اقمولا وبلىسىندا حالىقارالىق تۋريزم كۇنىنە ارنالعان وبلىستىق «كۇزگى جاپىراقتىڭ ءتۇسۋى» تۋريستىك سلەتى مارەسىنە جەتتى.
بۇل تۋرالى قامشى پورتالى «اقمولا مەديا ورتالىعىنا» سىلتەمە جاساي وتىرىپ حابارلايدى.
زەرەندى اۋدانىنىڭ سادوۆوە اۋىلىنداعى «وبلىستىق بالالار مەن جاسوسپىرىمدەر ءتۋريزمى، ولكەتانۋ جانە ەكولوگيا ورتالىعى» مەملەكەتتىك مەكەمەسىنىڭ اۋماعىندا وتكەن جارىسقا اتباسار، اقكول، بۋراباي، ەسىل، جاقسى، بۇلاندى، زەرەندى، ساندىقتاۋ اۋداندارىنان، كوكشەتاۋ قالاسى جانە سولتۇستىك قازاقستان وبلىستارىنان كەلگەن بارلىعى 18 كوماندا قاتىستى.
«قاتارىنان ءۇش كۇن بويى وتكەن شارانىڭ ماقساتى - وڭىردە ءتۋريزمدى ناسيحاتتاپ، وسى باعىتتا تاجىريبە الماسۋ، سونداي-اق وسىنداي رەسپۋبليكالىق جارىستارعا قاتىساتىن تۋريستىك كوپسايىستان وبلىستىڭ مىقتى كوماندالارىن انىقتاۋ بولىپ تابىلادى»، - دەيدى ۇيىمداستىرۋشىلار.
جارىس قورىتىندىسىنا ساي، 1998 جىلى تۋىلعاندار جانە ودان جوعارى توپتاعىلار اراسىندا 1 ورىندى سولتۇستىك قازاقستان وبلىسىنان كەلگەن پەتروپاۆل قالاسىنىڭ كومانداسىنا بۇيىرسا، جۇلدەلى 2 ورىنعا وبلىستىق بالالار مەن جاسوسپىرىمدەر ءتۋريزمى، ولكەتانۋ جانە ەكولوگيا ورتالىعىنىڭ «فيرن» كومانداسى لايىق دەپ تانىلدى. ال، 3 ورىندى بۋراباي اۋدانىنىڭ تۋريزم جانە سەرۆيس يندۋسترياسى كوللەدجى كومانداسى مىسە تۇتتى.
سونىمەن قاتار 1998 -2001 جىلعى تۋىلعاندار اراسىنداعى توپتا 1 ورىنعا ساندىقتاۋ اۋدانىنىڭ كومانداسى كوتەرىلسە، 2 ورىن سولتۇستىك قازاقستان وبلىسىنان كەلگەن پەتروپاۆل، ال 3 ورىن ششۋچەدەگى «ارمان» تجو كوماندالارىنا بۇيىردى.
ال، سوڭعى 2002-2004 جىلى تۋىلعاندار توبىندا 1 ورىندى وبلىستىق بالالار مەن جاسوسپىرىمدەر ءتۋريزمى، ولكەتانۋ جانە ەكولوگيا ورتالىعىنىڭ كومانداسى جەڭىپ الدى ، ەكىنشى جانە ءۇشىنشى ورىنداردى پەتروپاۆل جانە كوكشەتاۋ قالالارىنىڭ كوماندالارى ءوزارا ءبولىستى.
جارىس سوڭىندا جەڭىمپاز كوماندالاردىڭ بارلىعىنا باعالى سىيلىقتار مەن ماراپاتتار تاپسىرىلدى. جەڭىمپازدار رەسپۋبليكالىق جارىستا اقمولا وبلىسىنىڭ نامىسىن قورعايتىن بولادى.
