جۇمىس بەرۋشىلەر الەۋمەتتىك مەديسينالىق ساقتاندىرۋ قورىنا 2017 جىلدان باستاپ ەڭبەكاقىنىڭ 2 پايىزىن اۋدارا باستايدى. بۇل تۋرالى بۇگىن پارلامەنت ماجىلىسىندە «مىندەتتى الەۋمەتتىك مەديسينالىق ساقتاندىرۋ تۋرالى» زاڭ جوباسى بويىنشا بايانداعان دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

اتالعان زاڭ جوباسى مەملەكەت باسشىسىنىڭ مەديسينالىق ساقتاندىرۋ جۇيەسىن ەنگىزۋ تۋرالى تاپسىرماسىنا وراي ازىرلەنگەن. بۇل رەتتە زاڭ جوباسى مىندەتتى الەۋمەتتىك مەديسينالىق ساقتاندىرۋ جەكە جانە قوعامدىق دەنساۋلىق ءۇشىن مەملەكەتتىڭ، جۇمىس بەرۋشىلەر مەن ازاماتتاردىڭ ىنتىماقتى ورتاق جاۋاپكەرشىلىگى تەتىگىن ەنگىزۋگە، دەنساۋلىق ساقتاۋ سالاسىندا قازىرگى زامانعى نارىقتىق تەتىكتەردى قامتۋعا باعىتتالعان.

«ازاماتتارعا كورسەتىلەتىن مەديسينالىق كومەكتىڭ ەكى پاكەتى بەلگىلەنىپ وتىر. ونىڭ ءبىرىنشىسى، بازالىق پاكەت نەمەسە مەملەكەت تاراپىنان كەپىلدەندىرىلگەن مەديسينالىق كومەك. بۇل پاكەت ازاماتتاردىڭ كونستيتۋسيالىق قۇقىعىن قامتاماسىز ەتۋدى كوزدەيدى جانە تولىقتاي رەسپۋبليكالىق بيۋدجەت ەسەبىنەن قارجىلاندىرىلادى. سونداي-اق بۇل كومەك تۇرلەرى قازاقستاننىڭ بارلىق ازاماتتارى مەن ورالماندارى ءۇشىن قولجەتىمدى بولادى»، - دەيدى مينيستر تامارا دۇيسەنوۆا.

ەكىنشىدەن، مىندەتتى الەۋمەتتىك مەديسينالىق ساقتاندىرۋ جۇيەسى ەسەبىنەن قارجىلاندىرىلاتىن قوسىمشا پاكەت كوزدەلەدى. بۇل بازالىق پاكەتكە كىرمەيتىن قوسىمشا مەديسينالىق كومەك تۇرلەرىن قامتيدى.

«قوسىمشا پاكەت تەك مىندەتتى الەۋمەتتىك مەديسينالىق ساقتاندىرۋ جۇيەسىنە قاتىسۋشى ازاماتتارعا تيەسىلى بولماق.  مىندەتتى الەۋمەتتىك مەديسينالىق ساقتاندىرۋ جۇيەسى مەملەكەتتىڭ، جۇمىسپەن قامتۋشىنىڭ جانە جۇمىس بەرۋشىلەر مەن ءوزىن-وزى ەڭبەكپەن قامتىعان ازاماتتاردىڭ مىندەتتى ساقتاندىرۋ تولەمدەرىنەن قۇرىلاتىن بولادى. بۇل رەتتە جۇمىس بەرۋشىلەر ءوز جۇمىسشىلارى ءۇشىن ەڭبەكاقى قورىنان بەس پايىز، جۇمىسشىلار 2 پايىز، ءوزىن-وزىن ەڭبەكپەن قامتاماسىز ەتۋشىلەر كورسەتىلگەن تابىسىنان 7 پايىز جارنا تولەيتىن بولادى. قازىرگى ەكونوميكالىق جاعدايعا بايلانىستى جارنالار 2017 جىلدان باستاپ بىرتىندەپ وسەدى»، - دەيدى ت. دۇيسەنوۆا.

ءمينيستردىڭ سوزىنە قاراعاندا، مىندەتتى تولەمدەردى شوعىرلاندىرۋ ءۇشىن كوممەرسيالىق ەمەس اكسيونەرلىك قوعام نىسانىندا الەۋمەتتىك مەديسينالىق ساقتاندىرۋ قورى قۇرىلادى. بۇل رەتتە جۇمىس بەرۋشىلەردىڭ اتالعان قورعا تولەنۋگە جاتاتىن اۋدارىمدارىنىڭ مولشەرى 2017 جىلعى 1-قاڭتاردان باستاپ اۋدارىمدار ەسەپتەلەتىن وبەكتىنىڭ - 2 پايىزىن، 2018 جىلدان باستاپ - 3 پايىزىن، 2019 جىلدان - 4 پايىزىن، 2020 جىلى 5 پايىزىن قۇرايدى. ال جۇمىسشىلاردىڭ قورعا اۋداراتىن تولەمدەرى 2019 جىلدىڭ قاڭتارىنان باستاپ - 1 پايىزىن، 2018 جىلدان باستاپ 2 پايىزىن قۇراماق.