قازاقستاندا جىل سايىنعى رەسپۋبليكالىق يننوۆاسيالىق بيزنەس-جوبالار بايقاۋى باستالدى. بۇل جايىندا بۇگىن وكق بريفينگىندە ق ر يدم تەحنولوگيالىق جانە يننوۆاسيالىق دامۋ دەپارتامەنتىنىڭ ديرەكتورى ازامات باتىرقوجا مالىمدەدى. بۇل تۋرالى قامشى پورتالى Baq.kz –كە سىلتەمە جاساي وتىرىپ حابارلايدى.
"رەسپۋبليكالىق يننوۆاسيالىق بايقاۋدىڭ نەگىزگى ماقساتى - يننوۆاسيالىق جۇيەنىڭ بارلىق سۋبەكتىلەرىن: وقۋشىلاردان باستاپ ءىرى كاسىپورىندارعا دەيىن قامتۋ. جوبا ۇلىبريتانيا مەن قازاقستان ۇكىمەتتەرىنىڭ «نيۋتون - ءال-فارابي» اتتى سەرىكتەس باعدارلاماسى شەگىندە جۇزەگە اساتىن بولادى. بۇل باعدارلامانىڭ ماقساتى - عىلىم مەن يننوۆاسيالار سالاسىندا ەكى ەل اراسىنداعى ىنتىماقتاستىقتى نىعايتۋ ارقىلى قازاقستاننىڭ ەكونوميكالىق جانە الەۋمەتتىك دامۋىنا قولعابىس ەتۋ. بايقاۋ مىناداي نوميناسيالار بويىنشا وتكىزىلەدى: «وقۋشىلار اراسىنداعى ۇزدىك يننوۆاسيالىق جوبا»، «ۇزدىك جاس عالىم»، "جىلدىڭ ۇزدىك ونەرتاپقىش شەشىمى"، "كاسىپورىندا ونەرتاپقىشتىقتى قولداۋدىڭ ۇزدىك جۇيەسى"، "يننوۆاسيالىق تاقىرىپتاعى ۇزدىك ءتىلشى ماتەريالى" سونىمەن قاتار، جۋرناليستەر ءۇشىن ترەنينگتەر وتەتىن بولادى، ولاردىڭ ناتيجەلەرى بويىنشا ۇزدىك ماتەريالداردىڭ، سيۋجەتتەر مەن راديو باعدارلامالارىنىڭ اۆتورلارى انىقتالادى.وقۋشىلار اراسىنداعى ۇزدىك يننوۆاسيالىق جوبانىڭ نەگىزىگى ماقساتى - بالالاردىڭ يننوۆاسيالارعا دەگەن قىزىعۋشىلىعىن ىنتالاندىرۋ، ونەرتاپقىشتار ۇرپاعىن وسىرۋگە ىقپال ەتۋ. ال، «ەڭ ۇزدىك جاس عالىم» نوميناسياسى عالىمداردى ءوز ازىرلەمەلەرىن وندىرىسكە ەندىرۋگە، نارىققا شىعارۋعا، ونەرتابىستارىن ەندىرەتىن ونەرتاپقىشتاردى ىنتالاندىرۋعا ارنالعان" دەدى ول ءوز سوزىندە.
نوميناسيا بۇكىل الەمگە اتى ايگىلى FameLab كونكۋرسىنىڭ فورماتىمەن وتپەك. ونىڭ تۇجىرىمداماسىنا سايكەس، قاتىسۋشىلار ءادىل قازىلار القاسى مەن كوپشىلىك الدىندا وزدەرىنىڭ كۇردەلى جوبالارىن قاراپايىم تۇسىنىكتى سوزبەن تانىستىرۋى ءتيىس.
"نوميناسيا جەڭىمپازى لوندونداعى FameLab كونكۋرسىنىڭ گراند-فينالىندا ەلىمىزدىڭ نامىسىن قورعاۋعا باراتىن بولادى. "ۇزدىك جاس عالىم" نوميناسياسىنىڭ جەڭىمپازى 7 500 000 تەڭگەنى قۇرايتىن باس جۇلدەگە يە بولماق. كونكۋرس جۇلدەگەرلەرى (2 جانە 3 ورىن) سايكەسىنشە 2 500 000 جانە 1 500 000 تەڭگەنى الادى. سونىمەن قاتار، العاشقى ءۇش ورىنعا يە بولعان قاتىسۋشىلار ۇلىبريتانياداعى EducationTour ساپارىنا اتتانادى. وسى ساپار اياسىندا بالالار لوندونداعى مۇراجايعا، رويال گرينۆيچ وبسەرۆاتورياسىنا، كەمبريدجدىڭ عىلىمي فەستيۆالىنە، FireTech بالالار عىلىمي لاگەرى ءتارىزدى ورىندار مەن شارالارعا قاتىساتىن بولادى"، دەدى ا.باتىرقوجا.
ايتا كەتەيىك، بايقاۋعا قاتىسۋ ءۇشىن وتىنىمدەردى قابىلداۋ 2015 جىلعى 28 قىركۇيەكتەن 25 قازانعا دەيىن سوزىلادى. بايقاۋدىڭ فينالى استانا قالاسىندا 11 قاراشادا وتەدى. جۇلدەگەرلەر مەن جەڭىمپاز ءۇشىن رولس-رويز زاۋىتى، JLR (لەند روۆەر جانە ت.ب.) زاۋىتى، British Aerospace زاۋىتى، Westland Aircraft مەن Catapult Centres سياقتى ۇلىبريتانيانىڭ الدىڭعى قاتارلى تەحنولوگيالىق كومپانيالارىنا بارۋدى ۇيىمداستىرۋ كوزدەلۋدە.
پىكىر قالدىرۋ