«قازاقستان-2050» ستراتەگياسى مەن ۇلت جوسپارىندا مەملەكەتىمىزدىڭ باستى بايلىعى ادامدار جانە ولاردىڭ دەنساۋلىعى ەكەندىگى كورسەتىلگەن. تالاس جوق، تەك دەنى ساۋ ۇلت قانا ءوزىنىڭ الدىنا قويعان ماقساتتارىن ويداعىداي ورىنداپ شىعا الادى. ايتسە دە، قايتەرسىز كەيبىر فاكتورلاردىڭ اسەرىنەن تەمىردەي دەنساۋلىققا نۇقسان كەلەتىن جايتتار دە بولىپ تۇرادى. سونداي ادامداردىڭ ەلەۋءلى ءبىر بولىگىن رەسپۋبليكانىڭ باتىس وڭىرىندەگى ازعىر جانە كاپۋستين يار پوليگوندارىنان زارداپ شەككەندەر قۇرايتىنى دا قۇپيا ەمەس.
بۇل تۇرعىدا اتالعان سىناق الاڭدارىنىڭ تابيعات پەن قورشاعان ورتاعا جانە ادامدار دەنساۋلىعىنا تيگىزگەن زالالىن تابانى كۇرەكتەي 20 جىلعا جۋىق ۋاقىت بويى باقىلاپ، زەرتتەپ كەلگەن «نارىن» قوعامدىق قوزعالىسىنىڭ جەتەكشىسى كاكەن كوبەيءسىنوۆتىڭ العا تارتقان دەرەكتەرىنە سۇيەنگىمىز كەلەدى. ول كىسىنىڭ مالىمدەۋىنشە، بۇگىنگى كۇنگە دەيىن پوليگوندار ماڭايىنداعى جيىرما مىڭ ادام ءارتۇرلى سوزىلمالى اۋرۋلارعا دۋشار بولعان. 2500 بالا كەمتار كۇيىندە تۋىلعان. ءۇش مىڭعا تارتا ادام مۇگەدەكتىككە شالدىققان.
بۇل دەرەكتەردىڭ قاي-قايسىسى دا ويلاندىرماي، تولعاندىرماي قويمايدى. ءسىرا، مۇنداي جاعدايدا تەك ءبىر عانا ويلانىپ، تولعانۋمەن ءىس بىتپەسە كەرەك. وسى تۇرعىدا بۇدان التى جىل بۇرىن رەسپۋبليكانىڭ باتىس وڭىرىندە وڭالتۋ ورتالىعى سالىنىپ پايدالانۋعا بەرىلۋى سول كەزەڭنىڭ باستى ءبىر جاڭالىعى بولعانى تالاسسىز. ءارى سول ءبىر جىلداردا جەرگىلىكتى جەردەن كوتەرىلگەن ءۇنقوسۋلار مەن سۇرانىستارعا جانە قوعامدىق وي-پىكىرلەرگە قولداۋ كورسەتە بىلگەن ەلباسىنىڭ تيگىزگەن شاپاعاتى دا ۇمىتىلا قويعان جوق.
سونىڭ ناتيجەسىندە كاپۋستين يار جانە ازعىر پوليگوندارىنان زارداپ شەككەن تۇرعىنداردى ساۋىقتىرۋ باعىتىندا ءجۇز ورىندىق وڭالتۋ ورتالىعى بوي كوتەردى. وسى تەكتەس ساۋىقتىرۋ قۇرىلىمىنىڭ ەلىمىزدە ەشقانداي بالاماسى جوق ەكەنىن دە ايتا كەتكەن ءجون. ءارى ءۇش قاباتتى ءزاۋلىم عيماراتتى بەلگىلى ءبىر وبلىس ورتالىعىندا نەمەسە ەلورداسى – استانادا ەمەس، پوليگون زارداپتارى نەعۇرلىم كوبىرەك بايقالاتىن ايماقتىڭ ءبىرى – جاڭاقالا جەرىندە سالىنۋى دا ادىلەتتىلىككە ءبىرشاما جاقىندايدى. حالىقتىق ۇعىم-تۇسىنىك پەن بەيرەسمي تۇردە قامىس-سامار ەلى اتانىپ كەتكەن بۇل مەكەنگە اتالعان پوليگوندار ايماعىنا بوكەي وردا، جانىبەك جانە كازتالوۆ اۋداندارى دا قاشىق ەمەس. سونىمەن بىرگە، اۋىلى ارالاس، قويى قورالاس ىرگەدەگى اتىراۋ وبلىسىنا قاتىستى دا وسىلاي دەۋگە بولادى. ياعني، بۇل ارادا اتالعان وڭالتۋ ورتالىعىنىڭ وبلىسارالىق ماڭىزى بار دەسەك قاتەلەسپەيمىز.
– بۇگىندە ورتالىقتا مەديسينالىق، پسيحولوگيالىق جانە الەۋمەتتىك تۇرعىدان جوعارى مەملەكەتتىك ستاندارتتارعا ساي كەشەندى كومەك كورسەتىلۋدە. مۇندا وڭالتۋدىڭ بارلىق تەحنولوگياسى مەن ادىستەرى ەنگىزىلگەن. جوعارى ساپالى ەمگە قوسا ءبىزدىڭ ءاربىر قىزمەتكەرىمىزدىڭ اشىق قاباعى مەن ءىلتيپاتى جانە جىلى جۇرەگى ەمدەلۋشىلەردىڭ تەزىرەك ساۋىعىپ كەتۋىنە وڭ اسەرىن تيگىزۋدە، – دەيدى ورتالىق ديرەكتورى قوبىلاندى بەكەنوۆ.
ءبىز جوعارىدا راكەتالىق پوليگونداردان كوبىرەك زارداپ شەككەن جانە ونىڭ ماڭايىندا ورنالاسقان اۋدانداردى اتاعان ەدىك. بۇعان قوسارىمىز باتىس قازاقستان وبلىستىق دەنساۋلىق ساقتاۋ باسقارماسى مەن وڭىردەگى الەۋمەتتىك جانە مەديسينالىق كومەك كورسەتۋ ۇيىمدارى دەپارتامەنتتەرىنىڭ جەتەكشىلەرى وسى شالعاي وڭىرلەرگە ءجيى اتباسىن بۇرىپ قوعامدىق تىڭداۋلار وتكىزۋدى تاجىريبە مەن داستۇرگە اينالدىرعانى دا اتاپ ايتۋعا تۇرارلىقتاي.
وسى كەزدەسۋلەردە دەنساۋلىقتى جاقسارتۋ مەن ساۋىقتىرۋعا قاتىستى ەل-جۇرتتى تولعاندىرىپ وتىران ماسەلەلەر ورتاعا تاستالادى. كەيىن وسى قوعامدىق تىڭداۋلار كەزىندە ايتىلعان ويلى پىكىرلەر مەن ۇسىنىستار قورىتىلىپ، ەلەنىپ، ەكشەلىپ سالا كوشباسشىلارى ۇستاناتىن باستى قاعيداعا اينالاتىنىنا دا كۋا بولىپ كەلەمىز.
تاعى ءبىر ايتارىمىز، ازعىر جانە كاپۋستين يار سىناق الاڭدارى ماڭايىندا دۇنيەگە كەلگەن دەنساۋلىعىندا اقاۋى بار بالالار مەن جەتكىنشەكتەر دە جازعى دەمالىس ۋاقىتىندا ورتالىقتا ەمدەۋ-ساۋىقتىرۋ كۋرسىنان وتە الادى. وسىلايشا ولاردىڭ جاڭا وقۋ جىلىنا ەم الىپ، دەم الىپ كىرىسۋىنە مول مۇمكىندىكتەر جاسالعان. ەڭ باستىسى، قاراپايىم تۇرعىندارعا قولجەتىمدى مەديسينالىق كومەك كورسەتۋ 115 ادامنان تۇراتىن ورتالىقتىڭ ۇيىمشىل ۇجىمىنىڭ باستى ماقساتى بولىپ قالا بەرمەك.
دەرەككوز: "ەگەمەن قازاقستان"
