مەملەكەتتىڭ قاراماعىنداعى كومپانيالار ەلىمىزدەگى جەكە بيزنەستىڭ دامۋىنا تولىققاندى مۇمكىندىك بەرمەيدى. استاناداعى كاسىپكەرلىكتى دامىتۋ ورتالىعىنىڭ ديرەكتورى نۇرلان قۇلباتىروۆ وسىلاي دەيدى. ونىڭ ايتۋىنشا، مۇنداي كومپانيالاردى سەنىمدى جەكە ينۆەستورلاردىڭ قولىنا وتكىزۋ كەرەك. بۇل تۋرالى قامشى پورتالى Baq.kz –كە سىلتەمە جاساي وتىرىپ حابارلايدى.

ايتا كەتەيىك، قازىرگى تاڭدا ەلىمىزدە جەكەشەلەندىرۋدىڭ ەكىنشى تولقىنى ءجۇرىپ جاتقانى بەلگىلى. وسى ناۋقان اياسىندا رەسپۋبليكا اۋماعىنداعى مەملەكەتتىك نىسانداردىڭ ءبىرشاماسى ساتىلىمعا قويىلدى. ساراپشىلاردىڭ ايتۋىنشا، بۇل ادىستەن مەملەكەت ەش ۇتىلمايدى جانە حالىق تا زيان كورمەيدى.

«بىرىنشىدەن، جەكەشەلەندىرۋدىڭ ەكىنشى تولقىنىندا ءبىز الەمدەگى ەڭ ۇزدىك تاجىريبەلەردى ەسكەردىك. اتاپ ايتقاندا، «Yellow Pages» دەپ اتالاتىن قاعيدالاردىڭ قولدانىلۋى. ەكىنشىدەن، جەكەشەلەندىرۋ كەزىندە ترانسپورەنتتى جۇيەنى قالىپتاستىرۋ. ماسەلەن، مەملەكەتتىك مۇلىك رەەسترى جانىنان الاڭ قۇرىلادى. سونىڭ ارقاسىندا، ساتىپ الۋشى مەن ساتۋشى اراسىنداعى قارىم-قاتىناستى تولىق قاداعالاۋعا مۇمكىندىك تۋادى»، - دەدى نۇرلان قۇلباتىروۆ.

ونىڭ ايتۋىنشا، جەكەشەلەندىرۋ ۇردىستەرىن ىسكە قوسۋ ماقساتىندا ۇكىمەتپەن كومپانيالاردى باسەكەلەس ورتاعا بەرۋ ءۇشىن كەلەسى تاسىلدەر ۇسىنىلعان:

1. كەيبىر ەڭ ءىرى اكتيۆتەر تىكەلەي ساتۋ جولىمەن نەمەسە IPO جانە SPO تەتىكتەرى ارقىلى قور نارىعىنا شىعارۋ جولىمەن ستراتەگيالىق ينۆەستورلارعا، ونىڭ ىشىندە 2018 جىلعى 1 قاڭتارعا دەيىن «استانا» حالىقارالىق قارجى ورتالىعىنىڭ الاڭىنا (AIFC) ىسكە اسىرىلادى؛

2. باسقا كومپانيالار اۋكسيوندا نەمەسە كومپانيالارعا جەكە ينۆەستور قاتىسۋى بار بولسا، تىكەلەي ساتۋ تاسىلدەرىن پايدالانۋ ارقىلى ساتىلادى.

ايتا كەتەيىك، اۋكسيوندا ساتۋ كەزىندە ساۋدا-ساتتىق سانىنا شەكتەۋ قويىلادى. ءبىرىنشى ساتىلىم اعىلشىن ءادىسى بويىنشا باعانى كوتەرۋ ارقىلى جۇرگىزىلەدى. ەگەر وبەكت قىزىعۋشىلىق تۋدىرماسا، وندا ەكىنشى جانە ءۇشىنشى ساۋدا گوللاندتىق تاسىلمەن باعانى ءتۇسىرۋ ارقىلى جۇرگىزىلەتىن بولادى. ءۇش رەت ساۋدا جۇرگىزگەننەن كەيىن ساتىپ الۋشىلار بولماعان جاعدايدا، وبەكتى تاراتىلۋعا جاتادى.

3. جالعىز تالاپ – باسەكەلەستىك ورتاعا بەرىلەتىن كومپانيالاردىڭ ساتىلاتىن اكتيۆتەرىنىڭ قىزمەت باعىتىن ساقتاۋ بولىپ تابىلادى.

4. جاقسى اكتيۆتەردىڭ ساتىلىپ، ال از قىزىعۋشىلىقتى تۋدىراتىندارى مەملەكەتتە قالۋ جاعدايىن بولدىرماس ءۇشىن، بولشەكتەۋسىز، قايتا قۇرىلىمداۋسىز نەمەسە جەكە بولىككە ءبولۋسىز وبەكتىلەردى ساتۋدى قامتاماسسىز ەتۋ ۇسىنىلادى.

الدىنعى جىلدارداعى جەكەشەلەندىرۋدىڭ تاجىريبەسىن ەسكەرە وتىرىپ، ۇكىمەت پروسەستىڭ بارىنشا ايقىندىعىن جانە تيىمدىلىگىن قامتاماسىز ەتۋگە نيەتتەنەدى.