ورال قالاسىندا 25 قىركۇيەك كۇنى وبلىستىق كورەي ەتنومادەني بىرلەستىگىنىڭ 25 جىلدىعىنا وراي «ەۋرازيا كەڭىستىگىندەگى ۇلتارالىق قاتىناستار. قازاقستاندا بەيبىتشىلىك پەن كەلىسىمدى ساقتاۋداعى قحا-نىڭ ءرولى» تاقىرىبىندا حالىقارالىق عىلىمي-تاجىريبەلىك كونفەرەنسيا وتكىزىلىپ، وعان قازاقستانعا قوسا، ماسكەۋ، ساراتوۆ، سامارا، ورىنبور قالالارىنان كەلگەن جاس عالىمدار قاتىستى. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

جيىننىڭ اشىلۋ راسىمىندە وبلىس اكىمىنىڭ ورىنباسارى باقتيار ماكەن ەۋرازيالىق وداق قۇرۋ يدەياسىن ءبىرىنشى بولىپ 1994 جىلى ممۋ-دا سويلەگەن سوزىندە قازاقستان پرەزيدەنتى نۇرسۇلتان نازاربايەۆتىڭ كوتەرگەنىن اتاپ ءوتتى. ۋاقىت بۇل يدەيانىڭ ومىرشەڭدىگىن كورسەتىپ، جاڭا قۇرىلىم دۇنيەگە كەلدى. قازاقستان، رەسەي جانە بەلارۋس ەلدەرى باسشىلارىنىڭ ەۋرازيالىق ەكونوميكالىق وداق تۋرالى كەلىسىمگە قول قويعانى بەلگىلى. اتالمىش كونفەرەنسيا دا ەكى ەلدىڭ ەتنومادەني بىرلەستىكتەرىنىڭ كۇشىمەن ءوزارا دوستىق بايلانىستى نىقتاي ءتۇسۋدى كوزدەيدى.

ۇلتارالىق كەلىسىمدى ورنىقتىرۋداعى بەلسەندى قىزمەتى ءۇشىن كورەي ەتنومادەني بىرلەستىگىنىڭ ءتوراعاسى ماكسيم پاكقا وبلىس اكىمىنىڭ العىسحاتى تابىس ەتىلدى.

كونفەرەنسيادا «جاس ەۋرازيا» ەۋرازيالىق جالپىرەسەيلىك قوزعالىسىنىڭ جەتەكشىسى، ماسكەۋ مەملەكەتتىك حالىقارالىق قاتىناستار ينستيتۋتىنىڭ اسپيرانتى يۋريي كوفنەر بايانداما جاساپ، قازاقستان پرەزيدەنتىنىڭ ەۋرازيالىق ىقپالداستىقتى ارتتىرۋداعى كوشباسشىلىق رولىنە، وسىناۋ باستامانى رەسەيلىك قوعامنىڭ قولداپ وتىرعانىنا توقتالدى. سونداي-اق «ورىنبور»، «ساراتوۆ» جانە «شەشەن ەلى»،   «سامارا» كلۋبتارىنىڭ جەتەكشىلەرى انتون جەلەزنياك، ماگومەد ابۋباكيروۆ، ولەگ نيەۆزوروۆ ءوز وي-تولعامدارىمەن ءبولىستى. قازاقستان حالقى بقو اسسامبلەياسى ءتوراعاسىنىڭ ورىنباسارى عايسا قاپاقوۆ وڭىردە اتقارىلىپ جاتقان جۇمىستاردى ايتىپ وتسە، م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى مونيتورينگ جانە سوسيولوگيالىق زەرتتەۋلەر ءبولىمىنىڭ باسشىسى، فيلوسوفيا عىلىمدارىنىڭ دوكتورى پاۆەل دوبريايەۆ قازاقستاندىق جاستاردىڭ ەۋرازيا ىقپالداستىعىنا قاتىسى تۋرالى اڭگىمەلەدى.

كورەي ەتنومادەني بىرلەستىگىنىڭ جەتەكشىسى م.پاكتىڭ سوزىنە قاراعاندا، ورىنبور وبلىسىنداعى ارىپتەستەرىمەن تىعىز بايلانىس ورناتىلعان. سونىڭ دالەلىندەي جۋىردا باتىسقازاقستاندىقتار ورىنبوردا وتەتىن ەۋرازيالىق ەكونوميكالىق فورۋمعا قاتىسپاقشى. ەلباسىنىڭ «نۇرلى جول - بولاشاققا بارار جول» اتتى جولداۋىندا ايتىلعانىنداي، ماڭگىلىك ەلدى باستى باعدار ەتكەن كەزەڭدە بارلىق ۇلتتىڭ بەرەكە-بىرلىگىن ارتتىرۋدىڭ ماڭىزى زور.