بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ مەملەكەتتىك رامىزدەرى تۋرالى» ق ر كونستيتۋسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.
قۇجات ق ر پرەزيدەنتى ن. نازاربايەۆتىڭ بەس ينستيتۋسيونالدىق رەفورماسىن، سونداي-اق قازاقستان حالقى اسسامبلەياسىنىڭ ءححىى سەسسياسىندا جۇكتەگەن تاپسىرمالارىن ورىنداۋ ماقساتىندا ازىرلەنگەن.
«تاۋەلسىز مەملەكەتتىڭ نەگىزگى اتريبۋتتارىنىڭ ءبىرى - مەملەكەتتىك رامىزدەر. ەلدىڭ مەملەكەتتىك تۋى، ەلتاڭباسى مەن گيمنى تاۋەلسىزدىك پەن پاتريوتيزم يدەياسىن قامتيدى. وسىعان بايلانىستى، مەملەكەتتىك رامىزدەردى پايدالانۋ ماسەلەلەرى پاتريوتتىق تاربيە مەن قازاقستاندىق بىرتەكتىلىكتى نىعايتۋ جۇيەسىنىڭ ماڭىزدى قۇرامداس بولىگى بولىپ تابىلادى. قاراستىرىلىپ وتىرعان زاڭ جوباسىندا مەملەكەتتىك رامىزدەردى پاتريوتتىق تاربيلەۋ جۇيەسىنىڭ ماڭىزدى ەلەمەنتى رەتىندە زاڭدى جانە جەكە تۇلعالاردىڭ پايدالانۋ پراكتيكاسىن ناقتى رەگلامەنتتەيتىن ءارى كەڭەيتەتىن وزگەرىستەر مەن تولىقتىرۋلار ەنگىزىلدى. مۇندا مەملەكەتتىك رامىزدەردى قولدانۋ ءتارتىبىن كەڭەيتۋ، ناسيحاتتاۋ جانە ولاردى قولدانۋ جونىندەگى ۇكىمەتتىك جانە وكىلەتتى ورگاننىڭ قۇزىرىن ناقتىلاۋ، قازاقستان رەسپۋبليكاسىنىڭ مەملەكەتتىك رامىزدەرى كۇنىن اتاپ ءوتۋدىڭ ەرەجەسىن ازىرلەۋ، مەملەكەتتىك رامىزدەر جانە گەرالديكالىق بەلگىلەر ماسەلەلەرى جونىندەگى ساراپتامالىق كەڭەس قۇرۋ ماسەلەلەرى قاراستىرىلعان»، - دەيدى ق ر مادەنيەت جانە سپورت ۆيسە-مينيسترى مارات ءازىلحانوۆ.
ونىڭ سوزىنە قاراعاندا، زاڭ جوباسىمەن مەملەكەتتىك رامىزدەردى قولدانۋ تاجىريبەسىن كەڭەيتۋ ماقساتىندا مەملەكەتتىك زاڭدى تۇلعالارعا ارنالعان، سونداي-اق ۇلتتىق كومپانيالاردىڭ، حولدينگتەردىڭ جانە جالعىز اكسيونەر بولىپ تابىلاتىن جاۋاپكەرشىلىگى شەكتەۋلى سەرىكتەستىكتەردىڭ مەملەكەتتىك سيمۆوليكالارعا قاتىستى ەكسپوزيسياسى ءۇشىن ورىن ءبولۋ قاراستىرىلعان. بۇدان بولەك، قازاقستان اۋماعىندا قىزمەتىن جۇزەگە اسىراتىن شەتەلدىك ۇيىمداردىڭ تۋلارىن قازاقستاننىڭ مەملەكەتتىك تۋىمەن بىرگە ورنالاستىرۋ نورمالارى دا قامتىلىپ وتىر.
ءماجىلىس ماقۇلداعان زاڭ جوباسى سەناتتىڭ تالقىلاۋىنا شىعارىلادى.
پىكىر قالدىرۋ