قازاقستاندا مىندەتتى مەديسينالىق ساقتاندىرۋ جۇيەسىنىڭ ەنگىزىلۋى تۇرعىنداردىڭ ءوز دەنساۋلىقتارىنا دەگەن جاۋاپكەرشىلىگىن ارتتىرا تۇسەدى. بۇل تۋرالى قامشى پورتالى قازاقپاراتقى سىلتەمە جاساي وتىرىپ حابارلايدى.
بۇل تۋرالى بۇگىن «قازاقپارات» تىلشىسىنە بەرگەن سۇحباتىندا س. اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتىنىڭ رەكتورى، مەديسينا عىلىمدارىنىڭ دوكتورى ايقان اقانوۆ ءمالىم ەتتى.
«ساقتاندىرۋ مەديسيناسىنا ءوتۋ - بۇل ەلىمىز ءۇشىن ناعىز تاريحي ۋاقيعا بولادى دەپ سانايمىن. جاڭا جۇيەدە ءۇش قاتىسۋشى بولادى. ولار: مەملەكەت، ەمدەلۋشى جانە جۇمىس بەرۋشى. ال بۇگىنگى، وتاندىق دەنساۋلىق ساقتاۋدىڭ بيۋدجەتتىك مودەلىندە بارلىعىنا جاۋاپتى - مەملەكەت. ول تۇرعىنداردىڭ قاجەتتىلىگىنە دە جاۋاپ بەرەدى. سونداي-اق، جۇمىسشىلاردىڭ دەنساۋلىعىن قورعاۋ سالاسىندا جۇمىس بەرۋشىنىڭ ساياساتىن دا ايقىنداپ بەرەدى. مىنە، وسىدان بارىپ دەنساۋلىق ساقتاۋ سالاسىنا تۇرعىندار تاراپىنان ارقا سۇيەۋشىلىك-تۇتىنۋشىلىق، مەديسينالىق قىزمەتكەرلەر تاراپىنان قازىنالىق، ال جۇمىس بەرۋشى تاراپىنان نەمقۇرايلىق كوزقاراس قالىپتاسادى»، - دەدى ا. اقانوۆ.
ول سونىمەن قاتار، تاياۋدا 140 ەلدىڭ دەنساۋلىق ساقتاۋ سالاسىنا ساراپتاما جۇرگىزىلگەندىگىن ايتتى. ساراپتاما قورىتىندىسى بويىنشا دەنساۋلىق ءۇشىن ورتاق، ىنتىماقتى جاۋاپكەرشىلىك ەڭ ءتيىمدى جۇيە ەكەندىگىن كورسەتكەن. وسى ەلدەردىڭ 80 پايىزىندا ساقتاندىرۋ جانە تۇرعىندار تاراپىنان دەنساۋلىق ساقتاۋ قىزمەتتەرى ءۇشىن تەڭ تولەۋ قاعيداسى قولدانىلادى. رەكتور، جاڭا دەنساۋلىق ساقتاۋ مودەلىندە وسىنداي مىندەتتى مەديسينالىق ساقتاندىرۋ جۇيەسى جۇزەگە اسىرىلاتىندىعىن ايتتى.
«بۇگىنگى دەنساۋلىق ساقتاۋ مودەلىن پايدالانىپ جاتقان مەملەكەتتەردىڭ بارلىعى ۇتىلىپ جاتىر. تۇرعىندار ساپاسىز قىزمەتتەر الادى، دارىگەرلەر مەن مەدبيكەلەر جۇمىستىڭ ساپاسىن ارتتىرۋعا اسا ىنتالى ەمەس. ءسويتىپ بارلىعىنا كىنالى ۇكىمەت بولىپ شىعا كەلەدى. ارينە، ەلىمىزدىڭ الەۋەتى جوعارى. جاڭا ەمحانالار، كلينيكالار سالىنىپ جاتىر. بيۋدجەتتەن قوماقتى قارجى بولىنەدى. دەگەنمەن، مەديسينالىق كومەك كورسەتۋدى ۇيىمداستىرۋ جۇيەسىن وزگەرتۋ قاجەت-اق. تاعى دا قايتالاپ ايتام، جاڭا مودەلدە قاتىسۋشىلار ۇشەۋ بولادى. ولار: دەنساۋلىق ساقتاۋ جۇيەسى، ەمدەلۋشى جانە جۇمىس بەرۋشى. وسىلايشا دەنساۋلىق ساقتاۋ جۇيەسى جاڭا ساپاعا كوشەدى»، - دەدى ا. اقانوۆ.
ونىڭ پىكىرىنشە، جاڭا جۇيەدە دارىگەرلەر ساپالى مەديسينالىق كومەك كورسەتۋگە ىنتالى بولادى. جۇمىس بەرۋشىلەر ءوز بيزنەسىندە ادام كاپيتالىن ساقتاۋعا جانە نىعايتۋعا كۇش سالسا، ەمدەلۋشىلەر ءوز دەنساۋلىعىنا دەگەن جاۋاپكەرشىلىگىن ارتتىرا تۇسەدى.
