جاھاندىق باسەكەگە قابىلەتتى ەلدەردىڭ رەيتينگىندە قازاقستان رەسەيدىڭ الدىنا شىقتى دەپ حابارلايدى Tengrinews.kz دۇنيەجۇزىلىك ەكونوميكالىق فورۋمعا (دەف) سىلتەمە جاساپ. اتالعان تىزىمدە قازاقستان 4،5 بالمەن 42ء-شى ورىنعا جايعاسسا، رەسەي 45ء-شى ساتىدا. ءبىزدىڭ ەل وتكەن جىلمەن سالىستىرعاندا سەگىز ساتىعا جوعارىلاعان. بۇل تۋرالى قامشى پورتالى Baq.kz –كە سىلتەمە جاساي وتىرىپ حابارلايدى.

بيىل قازاقستان باسەكەگە قابىلەتتىلىگى جاعىنان يتاليا مەن پولشانىڭ اراسىندا. ەلىمىز رەسەي، لاتۆيا، فيليپپين جانە تۇركيا سىندى مەملەكەتتەردى ارتتا قالدىردى. ال، ءتىزىمنىڭ ءبىرىنشى ورنىن وسىمەن جەتىنشى جىل قاتارىنان شۆەيساريا ەشكىمگە بەرمەي كەلەدى. ەكىنشى ورىندا - سينگاپۋر، ۇزدىك ۇشتىكتى اقش قورىتىندىلاعان. گەرمانيا بولسا بەسىنشى ورىننان تورتىنشىگە جوعارىلاسا، نيدەرلاندى سەگىزدەن بەسىنشى ورىنعا ءبىر-اق سەكىردى.

دەف ازىرلەگەن باسەكەگە قابىلەتتى ەلدەر رەيتينگىنىڭ العاشقى وندىعىندا جاپونيا، گونكونگ، فينليانديا، شۆەسيا جانە ۇلىبريتانيا بار. جۇڭگو بولسا بۇل ءتىزىمنىڭ 28ء-شى ساتىسىندا.

ەستەرىڭىزگە سالايىق، 2013 جانە 2014 جىلدارى قازاقستان باسەكەگە قابىلەتتى ەلدەر اراسىندا 50 ورىننان كورىنگەن بولاتىن. سەگىز ساتىعا جوعارىلاۋىمىزعا ەلىمىزدەگى جەكەمەنشىك سەكتوردىڭ دامۋى، جاڭا جۇمىس ورىندارىنىڭ اشىلۋى، نارىقتاعى باسەكەلەستىك ساياساتىنىڭ دامۋى سەكىلدى بىرنەشە فاكتور سەبەپ بولعان.