بۇگىن الماتىدا دۇنيەجۇزىلىك تۋريزم كۇنىنە ارنالعان اقپاراتتىق تۋر اياقتالدى. وسى شارا اياسىندا گونكونگ، گەرمانيا، كانادا، وڭتۇستىك كورەيا، ۇلىبريتانيا جانە باسقا دا ەلدەردەن كەلگەن جۋرناليستەر مەن بلوگەرلەر الماتىدا ءبىر اپتا بولىپ، قالانىڭ تۋريستىك الەۋەتىمەن تانىستى. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

«مەن قازاقستانعا جانە الماتى قالاسىنا ءبىرىنشى رەت كەلىپ وتىرمىن. مەنى اسىرەسە تاۋلاردىڭ اسەم كورىنىسى مەن قالا ورتالىعىنان تاۋ بوكتەرلەرىنە 15 مينۋتتا جەتۋگە بولاتىندىعى تاڭ قالدىردى. بىزدە، باۆاريا جەرىندە دە ادەمى تاۋلار بارشىلىق. ءبىراق ول جاقتا تاۋ باسىنا شىققانىڭمەن جالعىز قالا المايسىڭ. ايتەۋىر قاسىڭنان كەم دەگەندە 50 ادام تابىلا كەتەدى. ال مۇندا وڭاشا قالىپ، ءوزىڭدى ەركىن سەزىنە الاسىڭ. مەن مۇنى ەۋروپالىقتارعا جەتكىزۋگە تىرىسامىن. ول جاقتا حايكينگ (جاياۋ تۋريزم) وتە تانىمال. ءبىراق، ەۋروپالىقتار قازاقستاننىڭ تابيعاتى وسىنداي كەرەمەت ەكەندىگىن، مۇندا جاياۋ تۋريزمگە بارلىق جاعداي جاسالعاندىعىن بىلە بەرمەيدى»، - دەدى  «Monkeys and mountains»  دەپ اتالاتىن تانىمال سايتتىڭ بلوگەرى لاۋرەل روببينس.

الماتى قالاسى اكىمدىگى ۇيىمداستىرعان اتالمىش تۋردىڭ مىندەتى - قالانىڭ تۋريستىك تارتىمدىلىعىن حالىقارالىق دەڭگەيدە ارتتىرا ءتۇسۋ. سوندىقتان شەتەلدىك قوناقتار ءبىر اپتا بويى نەگىزىنەن قالا ىرگەسىندە بولدى - الماتىنىڭ مۋزەيلەرىن، كورىكتى جەرلەرىن ارالادى، ۇلتتىق تاعامداردان ءدام تاتتى جانە تاۋعا سەرۋەنگە شىقتى.

«مەنى جەرگىلىكتى حالىقتىڭ ەشقانداي جاساندىلىعى جوق شىنايى قوناقجايلىعى ءتانتى ەتتى. بارلىعى كومەكتەسۋگە ءازىر تۇرادى. الماتىدا نەشە ءتۇرلى ەلدىڭ ۇلتتىق تاعامدارى بار ەكەن. ءبىراق، قازاقتىڭ ۇلتتىق تاعامدارىنىڭ ورنى ەرەكشە. ال، الماتى - زامانۋي قالا. جەرگىلىكتى تۇرعىندار كولىك كەپتەلىستەرىنە ۇيرەنىپ كەتكەن سەكىلدى. اناۋ ايتقانداي ابىگەرلىك بايقالمايدى»، - دەدى قىتايلىق «International link»  جۋرنالىنىڭ وكىلى فرانك لوك.

ورتالىق ازيانى ۇلىبريتانياعا تانىتۋ اگەنتتىگىنىڭ مەنەدجەرى اننا ءلاريدىڭ ايتۋىنشا، ونى الماتى قالاسى مادەنيەتىنىڭ ءار تۇرلىلىگى تاڭ قالدىرعان. مۇندا ادامدار اراسىندا ەرەكشە سىيلاستىق قالىپتاسقان.

«ءبىز كوپ ۇزاماي «الماتى تۋرالى 100 اسەر» دەپ اتالاتىن كورنەكى وقۋ قۇرالىن شىعارامىز. وندا الماتى تۋرالى كوپ اقپارات بولادى»، - دەدى ول.

جالپى، تۋرعا قاتىسۋشىلار الماتىدا جاياۋ جۇرگىنشىلەر ءۇشىن قاۋىپسىزدىك، تازالىق جانە باسقا دا قاجەتتى جاعدايلار جوعارى دەڭگەيدە ەكەندىگىن ايتا كەلە، قالا اكىمدىگىنىڭ اۋانىڭ لاستانۋىن ازايتۋ جانە قوعامدىق كولىك جۇيەسىن جاقسارتۋعا باعىتتالعان جۇمىستاردى ودان ءارى جالعاستىراتىندىعىنا ۇمىتتەنەتىندىكتەرىن ءبىلدىردى.