بۇگىن الماتىدا ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي كىتاپحاناسىندا ەۋروپالىق جوعارى ءبىلىم بەرۋ كورمەسى اشىلدى. وعان ەۋرووداقتىڭ 24 ەلىنەن 100-دەن استام ۋنيۆەرسيتەت پەن جوعارى ءبىلىم بەرۋ بويىنشا ۇلتتىق اگەنتتىكتەردىڭ وكىلدەرى قاتىسۋدا. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

«قازاقستاندىق جاستار نەگىزىنەن گەرمانيا، فرانسيا جانە انگليا سەكىلدى ەلدەردىڭ جوعارى وقۋ ورىندارىن جاقسى بىلەدى. سوندىقتان بۇل كورمەنىڭ باستى ماقساتى - جاستاردى ەۋروپانىڭ كوپتەگەن ەلدەرىنىڭ جوعارى وقۋ ورىندارىمەن، ءبىلىم بەرۋ جۇيەسىمەن تولىققاندى تانىستىرۋ جانە ولارعا وقۋعا ءتۇسۋ جولدارىن ءتۇسىندىرۋ. وسىلايشا ولار جوعارى ءبىلىم الۋ بويىنشا كوپ مۇمكىندىكتەردى بىلە الادى»، - دەدى ءوز سوزىندە «ەۋروپالىق ءبىلىم بەرۋدىڭ ازيا مەن ورتالىق ازياداعى كورمەسى» جوباسىنىڭ جەتەكشىسى ستيۆەن ۆەبەر.

سونىمەن قاتار، ول ەۋروپا ەلدەرى اراسىندا جوعارى ءبىلىم بەرۋ جۇيەسى مەن وقۋ اقىسى بويىنشا وزگەشىلىكتەر بار ەكەندىگىن جەتكىزدى.

«ەۋروپا ەلدەرى ىشىندە ۇلىبريتانيادا جوعارى ءبىلىم الۋ قىمبات تۇرادى. مۇندا وقۋ اقىسى جىلىنا 20-30 مىڭ ەۋرونى قۇرايدى. ال كەرىسىنشە، شىعىس ەۋروپا جانە بالتىق جاعالاۋى ەلدەرىندە وقۋ اقىسى ارزان، بىرنەشە مىڭ ەۋرونى قۇراۋى مۇمكىن. سونىمەن قاتار، مىسالى بەلگيادا شەت ەلدىك ستۋدەنتتەر تەك جىلدىق تىركەلۋ جارناسىن عانا تولەپ وقي الادى. ول شامامەن جىلىنا 600-700 ەۋرو بولادى. ال گەرمانيا، شۆەسيا، فينليانديا جانە تاعى  ءبىرقاتار ەلدەردە ءتىپتى تەگىن دە وقۋعا بولادى. بۇل ءۇشىن شەتەلدىك تالاپكەرلەر وقۋعا تۇسەردەن كەم دەگەندە التى اي بۇرىن جوعارى وقۋ ورنىمەن حابارلاسىپ، شاكىرتاقىعا ارىز جازادى. سونىمەن قاتار، باسقا دا ءتيىستى قۇجاتتاردى تاپسىرادى. ەگەر ارىز قابىل الىنسا، وندا ول تەگىن وقيدى. ءتىپتى جاتاقحاناعا دا تەگىن تۇرۋى مۇمكىن. ياعني، قولىنا شاكىرتاقى المايدى. شاكىرت اقى وقۋ اقىسى مەن جاتاقحانا شىعىنىن تولىعىمەن جابادى»، - دەدى س. ۆەبەر.

ايتا كەتەلىك، كورمە بۇگىن جانە ەرتەڭ، ياعني سەنبى جانە جەكسەنبى كۇندەرى تاڭعى ساعات 9.00-دەن 17.00-گە دەيىن جالعاسادى.

وندا جاستار ەۋروپالىق وداق ۋنيۆەرسيتەتتەرىندە باكالاۆر مەن ماگيستردەن باستاپ، PhD دەڭگەيىنە دەيىن بارلىق ساتىلاردا ءبىلىم الۋعا بايلانىستى تولىققاندى اقپارات الا الادى.

ال ۇستىمىزدەگى جىلدىڭ 28ء-شى قىركۇيەگىندە اتالمىش جوعارى وقۋ ورنىندا «ەۋروپالىق وداق پەن قازاقستان رەسپۋبليكاسى اراسىندا جوعارى ءبىلىم بەرۋ سالاسىنداعى ىنتىماقتاستىق» تاقىرىبى بويىنشا حالىقارالىق كونفەرەنسيا  وتەدى.