ەلباسىمىزدىڭ «نۇرلى جول - بولاشاققا باستار جول» اتتى جولداۋىندا قازاقستانداعى كۇرە جولدار قۇرىلىسىنا ايرىقشا ءمان بەرىلگەنى ءمالىم. بۇل رەتتە باتىس قازاقستان وبلىسىنداعى ەڭ شالعاي اۋداننىڭ ءبىرى - جانىبەك پەن ورال قالاسىن جالعاستىراتىن جولدىڭ ماڭىزى ەرەكشە. كوپتەن شەشىلمەي كەلە جاتقان بۇل ماسەلە كەيىنگى جىلدارى قولعا الىنىپ، قاتقىل تاباندى جول تارتىلۋدا. سونىڭ ىشىندە بيىل رەسپۋبليكالىق ماڭىزى بار جانىبەك-قازتالوۆ جولىنىڭ 20 شاقىرىمىن كۇردەلى جوندەۋ باستالدى. بۇل تۋرالى قامشى پورتالى قازاقپاراتقى سىلتەمە جاساي وتىرىپ حابارلايدى.

جانىبەك اۋدانىنىڭ اكىمى مۇرات مۇقايەۆتىڭ ايتۋىنشا، 2015 جىلى جوسپارعا سايكەس 3،8 شاقىرىم جولدى جوندەۋگە 500 ملن. تەڭگە بولىنگەن. جوندەۋ جۇمىستارىن «رسۋ-1» ج ش س جۇرگىزۋدە. ال 20 شاقىرىمدىق جوبانىڭ جالپى قۇنى - 2،7 ملرد. تەڭگە. 2016 جىلى قالعان قارجى بولىنسە، جول جوندەۋ جالعاسادى. سونىمەن قاتار اۋداندىق ماڭىزى بار 271 شاقىرىم اۆتوجولدار جەرگىلىكتى بيۋدجەت قارجىسىنا اعىمداعى جوندەۋدەن وتكىزىلىپ، كۇتىپ ۇستالادى. مىسالى، جانىبەك-تالوۆ باعىتىنداعى جولدى «قانات» ج ش س جوندەۋ ۇستىندە. سول سياقتى اۋدان ورتالىعى جانىبەك اۋىلىنداعى بىرنەشە كوشە جولدارى رەتكە كەلتىرىلدى.

جالپى، جانىبەك اۋدانىندا ەلباسى تاپسىرماسىنا سايكەس قولعا الىنعان مەملەكەتتىك باعدارلامالار ويداعىداي ورىندالۋدا. ايتالىق، «قولجەتىمدى باسپانا - 2020» باعدارلاماسىنا سايكەس اۋداندا تۇرعىن ءۇي قۇرىلىسى قارقىن الدى.  بۇرىنعى سالىنعاندار ءوز الدىنا، جەرگىلىكتى بيۋدجەت ەسەبىنەن 8 ءۇش جانە 40 ەكى پاتەرلىك ءۇيدىڭ جوبالىق-سمەتالىق قۇجاتتاماسى جاسالدى. جانىبەك اۋىلىندا 157 تۇرعىن ءۇي سالۋعا قاجەتتى ينجەنەرلىك-كوممۋنيكاسيالىق ينفراقۇرىلىم تارتىلدى. ءقازىر جەر تەلىمدەرى كەزەكپەن بەرىلۋدە. «اق بۇلاق» باعدارلاماسىنا سايكەس جاقسىباي، ۇزىنكول اۋىلدارى اۋىز سۋمەن قامتىلسا، قازىرگى تاڭدا جانىبەك، قامىستى جانە تالوۆتا سۋ قۇبىرىن قايتا قۇرۋدىڭ، اقوباعا قۇبىر تارتۋدىڭ  جوبالىق-سمەتالىق قۇجاتتاماسى دايىندالدى. «اگروبيزنەس - 2020»، «سىباعا»، «قۇلان»، «التىن اسىق» باعدارلامالارىنا سايكەس بيىلعى جىلدىڭ وزىندە 142 شارۋا قوجالىعى 8 مىڭ باس انالىق مال مەن 304 اسىل تۇقىمدى بۇقاعا قول جەتكىزدى. 5 شارۋا قوجالىعى اسىل تۇقىمدى 71 ەدىلباي قوشقارىن يەلەنسە، «قۇلانعا» سايكەس 1 شارۋا قوجالىعى 5 ملن. تەڭگە نەسيە الدى. تاعى ءۇش شارۋاشىلىق 35 ملن. تەڭگە نەسيە الماقشى. مەملەكەتتىڭ قولداۋى ارقاسىندا بارلىق اۋىلدىق وكرۋگتەر 119 اسىل تۇقىمدى بۇقامەن قامتىلدى. 11300 باس انالىق مال تۇقىمدىق تۇرلەندىرۋ جوباسىنا قاتىستىرىلۋدا، بۇل - بارلىق مالدىڭ 83 پايىزى. اۋدان مال تۇقىمىن اسىلداندىرۋ باعىتىندا وبلىستا ءبىرىنشى بولىپ اۋىلدىق تۇتىنۋ كووپەراتيۆىن قۇردى.

بيىل اۋدان ورتالىعىندا «قپو ب.ۆ.» كومپانياسىنىڭ قارجىسى ەسەبىنەن 290 ورىندىق بالاباقشا پايدالانۋعا بەرىلىپ، بۇلدىرشىندەردى مەكتەپكە دەيىنگى تاربيەمەن قامتۋ ماسەلەسى شەشىمىن تاپتى. 2020 جىلعا دەيىنگى وڭىرلەردى دامىتۋ باعدارلاماسىنا سايكەس بيىل اقوبا، بورسى اۋىلدارىندا سپورت الاڭدارى سالىنباقشى.

«ءبىزدىڭ باستى ماسەلەمىز - جول. رەسەي فەدەراسياسىنىڭ ۆولگوگراد جانە ساراتوۆ وبلىسىمەن شەكتەسەتىن اۋدان ءۇشىن  تاقتايداي تەگىس جول سالىنسا، ەكى جاقتى ءتيىمدى قارىم-قاتىناسقا دا وتە قولايلى بولار ەدى. قازىرگى كەزدە ورال-چاپايەۆ-قازتالوۆ باعىتىندا سالىنىپ جاتقان جول جالپاقتال اۋىلىنا جاقىنداپ قالدى. بولاشاقتا قاتقىل تاباندى جول جانىبەكتى قازتالوۆ، جالپاقتال ارقىلى ورالمەن جالعاستىرسا، مۇنىڭ حالىقارالىق ءمان-ماڭىزى دا ارتا تۇسەر ەدى»، دەدى م.مۇقايەۆ ءسوزىنىڭ سوڭىندا.