كەنتاۋ قالاسىنداعى ترانسفورماتور ونىمدەرىن شىعاراتىن «ALAGEUM GROUP» اق جاھان ەكونوميكاسىن تۇرالاتقان داعدارىس كەزەڭىندە باسەكەگە توتەپ بەرگەن ەلىمىزدە بىرەگەي كومپانيالاردىڭ ءبىرى. ساناۋلى كۇندەردەن كەيىن استانادا وتەتىن قازاقستاننىڭ ماشيناقۇرىلىسشىلارى – ءىىى فورۋمى قارساڭىندا ءبىز اتالعان كومپانيانىڭ ديرەكتورلار كەڭەسىنىڭ ءتوراعاسى ەركەبۇلان يلياسوۆپەن شاعىن سۇحبات وربىتكەن بولاتىنبىز.بۇل تۋرالى قامشى پورتالى Baq.kz –كە سىلتەمە جاساي وتىرىپ حابارلايدى.

- ەركەبۇلان سايدۋاللا ۇلى، جاھاندىق داعدارىس الەمدەگى كەيبىر ءىرى وندىرىستىك كومپانيالاردىڭ ءوزىن تۇرالاتىپ جاتقاندا، قازىرگى كەزدە سىزدەردىڭ كاسىپورىنداعى جاعداي قالاي بولىپ جاتىر؟

- ءبىزدىڭ كاسىپورىننىڭ ىرگەتاسى سوناۋ كەڭەس زامانىندا، 1950 جىلداردىڭ ەكىنشى جارتىسىندا قۇرىلعان عوي. ياعني، تاريحى تەرەڭدە جاتىر دەسەك تە بولادى. الايدا، زامان اعىمىنان قالماي، كوشكە ىلەسىپ وتىرۋ ءۇشىن، ءوندىرىستى وزىق تەحنولوگيالارمەن جابدىقتاپ وتىرۋ كەرەكتىگى اقيقات. ءبىز وسىنداي كەزەڭدى باستاپ وتكەرىپ، ءجۇز پايىزعا دەيىن تەحنولوگيامىزدى قايتا جاڭعىرتا الدىق دەسەم دە بولادى. ارينە، بۇل جەردە مەملەكەتتىڭ كومەگىن اتاپ وتپەي بولمايدى.

- تەحنولوگيانى قاي جاقتان الىپ كەلدىڭىزدەر جانە مەملەكەتتەن قاندا كومەك الدىڭىزدار؟ ناقتىلاي تۇسسەڭىز...

- ءقازىر الەمدىك وركەنيەتتە ءسات سايىن سان ءتۇرلى جاڭالىقتار شىعىپ، بۇگىن ويلاپ تاپقان جاڭالىعىڭىز ەرتەڭ ەسكىرىپ قالاتىنداي شاپشاڭدىق جۇرۋدە. وسىنى ەسكەرە كەلە وندىرىستىك تەحنيكالارعا زاماناۋي تەحنولوگيالار ەنگىزۋ تاجىريبەسى مول ەۋروپا ەلدەرىنىڭ ۇلگىسىن قولدانىسقا ەنگىزدىك. ناتيجەسىندە، شىعارعان ونىمدەرىمىز ساپالى ءارى زاماناۋي. ءتىپتى، تمد ەلدەرىنىڭ ىشىندە سۇرانىسى ارتىپ كەلەدى. ال ەندى مەملەكەت تاراپىنان جاسالعان كومەكتەر تۋرالى ايتار بولسام، ول از ەمەس. الدىمەن يندۋستريالىد-يننوۆاسيالىق دامۋ باعدارلاماسىنىڭ ءبىرىنشى جانە ەكىنشى كەزەڭدەرى بويىنشا جانە «بايتەرەك» ۇبح» اق تاراپىنان ۇسىنىلعان قارجىلىق، كەڭەس كومەكتەردىڭ ءبىزدىڭ كومپانيامىزدىڭ قالىپتى دامۋىنا تيگىزگەن ءتيىمدى جاقتارى كوپ بولدى. سونىڭ ناتيجەسىندە ءبىز سوڭعى جىلدارى قۇرال-جابدىقتارىمىزدى تولىق جاڭارتىپ، وتە ساپالى ونىمدەر شىعارا باستادىق. كادرلىق باسقارۋ مەن بىلىكتى ماماندارمەن قاتارىمىزدى تولىتىرىپ كەلەمىز.

- شەتەلدىڭ تەحنولوگياسىن اكەلگەن سوڭ، ونىڭ تەتىگىن تاۋىپ جۇرگىزۋدە بىلىكتى ماماندار ماسەلەسىن قالاي شەشە الدىڭىزدار؟

- ءبىزدىڭ ماماندارىمىز بارلىعى دا ءوز وتانداستارىمىز. ال شەت ەلدەن تەك جاڭا تەحنولوگيا مەن تىڭ ادىستەر جانە وزىق قۇرال-جابدىقتار عانا الىپ كەلدىك. ونىڭ ۇستىنە ءوزىمىزدىڭ كومپانيانىڭ قولداۋىمەن جىلىنا 150 مامان دايارلايتىن ءوز وقۋ ورنىمىز – ارنايى كوللەدجىمىز بار. بۇل جەردە دە شاكىرتتەرىمىزدى وقىتۋدا مەملەكەت تاراپىنان گرانتتىق نەگىزدى ءبىلىم الاتىندىعىن اتاپ وتپەي بولمايدى. ياعني، ۇكىمەت قارجى قۇيىپ وقىتىپ جاتقان ستۋدەنتتەردىڭ تەوريا مەن تاجىريبەنى قاتار ۇشتاستىرا وتىرىپ، بىلىكتى مامان رەتىندە قالىپتاسۋىنا ەرەكشە ىقپال ەتۋدەمىز.

- ال شىعارعان ونىمدەرىڭىزدى قانشا پايىزى ەكسپورتتالادى جانە قاي ەلدەرگە؟

- ءبىزدىڭ شىعارعان ونىمدەرىمىزدىڭ نەگىزگى تۇتىنۋشىسى تمد ەلدەرى. ونىڭ ىشىندە رەسەي، وزبەكستان، قىرعىزستان، تاجىكستان مەن تۇركمەنستان سىندى مەملەكەتتەردەن سۇرانىس جوعارى. ال ترانسفورماتور مەن ەلەكتروقۇرال-جابدىقتارىمىزدىڭ 35 پايىزى ەكسپورتتالادى.

- اڭگىمەڭىزگە راحمەت.

 سۇحباتتاسقان – نۇرلىبەك دوسىباي

P.S: استانادا وتەتىن قازاقستاننىڭ ماشيناقۇرىلىسشىلارى – ءىىى فورۋمى 1-2 قازان كۇندەرى وتەدى دەپ جوسپارلانۋدا. شارا اياسىندا ەلىمىزدىڭ ماشيناقۇرىلىس سالاسىنداعى ونىمدەردىڭ ەۋرازيالىق ەكونوميكالىق وداق پەن دۇنيەجۇزىلىك ساۋدا ۇيىمىنداعى باسەكەگە قابىلەتتىلىگىن ارتتىرۋ جايى تالقىلانادى دەپ كۇتىلۋدە.