تاراز قالاسىندا ءوتىپ جاتقان قازاق حاندىعىنىڭ 550 جىلدىق مەرەيتويىنىڭ ەڭ ءبىر ەستە قالارى - م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىىڭ قويلىمى بولدى. 8- قازان ساعات 19:00 دە تاراز قالاسىنىڭ ورتالىق ستاديونىندا جابال ەرعالييەۆتىڭ «قيلى جول» تاريحي دراماسى قويىلدى.  قازاق حاندىعىنىڭ قۇرىلۋ بارسىن بەينەلەگەن كورىنىسكە  اۋەزوۆ تەاترى مەن تاراز قالاسىنىڭ 500-دەن استام ءارتىسى قاتىستى. 200 اكتەر جاۋىنگەردىڭ رولىندە ويناپ، ساحنالىق شايقاستارعا جاۋاپتى بولسا، 150-دەن استام ادام بي كورىنىستەرىن جاسادى.

 وتە اسەرلى دە تارتىمدى سپەكتاكلدە جانىبەك پەن كەرەيدىڭ ءابىلحايىر حاننان ءبولىنىپ، ازاتتىق پەن بوستاندىقتى ارمان ەتكەن قالىڭ قازاقتى ارىتنان ەرتىپ موعولستان جەرىنە كەلۋى مەن ەسەنبۇعانىڭ بەرگەن جەرىنە كەرەيدى حان كوتەرىپ قازاق حاندىعىنىڭ قۇرىلۋ بارىس كوركەم بەينەلەنگەن. ەل كوڭىلىنەن شىققان بۇل جوبانىڭ جەتەكشىلەرى: كسرو حالىق ءارتىسى، تەاتردىڭ كوركەمدىك جەتەكشىسى ءاسانالى ءاشىموۆ،  ق ر ەڭبەك سىڭىرگەن قايراتكەرى، تەاتر ديرەكتورى ەرلان ءبىلالوۆ. رەجيسسەرى – ق ر ەڭبەك سىڭىرگەن قايراتكەرى اۋباكىر راحيموۆ ەكەن.

بۇل سپەكتاكل بارشا كورەرمەننىڭ كوز ايىمىنا اينالىپ، ىقىلاسىنا بولەنگەنى انىق. بارىمىزگە ۇلتتىق رۋح پەن جىگەر بەرە الاتىنداي وقيعا جەلىسى ارتىق – كەمسىز جاسالعان. اشىق اسپان استىندا ەل مەرەيىن اسقاقتاتقان م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىىڭ ۇجىمىنا العىستان باسقا ايتارىمىز جوق. وسى ورايدا جىل بويى باسىنان داۋ ارىلماعان «قازاق ەلى» ءفيلمى ەسكە تۇسەدى ەكەن. بۇل كورىنىستى رۋستەم ابدىرەشوۆتىڭ كورگەن كورمەگەنىن بىلمەيمىن. كورسە ءوزىنىڭ نە ىستەپ جۇرگەنىنە ۇيالعان بولار، كورمەسە ەرلان ءبىلالدان كينوسىن قالاي ءتۇسىرۋى تۋرالى اقىل سۇرايتىن شىعار.

تۇردىبەك قۇرمەتحان