اتىراۋدا قازاقستان تاريحىنداعى قازاق حاندىعىنىڭ ماڭىزىنا ارنالعان حالىقارالىق عىلىمي-پراكتيكالىق كونفەرەنسيا ءوتتى. كونفەرەنسياعا قازاقستاننىڭ جانە كوپتەگەن شەت ەلدەردىڭ عالىمدارى، قوعام قايراتكەرلەرى، ەلىمىزدە جۇمىس ىستەيتىن ديپلوماتيالىق ميسسيالاردىڭ وكىلدەرى قاتىستى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

«اتىراۋ وبلىسى ەكونوميكالىق ماڭىزدىلىعىمەن قاتار، تۇركى جانە قازاق تاريحىنا قاتىستى مادەني مۇرالارعا دا باي. ماسەلەن، اتىراۋ قالاسىنان 30 شاقىرىم جەردە ورنالاسقان سارايشىق ۇلى جىبەك جولىنداعى ماڭىزدى ساۋدا جانە مادەنيەت ورتالىعى بولعان»، - دەدى وبلىس اكىمى باقتىقوجا ىزمۇحامبەتوۆ كونفەرەنسيا قاتىسۋشىلارىنا قۇتتىقتىقتاۋ سوزىندە.

قازاق حاندىعىنىڭ 550 جىلدىعىنىڭ ماڭىزى جونىندە شەتەلدىك قوناقتار دا اڭگىمە قوزعادى.

 «وتكەننىڭ قۋانىشتارى مەن قايعىسىنان ساباق الامىز. بۇل - ءبىزدىڭ وتكەن تاريحىمىز. قازاقستاندىقتاردىڭ بۇل ماڭىزدى اتاۋلى كۇندى اۋقىمدى وتكىزىپ جاتقانىنا ريزاشىلىعىمدى بىلدىرەمىن. وتكەندى ەسكە الا وتىرىپ، ءبىز بولاشاق تۋرالى ويلانامىز. مەنىڭ پىكىرىمشە، باستىسى - سىزدەردىڭ ەلدەرىڭىزدە ۇلكەن ادامي رەسۋرستار بار. بۇگىنگى قازاقستان - ەۋرازيالىق قۇرلىقتاعى ۇلكەن اۋماق، ونىمەن ىنتىماقتاسۋ عانيبەت»، - دەدى يندونەزيا رەسپۋبليكاسىنىڭ قر-داعى توتەنشە جانە وكىلەتتى ەلشىسى فوستەر گۋلت.

شۆەسيانىڭ قر-داعى توتەنشە جانە وكىلەتتى ەلشىسى حريستيان كاميلل ءوز سوزىندە قازاق حاندىعى نەگىزىن قالاۋى شۆەد مەملەكەتىنىڭ قۇرىلۋىمەن شامالاس، دەپ اتاپ ءوتتى. اڭگىمە كۇشتى ادامدار مەن بيلەۋىشىلەر جونىندە بولىپ وتىر. ولار ەل باسقارۋدى شەبەر مەڭگەرە وتىرىپ، ءوز حالقىنىڭ قۇقىعى مەن ەركىندىگىن كەڭەيتۋگە تىرىستى.

دەلي ۋنيۆەرسيتەتىنىڭ پروفەسسورى ينديرا گاندي اتىنداعى ۇلتتىق ونەر ورتالىعىنىڭ وكىلى مانسۋر حايداردىڭ پىكىرىنشە، قازاقتار قولا عاسىرى داۋىرىندە پايدا بولعان.

ال رەسەي عىلىم اكادەمياسىنىڭ رەسەي تاريحى ينستيتۋتىنىڭ پروفەسسورى ءنايلا بەكماحانوۆا عالىمدار ە.بەكماحانوۆ پەن م.ۆياتكيننىڭ ەڭبەكتەرىندەگى قازاق حاندىعى تاريحى تۋرالى اڭگىمەلەدى.

 «قازاقستان تاريحى - بىرەگەي، قۋاتتى. ەۋرازيا كەڭىستىگىندەگى ۇلى دالانىڭ تاريحى وتىرىقشى ەلدەردىڭ تاريحىنان وزگەشە. ۇلى دالانى باسقارۋدىڭ وزىندىك وركەنيەتىن جاساعان قازاق حاندىعىنىڭ،  پەتروگليفتەر ارقىلى ۇلى دالانىڭ قايتالانباس كىتاپحاناسىن بەدەرلەپ كەتكەن قازاق تاريحىنىڭ تاعىلىمى زور»، - دەدى ءپاريجدىڭ شىعىس تىلدەرى جانە وركەنيەتتەرى ۇلتتىق ينستيتۋتىنىڭ پروفەسسورى كاترين پۋجول.