بۇگىنگى پارلامەنت ءماجىلىسىنىڭ جالپى وتىرىسىندا دەپۋتاتتار 35 زاڭ جوباسىن قارايتىن بولادى. وتىرىس بارىسىندا اۋىل شارۋاشىلىعى ءمينيسترى اسىلجان مامىتبەكوۆ "ق ر كەيبىر زاڭنامالىق اكتىلەرىنە اۋىل شارۋاشىلىعى كووپەراسياسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ" تۋرالى زاڭ جوباسى جايىندا بايانداما جاساپ، دەپۋتاتتار ساۋالدارىنا جاۋاپ بەردى. بۇل تۋرالى قامشى پورتالى Baq.kz –كە سىلتەمە جاساي وتىرىپ حابارلايدى.

قۇجات اۋىل شارۋاشىلىعى كووپەراتيۆتەرىنىڭ بارلىق تۇرلەرىن (اۋىلدىق تۇتىنۋ كووپەراتيۆتەرى، سۋ پايدالانۋشىلاردىڭ اۋىلدىق تۇتىنۋ كووپەراتيۆتەرى، اۋىل شارۋاشىلىعى وندىرىستىك كووپەراتيۆتەرى، اۋىل شارۋاشىلىعى سەرىكتەستىكتەرى) وندىرىستىك كووپەراتيۆتىڭ ۇيىمداستىرۋ-قۇقىق نىسانىنداعى كوممەرسيالىق زاڭدى تۇلعالار رەتىندە ايقىنداۋ كوزدەلىپ وتىرعاندىعىن اتاپ وتكەن مينيستر، شارۋالاردىڭ مەملەكەت قولداۋىن كورۋى ءۇشىن ءالى دە بولسا بىرىگە ءتۇسۋ كەرەكتىگىن اتاپ ءوتتى.

- ەگەر ەلىمىزدىڭ شارۋالارى ءالى دە بىرىگە تۇسسە، مەملەكەت تاراپىنان ۇسىنىلاتىن سۋبسيدياعا قولجەتىمدىلىك ارتا تۇسەتىن بولادى. سونىمەن قاتار، بۇل زاڭ مەملەكەتتىك قولداۋ شارالارىن كۇشەيتۋ جانە فەرمەرلەردىڭ كووپەراسياسى پروسەسىن ىنتالاندىرۋ، سونداي-اق، بىرىگۋدىڭ وسىنداي نىسانىنىڭ تارتىمدىلىعىن ارتتىرۋ رەتىندە اۋىل شارۋاشىلىعى كووپەراتيۆتەرىنىڭ قىزمەتىن، قىزمەت تۇرلەرىنىڭ ايقىندالعان تىزبەسى بويىنشا ارناۋلى سالىق رەجيمى شەڭبەرىندە جۇزەگە اسىرۋدى ۇسىنادى، - دەدى اسىلجان سارىباي ۇلى.

زاڭ جوباسىن وتىرىسقا قاتىسقان 103 دەپۋتات ءبىراۋىزدان ماقۇلدادى.