الماتى قالاسىندا 2015 جىلدىڭ قاراشا ايىندا 2017 جىلعى قىسقى ۋنيۆەرسيادا ويىندارىنا قاتىستى قوعامدىق كەڭەس قۇرىلاتىن بولادى. بۇل تۋرالى بۇگىن «الماتى قالاسىنىڭ حالىقارالىق سپورت جوبالارى ديرەكسياسى» مەملەكەتتىك قورىنىڭ باسپا ءسوز قىزمەتىنەن حابارلادى. 

«2015 جىلدىڭ قاراشا ايىندا «الماتى قالاسىنىڭ حالىقارالىق سپورت جوبالارى ديرەكسياسى» مەملەكەتتىك قورى 2017 جىلى بولاتىن قىسقى ۋنيۆەرسيادا ويىندارىنا دايىندالۋ جانە ونى وتكىزۋ بويىنشا قوعامدىق كەڭەس قۇرادى»، - دەلىنگەن حابارلامادا. 
بۇل ۇيىمنىڭ الدىنا قوعاممەن ءوزارا ارەكەتتەسۋ، بەلسەندى ازاماتتاردىڭ باستامالارىن قاراۋ، سونداي-اق جوبانىڭ قۇرىلىمى مەن دايىندىق بارىسى تۋرالى ازاماتتار الدىندا ەسەپ بەرۋ مىندەتى قويىلادى. 

«ۋنيۆەرسيادا سەكىلدى ءىرى جوبالاردا قوعامدىق كەڭەس كەرەك. ولاردىڭ قۇرامىنا بەلسەندى ازاماتتىق ۇستانىمى بار تۇرعىندار، جاس بلوگگەرلەر، جاستار ۇيىمدارىنىڭ وكىلدەرى، سپورت ارداگەرلەرى جانە باسقا دا ازاماتتاردى ەنگىزۋگە بولادى. ءبىرىنشى كەزەكتە، ءبىز وسىنداي قوعامدىق توپتىڭ ارقاسىندا اقپارات جانە پىكىر الماسا الامىز ال قوعامدىق بەلسەندى ازاماتتار ءوز ۇسىنىستارىن ەنگىزەتىن بولادى»، - دەپ ءتۇسىندىردى يليا ورازاقوۆ. 

ودان باسقا، مۇنداي كەڭەس وسىنداي ءىرى جوباعا دايىندىق ۇدەرىسىنىڭ قارجىلىق اشىقتىعىن قوعامعا پاش ەتە وتىرىپ، مەملەكەتتىك ورگاندار مەن حالىق اراسىنداعى بايلانىستى نىعايتا تۇسپەك. قوعامدىق كەڭەستىڭ قۇرامىندا كەم دەگەندە 15 ادام بولادى. يليا ورازاقوۆتىڭ پىكىرىنشە، ونىڭ مۇشەلەرى سپورت سالاسىن جاقسى بىلۋلەرى ءتيىس جانە مۇنداي جوبالاردىڭ قالاي جۇزەگە اساتىندىعىن تۇسىنە وتىرىپ، ورىندى ۇسىنىستاردى ورتاعا سالۋلارى كەرەك. 

ۇمىتكەرلەرگە داۋىس بەرۋ شاراسى الداعى قازان ايىندا almaty2017.com سايتىندا جۇرگىزىلەدى. ءاربىر ازامات ءوزىن نەمەسە باسقا ازاماتتى ۇسىنا الادى. 

«كوپ داۋىسقا يە بولعان ادام، قوعامدىق كەڭەستىڭ قۇرامىنا ەنەدى»، - دەدى ي. ورازاقوۆ. ايتا كەتەلىك، كەڭەس مۇشەلەرىنىڭ ۋنيۆەرسياداعا دايىندىق جۇمىستارىنا قاتىستى شەشىم قابىلداۋ جۇمىستارىنا تىكەلەي قاتىسۋعا، ديرەكسيا تاراپىنان قاجەتتى قۇجاتتارعا قول جەتكىزۋگە جانە جوبانىڭ شىعىندارىنا قاتىستى تولىق ەسەپ الۋعا مۇمكىندىك الادى.