ەلىمىزدەگى «باسەكەگە قابىلەتتى كوشباسشىلار – ۇلتتىق چەمپيوندار» مەملەكەتتىك باعدارلاماسىنىڭ دياگنوستيكالاۋ كەزەڭى اياقتالىپ، «مىڭنان تۇلپار، جۇزدەن جۇيرىك» جەڭىمپازدار انىقتالدى.

استانادا وتكەن اتالعان اۋقىمدى جوبانى تالقىلاۋ وتىرىسىندا «بايتەرەك» حولدينگىنىڭ باسقارما ءتوراعاسى قۋاندىق بيشىمبايەۆ نازارداعى 28 كومپانيانىڭ 7-ەۋى العا وزا شاپقانىن مالىمدەدى.

وسىمەن ءۇشىنشى رەت شىمىلدىعىن تۇرگەن باسقارۋشى كوميتەت وتىرىسىنا ق ر پرە­مەر-مينيسترىنىڭ ءبىرىنشى ورىنباسارى باقىتجان ساعىنتايەۆ، قازاقستاننىڭ ۇلت­تىق كاسىپكەرلەر پالاتاسى پرەزيديۋمىنىڭ ءتوراعاسى تيمۋر قۇلىبايەۆ، ۇلتتىق ەكونو­ميكا ءمينيسترى ەربولات دوسايەۆ، وتاندىق بيزنەس-قاۋىمداستىق وكىلدەرى جانە وزگە دە مۇددەلى تاراپتار قاتىستى. 
 – بۇگىنگى تاڭداعى باعدارلاما جەمىسى شىن قۋانتادى. ءبىزدىڭ «اتامەكەن» پالاتاسى دا ءتيىستى جۇمىسقا بەلسەندى اتسالىسىپ، ناتيجەلى وربۋىنە ءوز ۇلەسىن قوستى. كوپتەگەن كومپانيالار قاتارىنان وتىزعا جۋىعى ىرىك­تەلىپ الىنىپ، ولارداعى احۋال ءجىتى زەردە­لەنىپ، تالداندى. جالپى، قاجەتتى تىزىمدەگى زور ءۇمىت ارتىلعان ءبىرقاتار كاسىپ­ورىنداردىڭ ءوسىم الەۋەتى بايقالادى. «بايتەرەك» حولدين­گىمەن بىرلەسە وتىرىپ اتقارعان وڭ سيپاتتاعى ىنتىماقتاستىقتى ءارى قاراي دا جالعاستىرۋ كەرەك دەپ ويلايمىن، – دەپ اتاپ ءوتتى جيىن با­سىندا ۇلتتىق پالاتا جەتەكشىسى ت.ق ۇلى­بايەۆ.
ەلباسى نۇرسۇلتان نازاربايەۆتىڭ باستاماسىن جۇزەگە اسىرۋ اياسىندا سۇلباسى تۇزىلگەن يگىلىكتى ءىس بارىسىندا، قازاقستاندا ايماقتىق جانە الەمدىك دارەجەدەگى، باسەكەگە قابىلەتتى، ەكسپورتتىق باعىتتا قاۋقارلى شي­كىزاتقا تاۋەلدىلىكتەن تىس سالانى قالىپ­تاستىرۋ كوزدەلۋدە. مۇنداي كاسىپ يەلەرىنە «بايتەرەك» ۇلتتىق باسقارۋشى حولدينگى» اق مۇمكىندىكتەرىن قولدانۋ ارقىلى قارجىلىق قولداۋ قولجەتىمدى بولماق. انىعىراق توقتالساق، بۇل بانكارالىق نەسيەلەندىرۋ، ليزينگتىك مامىلەلەردى قارجىلاندىرۋ، پايىزدىق مولشەرلەمەلەردى سۋبسيديالاۋ، نەسيەلەرگە كەپىلدىك بەرۋ، ەكسپورتتىق ساق­تاندىرۋ، يننوۆاسيالىق گرانتتار سىندى قۋاتتى تەتىكتەر بولىپ وتىر. سونىمەن قاتار ەرەكشە سۇزگىدەن سۇرىنبەي وتكەن مىق­تىلار الەمگە بەلگىلى McKinsey&Company حا­لىقارالىق كونسالتينگتىك كومپانيا­سىنىڭ ناقتى قۇندى كەڭەستەرىنە يەك ارتىپ، باس­قارۋدىڭ ۇزدىك ۇلگىلەرىمەن تانىسا الماق. تاعى ءبىر ماڭىزدى جايت، باعدارلاماعا قاتى­سۋشى-كومپانيالاردى دەمەۋدە، مەملەكەتتىك مەكەمەلەرمەن اكىمشىلىك كەدەرگىلەردى جويۋدا تىعىز جۇمىس ىستەلىپ، شاش-ەتەك شارۋا ءبىر ارنادا ۇيلەستىرىلمەك. 
– دياگنوستيكالاۋ ساتىندە ايقىندالعان باستامالاردى تىندىرۋ ارقىلى شيكىزاتتىق ەمەس ەكسپورت 2018 جىلعا تامان 38 ملرد تەڭگەگە جەتىپ، باعدارلامادا باعىن سىناۋشى جاقتاردىڭ قوسىمشا كىرىسى 173 ملرد تەڭگە كولەمىنە كوتەرىلەدى دەپ كۇتىلۋدە. ونىمەن بىرگە، 5 مىڭ جاڭا جۇمىس ورنى اشىلادى دەپ تە بولجانۋدا. تاڭدالعان كومپانيالاردىڭ ىشىنەن، ءقازىردىڭ وزىندە جەتەۋى «چەمپيون» اتاعىنا ابدەن لايىق. ولاردىڭ ساۋدا سوماسى قوماقتى، ونىمدەرىن قارقىندى تۇردە شەكارا اسىرۋدا ءارى قارجىلىق-ماركەتينگتىك مە­نەدج­­مەنتى ساۋاتتى جۇرگىزىلۋدە، – دەپ بايان­دادى «بايتەرەك» ۇبح باسشىسى ق.ءبيشىم­بايەۆ.
سونىمەن، «RG Brands»، «Eurasian Foods Corporation»، «اگروپرودۋكت»، «بايان سۇلۋ»، «ماسلو-دەل»، «Alageum Group»، «Alina» ىسپەتتى شارۋاسىن ورگە دوڭگەلەتكەن كومپا­نيالارعا ايرىقشا كوڭىل بولىنۋدە. مىسالعا، ەمالمەن سىرلانعان ۆاننا، قولجۋعىش جاساۋدىڭ شەبەرى «سانتەحپروم» ج ش س سترا­تەگياسىندا اكريلدەنگەن ونىمگە اۋى­سىپ، ماركەتينگتىك قىزمەتتى جاڭعىرتۋ، وڭتۇستىك جانە باتىس قازاقستان وڭىرلەرىندەگى ءىس-قيمىلدى شيراتۋ، جىلىتۋ جۇيەلەرىن ساتۋدى جيىلەتۋ، ءتىپتى اۆتوموبيل ونەركاسىبىنە بولشەكتەر جەتكىزۋ ارقىلى رەسەيدەگى ساۋدا كورىگىن قىزدىرىپ، ەلىمىزدەگى يمپورتتى ىعىستىرۋ كوزدەلۋدە. «Alageum Group» ج ش س شىمكەنت قالاسىندا 220 جانە 500 كۆت كەرنەۋلىك كۇشتىك ترانسفورماتورلار زاۋىتىن سالۋعا، «ءبىرتۇتاس تەرەزە» ۇستانى­مىنىڭ تۇساۋىن كەسۋگە قۇلشىنسا، «بايان سۇلۋ» اق ءدامى ءتىل ۇيىرەتىن كونديتەرلىك ونىمىمەن ورتالىق ازيانى جاۋلاپ الماق رايدا. 
 – كونديتەرلىك سالادا راسىندا ۇلتتىق چەمپيوندى جارق ەتكىزۋگە بولادى. سەبەبى بۇل – ەداۋىر ۇلكەن نارىق. بۇگىندە ەلىمىزدەگى 800 ميلليون تەڭگەلىك كونديتەرلىك ونىمدەردىڭ وكىنىشكە قاراي، 420 ملن بولىگى سىرتتان تاسىمالداناتىن يمپورت. سونداي-اق كورشى وزبەكستان مەن تاجىكستاندا، اۋعانستاندا كونديتەرلىك ءوندىرىس ناشار دامىعان. رەسەي نارىعىن دا ۇمىتپاعان ءجون. ءبىزدىڭ ەسەپتەۋىمىزشە، 276 مىڭ توننا ەكسپورتتىق مۇمكىندىك 700 ملن دوللارعا تەڭ. ەكسپورتتى دامىتساق، اينا­لىمدى 1،5 ملرد دوللارعا اپارۋعا شامامىز جەتەدى، – دەپ پىكىرىن ءبىلدىردى قىزىقتى سالىس­تىرمالى دەرەك بويىنشا قازاقستان­دىقتار تاتتىگە ناننان گورى ەكi ەسە شىعىن­دالاتىنىن ايتقان قازاقستان كونديتەرلەر قاۋىمداستىعىنىڭ ۆيسە-پرەزيدەنتى ءاليحان تالعاتبەك.
اڭگىمەنى تۇيىندەي كەتسەك، جوعارىدا كەل­تىرىلگەن باعدارلامانىڭ العاشقى ساتىسىندا اگروونەركاسىپتىك كەشەن، ماشينا جاساۋ، قۇرىلىس زاتتارى ءوندىرىسى سەكىلدى ءۇش باعىتتا جىلدىق تابىس، جۇمىس ورىندار سانى، ورتا­شا پايدا تابۋ دەڭگەيى، ەكسپورت ۇلەسى سىندى تارماقتاردا كورسەتكىشى كوتەرىڭكى نىساندار سۇرىپتالعان. ەكىنشى دياگنوس­تيكالاۋ بەلەسىندە بيزنەستى ءارى قاراي جاقسارتۋدىڭ نەگىزگى باعدارلارى بەلگىلەنىپ، جەرگىلىكتى كوم­پانيالارعا 100-دەن استام ۇسىنىس ءازىر­لەنگەن. ەندىگى بيىك مۇرات، «بايتەرەك» حول­دينگى مەن McKinsey&Company ماماندا­رىنان قۇرالعان ساراپشىلار توبى ءار كاسىپورىنعا ارنايى دايىنداعان سايكەس دۇنيەلەردى ءىس جۇزىندە ەنگىزۋ. كونسۋل­تاسيالىق، قارجىلىق، ينستيتۋسيونالدىق قولداۋ امالدارى تاعى بار.
McKinsey&Company بىلىكتى قىزمەت­كەرلەرى پايدالانىمداعى جانە جاڭا ءونىم­دەر ماركەتينگىن كۇشەيتۋ، ءونىم جەلىسىنىڭ ءورىسىن ۇزارتۋ، كەلەشەگى جارقىن نارىقتارعا باتىل قۇلاش سىلتەۋ، ءوندىرىس ونىمدىلىگىنە وڭ رەڭك بەرۋ، پەرسونالدى باسقارۋ مەن ۇيىمداستىرۋ قۇرىلىمىنىڭ كوكجيەگىن كەڭەيتۋ ارەكەت­تەرىمەن بىلەك سىبانا اينالىسپاق. ال مەم­لەكەتتىك ورىندارعا ادال دا اشىق باسەكەنى، سەرتيفيكاسيا راسىمدەرىنەن ءوتۋدى جەڭىل­دەتۋدى، ىشكى جانە سىرتقى ساۋدا ورتالا­رىنا شىققاندا وتاندىق بيزنەس وكىلدەرىن قول­تىق­تان دەمەۋدى قاراستىراتىن 43 شارا ۇسى­نىلعان. قامقورلىققا ىلىككەن باستامالاردى كادەگە جاراتۋدى قارجىلاندىرۋدا، اعىم­داعى جىلدىڭ سوڭىنا دەيىن دامۋ ينستي­تۋتتا­رىنداعى قولدانىستاعى قۇرالدار شەڭ­بەرىندە قورلاندىرۋدىڭ وڭتايلى نۇسقالارى سالماقتالىپ، بەكىتىلمەك. 

دەرەككوز: ايقىن-اقپارات