قابىلدانىپ جاتقان «دەنساۋلىق-2020» باعدارلاماسى ەلىمىزدە مىندەتتى مەديسينالىق ساقتاندىرۋ جۇيەسىن ەنگىزۋگە باعىتتالعان. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

مەديسينالىق ساقتاندىرۋ - حالىقتىڭ ارنايى قورعا جينالعان قاراجات ەسەبىنەن تەگىن مەديسينالىق كومەك الۋىن قامتاماسىز ەتەتىن جۇيە. وعان سايكەس ساقتاندىرۋ جارنالارىن جۇمىس ىستەيتىن ازاماتتاردىڭ جۇمىس بەرۋشى مەكەمەلەرى تولەپ وتىرادى، ال جۇمىسسىزدار مەن ەڭبەككە جارامسىز ادامدار ءۇشىن جارنا مەملەكەتتەن اۋدارىلادى. سونداي-اق، ەڭبەككەر ازاماتتار ءوز جالاقىلارىنان ماقساتتى سالىمدار اۋدارىپ وتىرادى. بۇل جۇيە حالىقتىڭ بارلىق توپتارى ءۇشىن مەديسينالىق جانە دارى-دارمەكتىك كومەكتىڭ تەڭ كولەمى مەن ساپاسىن قامتاماسىز ەتەدى. ياعني، مەديسينالىق قىزمەت جاس پەن كارىگە، باي مەن كەدەيگە بىردەي كولەمدە، تەڭ دارەجەدە كورسەتىلەدى. 

مىنە، نەگىزگى ماقسات تا سول - ازاماتتار مەن جۇمىس بەرۋشىلەردىڭ دەنساۋلىققا دەگەن ورتاق جاۋاپكەرشىلىگىن ارتتىرۋ. قازىرگى ۋاقىتتا بۇل جاۋاپكەرشىلىك تەك مەملەكەتكە جۇكتەلگەن. ءاربىر ادام ءوز دەنساۋلىعىن كۇتىپ، سالاۋاتتى ءومىر سالتىن ۇستانۋى، ال جۇمىس بەرۋشى ءاربىر جەتەكشى ءوز قىزمەتكەرىنىڭ دەنساۋلىعىن ساقتاۋعا مۇددەلى بولۋى كەرەك. ويتكەنى، قىزمەتكەر - كەز كەلگەن كاسىپورىن ءۇشىن تابىس كوزى ەكەنى بەلگىلى. وسىنداي ورتاق جاۋاپكەرشىلىك تەتىكتەرى ساقتاندىرۋ مەديسيناسى كەزىندە بارىنشا ناقتى جۇمىس ىستەيتىن بولادى.

مىندەتتى مەديسينالىق ساقتاندىرۋ ءتۇرى بويىنشا ازاماتتاردىڭ قورعا اۋداراتىن جارناسىنىڭ مولشەرى مەملەكەت كولەمىندە بەكىتىلەدى. ول ءار ەلدە ءارقيلى مولشەردە بەلگىلەنگەن. ماسەلەن، فرانسيا تۇرعىندارى جالاقىسىنىڭ - 16،  يتالياندار - 13، نيدەرلاندىلىقتار - 9 جانە جاپوندار - 7 %-ىن تۇراقتى تۇردە اۋدارىپ وتىرادى. ال قازاقستاندا جۇمىس بەرۋشىلەر جارناسىنىڭ كولەمى كىرىستىڭ 5 %-ىن قۇرايتىن بولادى. ال قىزمەتكەرلەر جارناسىنىڭ مولشەرلەمەسى تابىستىڭ 2 %-ىن قۇراماق. بۇل ورايدا، ولار 2019 جىلدان - 1 پايىز، 2020 جىلدان باستاپ - 2 پايىز مولشەرىندە قارجى اۋدارا باستايتىنىن ايتا كەتۋ كەرەك. 

مامانداردىڭ ايتۋىنشا، مىندەتتى مەديسينالىق ساقتاندىرۋ جۇيەسى مەديسينا سالاسىنداعى قىزمەت كورسەتۋ مادەنيەتىن كوتەرەدى. سونداي-اق، دەنساۋلىق ساقتاۋ جۇيەسىندە قوردالانعان ماسەلەلەردى ءتيىمدى شەشىپ، كەمشىلىكتەردى جويادى.س. اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتىنىڭ رەكتورى، مەديسينا عىلىمدارىنىڭ دوكتورى ايقان اقانوۆ دارىگەر رەتىندە بۇل جۇيەنىڭ ءتيىمدى تۇستارى كوپ ەكەنىن ايتادى.

«جاڭا جۇيەدە ءۇش قاتىسۋشى بولادى. ولار: مەملەكەت، ەمدەلۋشى جانە جۇمىس بەرۋشى. بۇل جۇيە تۇرعىنداردىڭ قاجەتتىلىگىنە دە جاۋاپ بەرەدى. سونداي-اق، جۇمىسشىلاردىڭ دەنساۋلىعىن قورعاۋ سالاسىندا جۇمىس بەرۋشىنىڭ ساياساتىن دا ايقىنداپ بەرەدى. بۇگىنگى دەنساۋلىق ساقتاۋ مودەلىن پايدالانىپ جاتقان مەملەكەتتەردىڭ بارلىعى ۇتىلىپ جاتىر. تۇرعىندار ساپاسىز قىزمەتتەر الادى، دارىگەرلەر مەن مەدبيكەلەر جۇمىستىڭ ساپاسىن ارتتىرۋعا اسا ىنتالى ەمەس. سوندىقتان، مەديسينالىق كومەك كورسەتۋدى ۇيىمداستىرۋ جۇيەسىن وزگەرتۋ قاجەت-اق. سونىڭ ارقاسىندا دەنساۋلىق ساقتاۋ جۇيەسى جاڭا ساپاعا كوشەدى» دەيدى ا. اقانوۆ.

ال «ۇلتتىق عىلىمي-مەديسينالىق ورتالىق» اق ديرەكتورى اباي بايگەنجيننىڭ ايتۋىنشا، ول دەنساۋلىق ساقتاۋدى رەسۋرستىق قامتاماسىز ەتۋدى  ارتتىرۋعا، ەكونوميكالىق قىزىعۋشىلىقتى جانە مەديسينالىق ۇيىمدار مەن مەديسينالىق قىزمەتكەرلەردىڭ ءوز قىزمەتىنىڭ سوڭعى ناتيجەسىنە جاۋاپكەرشىلىكتى ارتتىرۋعا مۇمكىندىك بەرەدى. كاسىپكەرلەر جۇمىسكەرلەرىنىڭ دەنساۋلىعىن ساقتاۋعا مۇددەلى بولادى. «بارلىق دامىعان ەلدەردە قولدانىلىپ جۇرگەن مىندەتتى مەديسينالىق ساقتاندىرۋدى قولدايمىن، - دەيدى اباي قاباتاي ۇلى. - ءار ازامات ءوز دەنساۋلىعىنا ءوزى جاۋاپتى ەكەنىن ءتۇسىنىپ، ول ءۇشىن بەلگىلى ءبىر سالىمدار جاساپ تۇرۋى ءتيىس».

الەمدىك تاجىريبەدە مىندەتتى مەديسينالىق ساقتاندىرۋ جاقسى ناتيجە بەرگەنى بەلگىلى. ماسەلەن فرانسيادا حالىقتىڭ - 80، گەرمانيادا - 90، بەلگيادا - 98 %-ى مىندەتتى مەديسينالىق ساقتاندىرۋ جۇيەسىمەن قامتىلعان.