قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا سانكت-پەتەربۋرگ قالاسىنداعى ەۋرازيالىق ايەلدەر فورۋمىنىڭ ەكىنشى كۇنى اياسىندا ءبىرقاتار كەزدەسۋ وتكىزدى. بۇل تۋرالى قامشى پورتال اقوردا.كز-كە سىلتەمە جاساي وتىرىپ حابارلايدى.

شارا اياسىندا مەملەكەتتىك حاتشى بەلارۋس رەسپۋبليكاسى پرەمەر-مينيسترىنىڭ ورىنباسارى ن.ي.كاچانوۆامەن كەزدەستى. گ.ءابدىقالىقوۆا ەكى ەل اراسىندا ءوزارا سەنىمگە قۇرىلعان جىلى قارىم-قاتىناس ورنىققانىن ايتتى، سونداي-اق ەكىجاقتى ىنتاماقتاستىقتى نىعايتۋدا قازاقستان مەن بەلارۋس ەلدەرىنىڭ كوشباسشىلارى ەلەۋلى ءرول اتقارىپ كەلە جاتقانىن اتاپ كورسەتتى.

– ءوزارا ءىس-قيمىلدىڭ ءارتۇرلى دەڭگەيدە قول قويىلعان، كوپتەگەن ەكىجاقتى قۇجاتتاردان تۇراتىن نورماتيۆتىك-قۇقىقتىق بازاسى ءتيىمدى سەرىكتەستىككە نەگىز بولىپ وتىر، – دەدى  مەملەكەتتىك حاتشى.

گ.ءابدىقالىقوۆا سونداي-اق ازەربايجان رەسپۋبليكاسىنىڭ وتباسى، ايەلدەر جانە بالالار ماسەلەلەرى جونىندەگى مەملەكەتتىك كوميتەتىنىڭ ءتورايىمى ي.گۋسەينوۆامەن جانە وڭتۇستىك افريكا رەسپۋبليكاسى ۇلتتىق اسسامبلەياسى ءتوراعاسىنىڭ ورىنباسارى س.تسەنوليمەن كەزدەستى. كەزدەسۋلەر بارىسىندا ايەلدەرگە قاتىستى زاڭناما جانە قۇقىق قولدانۋ تاجىريبەلەرى، انا مەن بالانى قورعاۋ، «ەكسپو-2017» كورمەسىنە قاتىسۋ ماسەلەلەرى تالقىلاندى.

سونىمەن قاتار گ.ءابدىقالىقوۆا تمد-عا مۇشە ەلدەردىڭ پارلامەنتارالىق اسسامبلەياسىنىڭ «دريەۆو جيزني» سىيلىعىن جانە ەۋرازيالىق ايەلدەر فورۋمىنىڭ سىيلىعىن تاپسىرۋ سالتاناتىنا قاتىستى.

تۇستەن كەيىن مەملەكەتتىك حاتشى حالىقارالىق ەڭبەك ۇيىمى باس ديرەكتورىنىڭ ورىنباسارى ساندرا پولاسكيمەن دە كەزدەستى. ونىڭ بارىسىندا تاراپتار ەڭبەك قاتىناستارىن رەتتەۋ جانە ەڭبەكتى قورعاۋ سالاسىنىڭ ماڭىزدى ماسەلەلەرىن تالقىلادى.

گ.ءابدىقالىقوۆا س.پولاسكيگە ەلباسى ن.ءا.نازاربايەۆتىڭ ەلىمىزدى جان-جاقتى جاڭعىرتۋعا باعىتتالعان بەس ينستيتۋسيونالدىق رەفورماسىنىڭ، ۇلت جوسپارى – «100 ناقتى قادامنىڭ»، سونداي-اق «نۇرلى جول» جاڭا ەكونوميكالىق ساياساتىنىڭ ىسكە اسىرىلۋ بارىسى تۋرالى اڭگىمەلەدى.

مەملەكەتتىك حاتشى قازاقستاننىڭ زەينەتاقى جۇيەسىن جاڭعىرتۋ، سونداي-اق تمد-دا جاستاردى ەڭبەكپەن قامتۋ سالاسىنداعى ساياساتتىڭ تيىمدىلىگىن ارتتىرۋعا باعىتتالعان حەۇ تەحنيكالىق ىنتىماقتاستىق جوباسىن قاراستىرۋ بارىسى تۋرالى باياندادى.

سوڭىندا  گ.ن.ءابدىقالىقوۆا قازاقستان ماماندارى وقىتۋ جانە بىلىكتىلىگىن ارتتىرۋ ىسىندە  حەۇ ماڭىزدى ءرول اتقارىپ وتىرعانىن اتاپ ءوتتى.