الەۋمەتتىك جاردەماقى الۋشىلاردىڭ ەڭبەك ەتۋگە دەگەن ىنتاسى قامتاماسىز ەتىلۋى كەرەك. بۇگىن پارلامەنت ماجىلىسىندە تالقىلانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتى الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا تۇسىنىك بەرگەن دەپۋتات گۇلنار سەيىتماعانبەتوۆا وسىلاي ءمالىم ەتتى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.
«بۇگىنگى زاڭ جوباسى ەلباسىنىڭ تاپسىرماسىنا، سونىڭ ىشىندە بەس ينستيتۋسيونالدىق رەفورما اياسىندا جۇكتەلگەن تاپسىرمانى ورىنداۋعا باعىتتالادى. بۇنداعى باستى ماسەلە - قازىرگى كۇنى ەلىمىزدەگى ازاماتتار مەملەكەت تاراپىنان كوپتەگەن جاردەماقىلاردى، اتاۋلى كومەكتەردى الىپ كەلەدى. وسىنىڭ بارىنە ازاماتتار كوپتەگەن قۇجاتتار جينايدى، سوسىن ول قۇجاتتاردىڭ ءارقايسىسى ءارتۇرلى اتاۋمەن اتالادى. وسىنىڭ ءبارىن بىرىكتىرىپ، جاردەماقى الۋشىلاردىڭ جۇمىسى وڭايلاتىلادى. ەكىنشىدەن، ەلباسى ايتىپ جۇرگەن ماسەلە - جاردەماقى الاتىنداردىڭ ەڭبەك ەتۋگە دەگەن ىنتاسىن قامتاماسىز ەتۋ»، - دەيدى دەپۋتات. ونىڭ ايتۋىنشا، زاڭ جوباسىندا قاراستىرىلعانىنداي، ەندىگى كۇنى اتاۋلى الەۋمەتتىك كومەك الاتىن ازاماتتار ەگەر ەڭبەككە قابىلەتتى بولسا، وندا ولارمەن الەۋمەتتىك كەلىسىمشارتى جاسالادى. بۇل بويىنشا اتالعان ازامات جۇمىسپەن قامتىلىپ قانا قويماي، مەديسينالىق كومەكتەر دە قامتىلادى. ماسەلەن، ونداي ازامات ناشاقور نەمەسە ىشكىلىككە سالىنعان بولسا، وندا تەگىن مەديسينالىق كومەك رەتىندە ەمدەلۋگە مۇمكىندىك بەرىلەدى.
«ەگەر ەڭبەك ەتۋگە قابىلەتتى ازامات كەلىسىمشارت بويىنشا مەملەكەت ۇسىنىپ، وعان تاۋىپ بەرگەن جۇمىستان باس تارتسا، وندا ونىڭ الەۋمەتتىك جاردەماقىسى توقتاتىلادى. تەك بالالارىنا عانا تولەنەدى»، - دەدى گ. سەيىتماعانبەتوۆا.
دەپۋتاتتىڭ سوزىنە قاراعاندا، زاڭ جوباسىندا الەۋمەتتىك كومەكتەر الىپ كەلە جاتقان ازاماتتارعا قارجىلىق جاعىنان مەملەكەتتىك قولداۋدى قاراستىرا وتىرىپ، ەڭبەككە قابىلەتتىلەردىڭ ىنتاسىن ارتتىرۋ يدەولوگياسى كورىنىس تابادى.
پىكىر قالدىرۋ