ازەربايجان رەسپۋبليكاسىنىڭ جۇڭگو حالىق رەسپۋبليكاسىنداعى توتەنشە جانە وكىلەتتى ەلشىسى لاتيف گانديلوۆ قازاقستان پرەزيدەنتى نۇرسۇلتان نازاربايەۆتى الەمگە ايگىلى تاريحي تۇلعالار اقش-تىڭ 26-ى پرەزيدەنتى تەودور رۋزۆەلتپەن، ۇلىبريتانيانىڭ پرەمەر-مينيسترى (1940-1945، 1951-1955 جىلدارى.) ۋينستون چەرچيللمەن، «قىتايلىق رەفورمالار ساۋلەتشىسى» دەن سياوپينمەن ءبىر دەڭگەيگە قويادى. بۇل تۋرالى "ۇامشى" پورتالى قازاقپاراتقا سىلتەمە جاساي وتىرىپ حابارلايدى.
«ءبىز بەلگىلى ءبىر جەتىستىكتەر (قازاقستان حالقى اسسامبلەياسى مەن تۇتاستاي قازاق حالقىنىڭ جەتىستىكتەرى-رەد.) تۋرالى ايتقاندا، ونىڭ ەكىنشى جاعىنا دا نازار اۋدارۋعا ءتيىسپىز، ياعني مۇندا قۇرمەتتى نۇرسۇلتان ءابىش ۇلى نازاربايەۆتىڭ ەڭبەگى ەرەن - ونىڭ ساياسي ەرىك-جىگەرى مەن دانالىعىنىڭ ارقاسىندا بەيبىتشىلىك پەن ءوزارا تۇسىنىستىككە نەگىزدەلگەن قۋاتتى مەملەكەت قۇرۋعا مۇمكىن بولدى. سوندىقتان دا، مەن بۇگىن شىن ىقىلاسىممەن نۇرسۇلتان ءابىشۇلىن الەمدىك ليدەرلەر بولىپ تابىلاتىن رۋزۆەلت، چەرچيلل جانە دەن سياوپينمەن قاتار اتار ەدىم»، - دەدى ازەربايجان ەلشىسى بەيجىڭدە «قازاقستان حالقى اسسامبلەياسىنىڭ جىلى: قوعامدىق كەلىسىم مەن ۇلتتىق بىرلىكتىڭ قازاقستاندىق ۇلگىسى» تاقىرىبىمەن وتكەن دوڭگەلەك ۇستەل جيىنىندا.
ەسكە سالا كەتسەك، ەلشى لاتيف گانديلوۆ ەكونوميكا عىلىمدارىنىڭ كانديداتى، ديپلوماتيالىق قىزمەتتەن بۇرىن (1995 جىلدارى) باكۋ قالاسىندا كەشەندى دامۋ پروبلەمالارى عىلىمي-زەرتتەۋ ورتالىعىنىڭ اعا عىلىمي قىزمەتكەرى بولدى، پوليتەحنيكالىق ينستيتۋتتا ءدارىس بەرىپ، ساياسي ەكونوميكا كافەدراسىنىڭ دوسەنتى بولعان. 2004-2010 جىلدار ارالىعىندا قازاقستانداعى ازەربايجان ەلشىلىگىن باسقاردى. 2010 جىلدىڭ مامىر ايىندا قازاقستاننىڭ «دوستىق» وردەنىمەن ماراپاتتالعان.
بەيجىڭدەگى دوڭگەلەك ۇستەلدى قازاقستاننىڭ جۇڭگو حالىق رەسپۋبليكاسىنداعى ەلشىلىگى ۇيىمداستىرىپ وتىر. شاراعا شىۇ باس حاتشىسى دميتريي مەزەنسيەۆ، قىتايداعى ەلشىلەر اندرەي دەنيسوۆ (رەسەي)، قانايىم باقتىعۇلوۆا (قىرعىزستان)، چينار رۋستاموۆا (تۇركىمەنستان)، لاتيف گانديلوۆ (ازەربايجان)، سونداي-اق، تاجىك، ۋكراين، بەلارۋس ديپلوماتتارى، جۇڭگو حالىقتىق قوعامىنىڭ شەت مەملەكەتتەرمەن دوستىق قوعامى قىزمەتكەرلەرى، قحر ۇلتتار ءىسى جونىندەگى مەملەكەتتىك كوميتەتىنىڭ وكىلدەرى، قىتايلىق عالىمدار قاتىستى.
ايتا كەتەرلىگى، قازاقستان حالقى اسسامبلەياسى ءتوراعاسىنىڭ ورىنباسارى - ق ر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى ەرالى توعجان باستاعان دەلەگاسيا قۇرامىندا پارلامەنت ءماجىلىسىنىڭ دەپۋتاتتارى زۋحرا ساياپوۆا مەن نادەجدا نەستەروۆا، «دۇنعان ەتنومادەني ورتالىعى قاۋىمداستىعى» قب باسقارما مۇشەسى شاكير حاحازوۆ، «قازاقستانداعى ۇيعىرلاردىڭ رەسپۋبليكالىق مادەني ورتالىعى» قب ءتوراعاسى شايماردان نۋرۋموۆ، قازاقستان حالقى اسسامبلەياسى الماتى وبلىستىق حاتشىلىعىنىڭ مەڭگەرۋشىسى عابيت تۇرسىنباي، ق ر پرەزيدەنتى اكىمشىلىگى قحا حاتشىلىعىنىڭ ينسپەكتورى ەدىل وسپان، سىرتقى ىستەر مينيسترلىگى سىرتقى ساياسي تالداۋ جانە بولجاۋلار دەپارتامەنتىنىڭ كەڭەسشىسى ايدا ەرمەكقالييەۆالار بولدى.
