ەلىمىزدە ازاماتتاردىڭ كەيبىر ساناتتارىنا الەۋمەتتىك تولەمدەرگە قولجەتىمدىلىك ارتىپ، از قامتىلعان ازاماتتاردى الەۋمەتتىك قولداۋ كۇشەيەدى. بۇگىن پارلامەنت ءماجىلىسىنىڭ جالپى وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا وسىلاي مالىمدەدى. ەسكە سالا كەتەيىك، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتى الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلدانعان بولاتىن. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

قۇجات مەملەكەت باسشىسىنىڭ بەس ينستيتۋسيونالدىق رەفورماسى اياسىنداعى «100 ناقتى قادام» اتتى ۇلت جوسپارىندا قامتىلعان الەۋمەتتىك كومەكتىڭ اتاۋلىلىعىن كۇشەيتۋ تۋرالى تاپسىرماسىن ورىنداۋعا باعىتتالعان.

ءمينيستردىڭ سوزىنە قاراعاندا، زاڭ جوباسى الەۋمەتتىك سالاداعى ەكى ماڭىزدى وزگەرىستى كوزدەيدى. ءبىرىنشى - ازاماتتاردىڭ كەيبىر ساناتتارىنا بەرىلەتىن الەۋمەتتىك تولەمدەرگە قولجەتىمدىلىكتى ارتتىرۋ. ەكىنشىدەن، از قامتىلعان ازاماتتارعا الەۋمەتتىك قولداۋدى كۇشەيتۋ.

«بۇل رەتتە الەۋمەتتىك تولەمدەردى ترانسفورماسيالاۋ جۇمىسى ازاماتتاردىڭ ساناتىنا قاراي تاعايىندالاتىن بىرنەشە الەۋمەتتىك جاردەماقىلاردى بىرىكتىرىپ، ءبىر جاردەماقى رەتىندە بەلگىلەۋدى كوزدەيدى. بۇل ءبىرىنشى كەزەكتە مۇگەدەك جانە مۇمكىندىگى شەكتەۋلى ازاماتتارعا قاتىستى جاردەماقىلار بولىپ تابىلادى. بۇگىنگى تاڭدا بۇل ساناتتاعى ازاماتتارعا ەكى ءتۇرلى الەۋمەتتىك جامدەماقى تاعايىندالعان. بۇل رەتتە ءبىرىنشى مەملەكەت تاراپىنان كەپىلدەندىرىلگەن مۇگەدەكتىگى بويىنشا تاعايىندالاتىن الەۋمەتتىك جاردەماقى. مۇنىڭ مولشەرى كۇنكورىس دەڭگەيى ەسەبىنەن انىقتالادى. ەكىنشىسى، 1999 جىلدان بەرى ناتۋرالدى كومەكتىڭ ورنىنا بەرىلىپ كەلە جاتقان ارناۋلى الەۋمەتتىك جاردەماقى. بۇل جاردەماقىنى ەسەپتەۋ بازاسى ايلىق ەسەپتىك كورسەتكىش بولىپ تابىلادى»، - دەيدى مينيستر تامارا دۇيسەنوۆا.

ونىڭ سوزىنە قاراعاندا، بۇگىنگى كۇنى اتالعان جاردەماقىلاردى الۋ ءۇشىن مۇگەدەك ازاماتتار ەكى ءوتىنىش پەن ەكى قۇجاتتار پاكەتىن تاپسىرىپ كەلەدى. ال زاڭ جوباسى بويىنشا وسى ەكى جاردەماقىنى بىرىكتىرىپ مۇگەدەك ازاماتتارعا كولەمى جاعىنان ەكى جاردەماقىنىڭ سوماسىنا تەڭ كەلەتىن مەملەكەت كەپىلدەندىرگەن ءبىر جاردەماقى تاعايىنداۋ قاراستىرىلىپ وتىر.

«ماسەلەن، 1ء-ىنشى توپتاعى مۇگەدەك ازاماتقا قازىرگى كۇنى 30 مىڭ 337 تەڭگە كەپىلدەندىرىلگەن مۇگەدەكتىگى بويىنشا جاردەماقى جانە 2954 تەڭگە مولشەرىندە ارناۋلى جاردەماقى تولەنەدى. سوندا جاردەماقىنىڭ جالپى سوماسى 33 مىڭ 291 تەڭگە بولىپ وتىر. زاڭ جوباسىنا سايكەس، وسى ازاماتقا 33 مىڭ 291 تەڭگە كولەمىندەگى مۇگەدەكتىگى بويىنشا ءبىر عانا جاردەماقى تاعايىندالاتىن بولادى جانە ءبىر پاكەت قۇجاتتار ءتىزىمى ەنگىزىلەتىن بولادى»، - دەپ ءتۇسىندىردى ت. دۇيسەنوۆا.  

ونىڭ ايتۋىنشا، ءدال وسىنداي وزگەرىستەر كوپ بالالى انالارعا تولەنەتىن جاردەماقىلاردى دا قامتىماق. قازىرگى كۇنى بۇل ساناتتاعى انالار ءۇش الەۋمەتتىك جاردەماقى تۇرلەرىن الىپ كەلەدى، ولار: ەكەۋى بالا تۋىلۋىنا جانە  بالا كۇتىمىنە، ءۇشىنشىسى وسى ساناتتاعى انالارعا بەرىلەتىن ارناۋلى الەۋمەتتىك جاردەماقىلار. «مۇنداعى قيىندىق ءارقايسىسىنا جەكە-جەكە تاپسىرىلاتىن قۇجاتتا عانا ەمەس، ءبىر ساناتتاعى ازاماتتارعا بەرىلەتىن جاردەماقىلاردى تاعايىنداۋدىڭ ءارتۇرلى زاڭدارمەن رەتتەلۋىنە دە بايلانىستى. وسىعان وراي، بۇل ساناتتاعى جاردەماقىلار تەك ءبىر عانا زاڭمەن رەتتەلەدى»، - دەدى مينيستر.