قىتايداعى ەتنيكالىق قازاقتاردىڭ سوتتىلىعى تۋرالى انىقتاما ماسەلەسى حالىقارالىق كەلىسىمشارتپەن شەشىمىن تابۋى ءتيىس. بۇگىن ءماجىلىستىڭ جالپى وتىرىسىندا دەپۋتات گۇلنار سەيتماعانبەتوۆا  وسى جايىندا ءمالىم ەتتى.  بۇل تۋرالى «قامشى» پورتالى «قازاقپاراتقا» سىلتەمە جاساي وتىرىپ حابارلايدى.ەسكە بولسا، جالپى وتىرىستا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا ماقۇلداعان بولاتىن.

«جالپى ورالماندار ماسەلەسىندە قىتايداعى قازاق قانداستارىمىزدىڭ كوتەرىپ جۇرگەن ەكى ماسەلەسى بويىنشا قوسىمشا اقپارات بەرگىم كەلەدى. ءبىرىنشى - شىققان مەملەكەتتىڭ كەلىسىمى بويىنشا (قازاقستانعا كەلگىسى كەلەتىن قىتايداعى ەتنيكالىق قازاقتار ءۇشىن اتالعان ماسەلە وزەكتى بولىپ تابىلادى-رەد.).  زاڭ جوباسىمەن جۇمىس بارىسىندا دەپۋتاتتاردىڭ بىرنەشە دۇركىن كوتەرگەن ماسەلەسىنىڭ نەگىزىندە بۇل انىقتاما ىشكى ىستەر مينيسترلىگىنىڭ 2015 جىلعى 7-ساۋىردەگى №315 قاۋلىسىمەن مەملەكەتتىك قىزمەت ستاندارتى تىزىمىنەن الىنىپ تاستالدى. ياعني، ول شەشىمىن تاپتى. ەكىنشىدەن، جۇمىس توبىنىڭ تاپسىرماسىمەن ىشكى ىستەر مينيسترلىگى قىتايدان قونىس اۋدارعان ەتنيكالىق قازاقتاردىڭ سوتتىلىعى تۋرالى انىقتاما الۋ جونىندەگى ماسەلەنى قىتايداعى قازاقستان ەلشىلىگى ارقىلى زەردەلەدى. ناتيجەسىندە وتەلمەگەن سوتتىلىعى بار ادامداردىڭ ەلدەن شىعۋىنا بايلانىستى ماسەلە تەرەڭ زەرتتەۋدى قاجەت ەتەتىنى انىقتالدى. مينيسترلىك الداعى ۋاقىتتا قازاقستانداعى جۇڭگو ەلشىلىگىمەن كەزدەسىپ، وسى ماسەلە بويىنشا جۇمىستى ودان ارى جالعاستىرۋى قاجەت»، - دەيدى ءماجىلىس دەپۋتاتى گۇلنار سەيتماعانبەتوۆا.

سونىمەن قاتار، دەپۋتات بۇل ماسەلەگە قاتىستى مىنانى ناقتى اتاپ ءوتتى: «بۇل ماسەلە زاڭ ارقىلى ەمەس، قازاقستان مەن جۇڭگو اراسىنداعى حالىقارالىق كەلىسىمشارتتار ارقىلى نەمەسە مەملەكەتتىك ورگانداردىڭ نورماتيۆتىك-قۇقىقتىق قۇجاتتارى ارقىلى رەتتەلۋى كەرەك. زاڭعا ءبىر مەملەكەتتىڭ انىقتاماسى جونىندەگى نورمانى ءبىز ەنگىزە المايمىز»، - دەپ ءتۇسىندىردى ول. 

اۆتور: قانات مامەتقازى ۇلى