قىتايلىق كومپانيالار قازاقستانداعى مۇنايدىڭ 25 پايىزىن وندىرەدى. بۇل تۋرالى بۇگىن استاناداعى «KAZENERGY-2015» ح ەۋرازيالىق فورۋم اياسىنداعى باسپا ءسوز ءماسليحاتىندا «KAZENERGY» قاۋىمداستىعىنىڭ ءتوراعاسى تيمۋر قۇلىبايەۆ ءمالىم ەتتى. بۇل تۋرالى قامشى پورتالى BAQ.kz -كە سىلتەمە جاساي وتىرىپ حابارلايدى.

«قىتايلىق كومپانيالار قازاقستان مۇناي سەكتورىندا ەڭ بەلسەندىلەردىڭ ءبىرى، ياعني ولار ەلىمىزدە مۇنايدىڭ 25 پايىزدان استامىن وندىرۋدە. قازىرگى كەزدە نارىققا قىتايلىق SINOPEC GROUP اتتى جاڭا كومپانيا كەلدى. ولار قازاقستانداعى لۋكويلدىڭ اكتيۆتەرىن ساتىپ الدى»، - دەدى ت. قۇلىبايەۆ.

ونىڭ سوزىنە قاراعاندا، قىتايعا قاراي قۇبىرلاردىڭ قۋاتتىلىعى 12 ملن. توننانى قۇراپ وتىر.

«جالپى، قىتايعا قاراي ءبىزدىڭ قۇبىرلاردىڭ وتكىزگىشتىك قابىلەتتىلىگىن 20 ملن. تونناعا دەيىن كەڭەيتۋگە بولادى دەگەن تۇسىنىك بار. بۇل ەل ءبىز ءۇشىن اۋقىمدى نارىق بولىپ تابىلادى. ەكىنشى جاعىنان الىپ قاراعاندا، بۇل باعىتتاعى نارىق وتە كەڭ، ويتكەنى، سىرتتان جەتكىزىلەتىن ەنەرگيا كوزدەرىنە تاۋەلدى. سوندىقتان دا ولار وزدەرىنىڭ قاۋىپسىزدىگى مەن نارىقتارىنىڭ قاجەتتىلىگى تۇرعىسىندا كومىرسۋتەكتەردى جەتكىزۋ بويىنشا قازاقستانمەن ىنتىماقتاستىقتى بەلسەندى دامىتۋدا»، - دەدى ت. قۇلىبايەۆ.

وسى ورايدا ول قازاقستان دا كومىرسۋتەكتەردى اتالعان ەلگە ەكسپورتتاۋدا قىزىعۋشىلىق تانىتىپ وتىرعاندىعىن اتاپ ءوتتى. سەبەبى، كورشىلەس وزبەكستان، ازەربايجان، تۇركمەنستان، رەسەي، يران مەملەكەتتەرى دە مۇناي نەمەسە گاز وندىرەتىن ەلدەر بولعاندىقتان، قازاقستان وسى ەلدەرگە ءوز ءونىمىن شىعارا المايدى.