كەشە، 29 قىركۇيەكتە قىزىلوردادا ەڭبەك كۇنىنە وراي "اتا كاسىپ-التىن مۇرا" اتتى ەكىنشى ەڭبەكشىلەر فورۋمى ءوتتى. بۇل تۋرالى قامشى پورتالى today.kz-كە سىلتەمە جاساي وتىرىپ حابارلايدى.

اتالعان فورۋمعا ەڭبەك ساباقتاس­تىعىن جالعاستىرۋشى دارىگەرلەر اۋلەتىنىڭ وكىلدەرى، ءبىلىم بەرۋ سالاسىنىڭ مايتالماندارى، 600-دەن استام ەڭبەك ءوتىلى بار تەمىرجولشىلار اۋلەتتەرى، اۋىل شارۋاشىلىعى سالاسىندا جەمىستى ەڭبەك ەتىپ جۇرگەن بارلىعى 12 ەڭبەكشىلەر اۋلەتى قاتىسىپ، قىزىلوردا وبلىسى اكىمىنىڭ العىس حاتىمەن ماراپاتتالدى.

بيىلعى جىلدىڭ ەرەكشەلىگى - فورۋمعا سىر ەلىنىڭ ماقتانىشتارى - بالىقشىلار اۋلەتى، اتا بابامىزدىڭ كاسىبىن جالعاستىرۋشى مالشىلار اۋلەتى، رۋحاني قۇندىلىقتى ناسيحاتتاۋشى كىتاپحاناشىلار اۋلەتى قاتىستى. ولاردىڭ ىشىندە تەمىر جول سالاسى بويىنشا 744 جىل ەڭبەك ءوتىلى بار بايساعۇلوۆتار اۋلەتى، 600 جىلعا جۋىق تەمىر جول سالاسىندا ايانباي ەڭبەك ەتىپ كەلگەن جالاعاشتىق بادراقوۆتار اۋلەتى دە بار. سونداي-اق، قارماقشىلىق جۇماتايەۆتار اۋلەتىندە 18 ادام ءبىلىم سالاسىندا جەمىستى ەڭبەك ەتۋدە. ولاردىڭ جالپى ەڭبەك ءوتىلى 530 جىلدى قۇرايدى.

سالتاناتتى شارادا وبلىس اكىمى قىرىمبەك كوشەربايەۆ قاراپايىم ەڭبەك ادامىن قۇرمەتتەۋدىڭ ماڭىزىنا توقتالىپ، جيىلعانداردى ەڭبەك كۇنى مەرەكەسىمەن قۇتتىقتادى.

- وسىنداي ءوز كاسىبىن اتادان بالاعا ميراس ەتە بىلگەن، ءبىر سالانىڭ دامۋىنا وتباسى بولىپ ۇلەس قوسىپ جۇرگەن ازاماتتاردى ماداقتاپ، ماراپاتتاپ، كوپشىلىككە ۇلگى قىلۋىمىز قاجەت. بۇل جاستاردىڭ بولاشاقتا ماماندىق تاڭداۋىنا دا، ءوز ىسىنە قۇرمەتپەن قاراۋىنا دا زور ۇلەس قوسارى ءسوزسىز. بولاشاقتا وسى اۋلەتتەردىڭ قاتارىنا جاڭا ماماندىق يەگەرلەرى، باعدارلاماشىلار، سوت سالاسىنىڭ وكىلدەرى، قۇرىلىسشىلار، مۇنايشىلار قوسىلادى دەگەن ويدامىن. ءسىز بەن ءبىزدىڭ ەڭبەگىمىز ەلىمىزدىڭ باسەكەگە قابىلەتتى 30 ەلدىڭ قاتارىنا ەنۋىن قامتاماسىز ەتۋگە قوسقان ۇلەس بولۋى كەرەك، - دەدى ايماق باسشىسى.

ەڭبەكشىلەر اۋلەتىنىڭ وكىلدەرى دە وزدەرىنە كورسەتىلگەن قۇرمەتكە ريزاشىلىقتارىن ءبىلدىردى.

- ءبىزدىڭ اۋلەتىمىزدە دەنساۋلىق ساقتاۋ سالاسىندا 19 جان ەڭبەك ەتۋدە، سونداي-اق 2 ستۋدەنت بولاشاق دارىگەر اتانباق. قازىرگى كۇنى وبلىستا دەنساۋلىق ساقتاۋ سالاسىن دامىتۋ ماقساتىندا ءبىراز جۇمىستار اتقارىلۋدا. بيىل 4 ەمحانا پايدالانۋعا بەرىلسە، الداعى ۋاقىتتا تاعى 2 ەمحانانىڭ قۇرىلىسى اياقتالماق، - دەگەن دارىگەر شىنتاس زەتوۆ ايانباي ەڭبەك ەتۋ ءۇشىن بارلىق جاعداي جاسالىپ وتىرعاندىعىن جەتكىزدى.

فورۋم جەرگىلىكتى ونەرپازداردىڭ ان-شاشۋىمەن قورىتىندىلاندى.