بۇگىن ۇكىمەت ۇيىندەگى وتىرىستان سوڭ، ورتالىق كوممۋنيكاسيالار قىزمەتىنىڭ الاڭىندا ب ا ق وكىلدەرىنە ارناپ بريفينگ وتكىزگەن پرەمەر-مينيستردىڭ ءبىرىنشى ورىنباسارى باقىتجان ساعىنتايەۆ ەلىمىزدىڭ شارۋالارىن قولداۋ ماقساتىندا ۇكىمەت 421 مىڭ توننا جانار-جاعارمايدى جەڭىلدەتىلگەن باعامەن ۇلەستىرگەندىگىن ايتتى. بۇل تۋرالى قامشى پورتالى Baq.kz –كە سىلتەمە جاساي وتىرىپ حابارلايدى.
- ەل ەكونوميكاسىنىڭ تۇراقتىلىعىن ساقتاۋدا جانە حالىقتىڭ ءال-اۋقاتىنىڭ جاقسارۋىنا وراسان زور سەپتىگىن تيگىزەتىندىكتەن ەل ۇكىمەتى قازىرگى تاڭدا وتاندىق شارۋالارعا مۇمكىندىگىنشە كومەك قولىن سوزىپ كەلەدى. ءتىپتى، وسى ماقساتتا بۇگىنگى كۇنگە دەيىن 60 ملرد تەڭگەگە جۋىق قارجىلاي قولداۋ كورسەتىپ، مەملەكەت تاراپىنان جەڭىلدەتىلگەن باعامەن 421 مىڭ توننا جانار-جاعارماي ونىمدەرىن ۇلەستىردى، - دەدى باقىتجان ءابدىر ۇلى.
سونىمەن قاتار، بريفينگ بارىسىندا ب ا ق وكىلدەرىنىڭ ساۋالدارىنا جاۋاپ بەرگەن ۇكىمەت مۇشەلەرى اعىمداعى جىلدا كۇزگى جيىن-تەرىم ۋاقىتىلى ءارى تابىستى اياقتالادى دەپ جوسپارلانىپ وتىرعاندىعىن تىلگە تيەك ەتتى.
- وزدەرىڭىز بىلەسىزدەر بيىل ەلىمىزدە كوكتەمگى مەزگىلدىڭ كەشەۋىلدەپ كەلۋىنە وراي، ەگىن ەگۋ ناۋقانى دا جىلداعى كەزەڭمەن سايكەس باستالا قويمادى. وسىعان وراي، ءبىزدىڭ جيىن-تەرىم ناۋقانىمىز دا ادەتتەگى مەرزىمدە اياقتالادى دەي المايمىز. الايدا، ەندىگى ءۇمىتىمىز اۋا-رايىنىڭ وڭ قاباق تانىتۋىنا بايلانىستى بولىپ تۇر. ياعني، كۇز ايلارىنداعى ءاربىر كۇنىمىز نەعۇرلىم جاۋىن-شاشىنسىز، جايماشۋاقتى بولعان سايىن قامبامىز استىققا تولا تۇسەتىنى ءسوزسىز، - دەدى ول ءوز سوزىندە.