قازاقستان پرەزيدەنتى  بۇل ساپارى بۇۇ باس حاتشىسى پان گي مۋننىڭ شاقىرۋىمەن مەرەيتويلىق سەسسياعا قاتىسۋ ءۇشىن جاسالعانىن اتاپ ءوتتى. بۇل تۋرالى قامشى پورتالى akorda.kz-كە سىلتەمە جاساي وتىرىپ حابارلايدى.

مەن باس اسسامبلەيانىڭ جالپى دەباتىندا ەلىمىزدىڭ جاھاندىق ساياسي جانە ەكونوميكالىق ماسەلەلەرگە قاتىستى كوزقاراسىن ورتاعا سالدىم. سونىمەن قاتار تاعى ەكى سامميتكە – 2015 جىلدان كەيىنگى دامۋ كەزەڭىنىڭ كۇن ءتارتىبىن قابىلداۋ جونىندەگى جانە زورلىق-زومبىلىق سيپاتىنداعى ەكسترەميزمگە قارسى كۇرەس جونىندەگى ساميتتەرگە قاتىستىم. سونداي-اق ءبىرقاتار مەملەكەتتەر مەن ۇكىمەتتەردىڭ باسشىلارىمەن كەزدەسۋدىڭ مۇمكىندىگى تۋدى. مۇنىڭ ءبارى قازاقستان ءۇشىن ماڭىزدى، ەلىمىزدىڭ پىكىرىن جاھاندىق قوعامداستىق ەستىدى، – دەدى مەملەكەت باسشىسى.

نۇرسۇلتان نازاربايەۆ ءوزى كوتەرگەن نەگىزگى ماسەلەلەرگە دە توقتالدى.

ءبىرىنشى كەزەكتە، مەن بۇۇ ەكونوميكالىق جانە الەۋمەتتىك كەڭەستەرىن جاھاندىق دامۋ كەڭەسىنە اينالدىرۋدى ۇسىندىم. كەلەسى ماسەلە – يادرولىق قارۋدى تاراتپاۋ. قازاقستان بۇل باعىتتا جەتەكشى ءارى بەلسەندى ءرول اتقارادى. بۇل رەتتە الەم قوعامداستىعىنىڭ قاتىسۋىمەن ىلگەرى جىلجۋ كەرەك، ادامزات ءححى عاسىردا جاپپاي قىرىپ-جويۋ قارۋىنان باس تارتۋى ءتيىس. ەكسترەميزمگە قارسى ءىس-قيمىلعا كەلسەك، ونى ءبىزدىڭ ەل دە سەزىنىپ وتىر، وسىنداي كەيبىر توپتاردىڭ قاتارىندا قازاقستاننان تارتىلعان جاستار دا بار. جالپى، 2001 جىلعى 11 قىركۇيەكتەن كەيىن بولعان بىرلىكتىڭ ماڭىزدىلىعى اتاپ ءوتىلدى. مەن سونداي-اق تيىسىنشە قولداۋ بولاتىنىنا ۇمىتتەنە وتىرىپ، قاتىسۋشىلاردىڭ نازارىن ارال تەڭىزىنىڭ، سەمەي پوليگونىنىڭ پروبلەمالارىنا اۋداردىم، – دەدى قازاقستان پرەزيدەنتى.

مەملەكەت باسشىسىنىڭ ايتۋىنشا، ادامزات 2045 جىلعا قاراي بارلىق نەگىزگى ماسەلەلەردى، اسىرەسە قاقتىعىس وشاقتارىنداعى پروبلەمالاردى شەشۋى ءتيىس.

جەر بەتىندەگى كەدەيشىلىك دەڭگەيى وتە جوعارى، ميللياردقا تارتا حالىق تويا تاماق ىشپەيدى، ميلليونداعان ادام ساۋاتسىز، بالالار اراسىنداعى ءولىم-جىتىم جىل سايىن 40 ميلليوندى قۇرايدى. باي ەلدەر كەدەيلەرگە كومەكتەسۋى ءتيىس. وسىعان بايلانىستى مەن بارلىق مەملەكەتتەردىڭ اسكەري شىعىستارىنىڭ 1 پايىزىن مىڭجىلدىق ماقساتتارىن جۇزەگە اسىرۋ ىسىنە ءبولۋدى ۇسىندىم، بۇل زور كومەك بولار ەدى. ءبىزدىڭ ەلىمىز كوتەرگەن بارلىق ماسەلەلەر ءتيىستى قولداۋ تاپتى دەپ ەسەپتەيمىن، – دەدى نۇرسۇلتان نازاربايەۆ.

مەملەكەت باسشىسى بۇۇ شتاب-پاتەرىن ورنالاستىراتىن ورىن تاعى ءبىر تاقىرىپ رەتىندە قوزعالعانىن ايتتى.

1945 جىلى ۇيىمدى نيۋ-يورككە كوشىرۋ تۋرالى شەشىم قابىلداندى. سودان بەرى 70 جىل ءوتتى، الەم وزگەردى. بۇگىندە ازيانىڭ قارقىندى دامۋى بايقالىپ وتىر. سوندىقتان بۇۇ قىزمەتىن جاڭارتۋ جانە جانداندىرۋ ماقساتىندا ونىڭ شتاب-پاتەرىن ازيا قۇرلىعىنا كوشىرۋ تۋرالى ۇسىنىس ايتتىم، – دەدى قازاقستان پرەزيدەنتى. 

نۇرسۇلتان نازاربايەۆ بۇۇ باس اسسامبلەياسىنىڭ مىنبەرىنەن ەلىمىزدىڭ مەملەكەتتىك تىلىندە العاش رەت ءسوز سويلەنگەنىنە توقتالدى.

مەنىڭ مەملەكەتتىك تىلدەگى ءسوزىم، ونىڭ ۇيىمداعى بارلىق رەسمي التى تىلگە ىلەسپە اۋدارىلۋى دا جاقسى نىشان بولدى، – دەدى مەملەكەت باسشىسى.

سونىمەن قاتار نۇرسۇلتان نازاربايەۆ اقش پرەزيدەنتى ب.وبامەن كەلىسسوزدەر بارىسىندا ەكىجاقتى ىنتىماقتاستىقتى دامىتۋ ماسەلەلەرى تالقىلانعانىن ايتتى. اتاپ ايتقاندا، قازاقستانعا اقش مەملەكەتتىك حاتشىسى د.كەرريدىڭ كەلۋى جوسپارلانۋدا.

ب.وبامەن بارلىق جەتى جىل بويىندا وتكەن ديالوگ جەمىستى بولدى. اقش ءبىزدىڭ رەسپۋبليكامىزدىڭ دسۇ-عا كىرۋىنە اتسالىستى، بارلىق باستامالارىمىزدى ءاردايىم قولداپ كەلەدى. قازاقستاندا 500-گە جۋىق امەريكالىق كومپانيا جۇمىس ىستەيدى، اقش-تىڭ تىكەلەي ينۆەستيسيالارىنىڭ كولەمى 30 ميلليارد دوللاردىڭ شاماسىندا. مەن ءبىزدىڭ ەلىمىز ءوز تالپىنىستارى مەن ەكونوميكالىق باعدارلامالارى اقش تاراپىنان قولداۋ تابادى دەپ سەنەتىنىن اتاپ ءوتتىم، – دەدى مەملەكەت باسشىسى.

قازاقستان پرەزيدەنتى سونداي-اق رەسەي پرەزيدەنتى ۆ.پۋتين مەن اقش پرەزيدەنتى ب.وبامانىڭ كەزدەسۋىنە قاناعاتتانۋشىلىق ءبىلدىردى. بۇل كەزدەسۋ ەكى ەلدىڭ اراسىنداعى قارىم-قاتىناستاردى جولعا قويۋعا سەپتىگىن تيگىزەدى.

مەملەكەت باسشىسى امەريكا ىسكەر توپتارىنىڭ ءىرى وكىلدەرىمەن بولعان كەزدەسۋدىڭ ماڭىزدىلىعىن ايتتى.

 «بيزنەس كاپيتاندارى» اكتيۆتەرىنىڭ جيىنتىق قۇنى 10 تريلليون دوللاردى قۇرايدى. كەزدەسۋدى وتكىزگەن مودەراتور ايتقانداي، مەملەكەت باسشىلارى بۇعان دەيىن بيزنەسمەندەردىڭ وسىنشالىق كوپ قۇرامىمەن كەزدەسپەگەن. كەزدەسۋ بارىسىندا ەلىمىزدە جۇزەگە اسىرىلىپ جاتقان جوبالار تۋرالى ايتىپ، ولاردى «نۇرلى جول»، ءۇييدب سياقتى باعدارلامالارعا قاتىسۋعا شاقىرۋعا مۇمكىندىك تۋدى. مەن سونداي-اق ەۋرازيالىق ەكونوميكالىق وداقتىڭ، ەۋروپالىق وداقتىڭ جانە جىبەك جولى ەكونوميكالىق بەلدەۋىنىڭ كۇش-جىگەرىن بىرىكتىرۋ بۇكىل ەۋرازيانىڭ ەكونوميكالىق دامۋى ءۇشىن پايدالى بولاتىنىنا دا نازار اۋداردىم، – دەدى قازاقستان پرەزيدەنتى.