[caption id="attachment_5773" align="aligncenter" width="240"]
سۋرەت tengrinews.kz سايتىنان[/caption]
الماتىداعى "پرايم پلازا" ويىن-ساۋىق كەشەنىندە بولعان تارتىپسىزدىكتەرگە قاتىستى قوزعالعان ەكى قىلمىستىق ءىس بويىنشا الماتىنىڭ اۋدانارالىق كامەلەتكە تولماعان دار ءىسى جونىندەگى مامانداندىرىلعان سوتى ەكى جاسوسپىرىمگە ۇكىم شىعاردى دەپ حابارلايدى today.kz.
سوت قىلمىستىق ىستەردە ايىپكەر دەپ تانىلعان 16 جاستاعى رۋسلان ك. مەن 18 جاستاعى امانجول ق. ەسىمدى ەكى جاس ازاماتتىڭ بوستاندىعىن ەكى جىل مەرزىمگە شەكتەۋ جازاسىن تاعايىنداعان. تارتىپسىزدىك جاسالعان كەزدە امانجولدىڭ جاسى 18-گە تولماعاندىقتان ونىڭ ۇستىنەن قوزعالعان قىلمىستىق ءىس كامەلەتكە تولماعاندار ءىسى جونىندەگى ارنايى سوتتا قارالعان.
ەكەۋى دە سوت كەزىندە ءوز ايىپتارىن مويىنداپ، جاساعان ىستەرىنە وكىنەتىندەرىن ايتقان. سوت شەشىمىنە سايكەس، ەندى ەكەۋىنە دە ساعات 23.00-دەن سوڭ ويىن-ساۋىق ورىندارىنا بارۋعا، تۇرعىلىقتى جەرىن وزگەرتۋگە نەمەسە قاداعالاۋ ورگانىنىڭ رۇقساتىنسىز باسقا جاققا كەتىپ قالۋعا تىيىم سالىنادى.
بۇعان دەيىن وسى ىسكە قاتىستى تاعى ءبىر جاسوسپىرىمگە ءدال وسىنداي جازا بەرىلگەن ەدى - دەپ حابارلادى azattyq.org
الماتىداعى "پرايم پلازا" ويىن-ساۋىق كەشەنىندە بيىل 31 تامىزدا ءانشى قايرات نۇرتاس قاتىسقان كونسەرتتىڭ سوڭى جاپپاي تارتىپسىزدىككە، جاستاردىڭ پوليسيامەن قاقتىعىسىنا ۇلاسقان ەدى. سول كۇنى پوليسيا بولىمشەسىنە 165 ادام جەتكىزىلىپ، ونىڭ ءبىرازى الدىن الا تەرگەۋدەن كەيىن بوساتىلعان. كەيىن الماتى قالالىق ىشكى ىستەر دەپارتامەنتى "تارتىپسىزدىكتەردى باستادى، كولىك تونادى" دەگەن كۇدىكپەن بىرنەشە ادامدى تۇتقىنداعانىن حابارلاعان.
وقيعاعا بايلانىستى قىلمىستىق كودەكستىڭ "بۇزاقىلىق" جانە "توناۋ" باپتارى بويىنشا قىلمىستىق ءىس قوزعالعان. سونىمەن بىرگە، كونسەرتتى ۇيىمداستىرۋشىلاردىڭ ۇستىنەن "مىندەتتەرىنە جاۋاپسىز قارادى" دەگەن باپ بويىنشا ءىس قوزعالعان ەدى.
پىكىر قالدىرۋ