموۆ،
وبلىستىق جەدەل جاردەم اۋرۋحاناسى
باس دارىگەردىڭ ورىنباسارى
