«يسلامدىق مەملەكەت» ەكسترەميستىك توبى ءوز جاقتاستارىن رەسەي مەن اقش-قا قارسى «قاسيەتتى سوعىسقا» شاقىردى. بۇل تۋرالى «قامشى» پورتالى bbc.com-عا سىلتەمە جاساي وتىرىپ حابارلايدى.

يسلاميستەردىڭ وكىلى ماحامماد ادناني ينتەرنەتتە تارالىپ كەتكەن 40-مينۋتتىق اۋديوجازباسىندا  الەم بويىنشا بارلىق مۇسىلمانداردى ورىستار مەن امەريكاندىقتارعا قارسى سوعىسقا قاتىسۋىن سۇرانادى.

ءوز سوزىندە ول ورىس پراۆوسلاۆيەلىك شىركەۋ وكىلى ۆسيەۆولود ءچاپليننىڭ «رەسەيدىڭ سيرياداعى (تەرروريزمگە قارسى) ارەكەتى – قاسيەتتى سوعىس سانالادى» دەگەن ءسوزىن كەلتىرەدى.

ءادنانيدىڭ بۇل اۋديوجازباسى – رەسەيگە يم تاراپىنان توندىرىلگەن ءقاۋىپتىڭ ەڭ العاشقى رەسمي مالىمدەمەسى. ءوز سوزىندە ول يسلاميستەردىڭ باس ماقساتى اقش ەكەنىن مالىمدەدى. سونىمەن قاتار، امەريكاندىقتار قورقىنىش سەزگەندىكتەن اۆستراليا، تۇركيا، رەسەي، يران كومەگىنە جۇگىنىپ جاتقاندىعىن ايتىپ، ەسەسىنە ءيم-نىڭ كۇننەن كۇنگە كۇشەيىپ جاتقاندىعىمەن ماقتاندى. ايتا كەتەيىك، يسلاميستىك وكىل رەسەي مەن اقش-تىڭ اراسىندا شىن مانىندە سەرىكتەستىك بايلانىس بار دەپ سانايدى ەكەن. ونىڭ ويىنشا، ەكى مەملەكەت اراسىنداعى قازىرگى جاعداي كوزبوياۋشىلىقتىڭ ءبىر كورىنىسى عانا ەكەن. ءسوز سوڭىندا ول اقش-تىڭ ەرتەلى-كەش كۇيرەۋگە ۇشىرايتىنىن ايتتى.

سونىمەن قاتار، يسلاميستىك وكىل ابۋ مۋتاز ال-كۋرەيشيدىڭ ءولىمىن راستادى. قايتىس بولعان ازامات تامىزدا وتكەن امەريكاندىق شابۋىلدىڭ سالدارىنان قازا تاپقان فادحيل احماد حايالي، تاعى ءبىر اتى حادجي مۋتاز بولىپ شىعۋى ابدەن مۇمكىن دەگەن بولجام بار.

دەگەنمەن، ادناني ءوز سوزىندە يم كوشباسشىسى ابۋ باكر باگداديدىڭ جاراقاتتانۋىنا بايلانىستى ەشنارسە ايتپاپتى.

ءسوزىنىڭ باسىم بولىگى «يسلامدىق مەملەكەتكە» قارسى شابۋىل جۇرگىزىپ وتىرعان سيريالىق توپتارعا ارنالعان. ولاردىڭ يم-گە قارسى كۇرەسىن ول جەڭىلىسكە جاقىن ارەكەت دەپ سانايتىندىعىن ايتقان ەكەن.

ماحامماد ادناني ءوز سوزىندە ميگرانتتارعا دا توقتالعان. ول بوسقىندار بەت الىپ جاتقان ەۋروپانى «كاپىرلەر ەلى» دەپ اتاپ، يسلاميستەردىڭ سوعىس الاڭى «قاسيەتتى جيحاد جەرىنەن» قاشىپ جاتقاندارعا دا، ولاردى قابىلداپ جاتقاندارعا دا ابدەن كىنا تاققان. 

نازگۇل نازار