ول – ءقازىر سۋپەرچەمپيون. جۇدىرىعى جاھاننىڭ تىزەسىن دىرىلدەتكەن نوكاۋتشى. ول – ءقازىر جۇلدىز. ونى بارلىعى بىلەدى. وردابۇزار جاسىندا قامال العان بىلعارى قولعاپ شەبەرى. ول – پاتريوت. ول – قازاق ەلىنىڭ، ۇلتىنىڭ ماقتانىشى. ول – گەنناديي گەنناديي ۇلى گولوۆكين (GGG). بۇگىنگى تاڭدا وسىنشاما تولاعاي تابىستارعا كەنەلگەن بوكسشىنىڭ جولى قالاي باستالدى؟ بۇل تۋرالى ويلانىپ كوردىڭىزدەر مە؟ قاراعاندىلىق بوكسشى الەمدىك بوكس سەرياسىنىڭ شىڭىنا قالاي شىقتى؟ سول تۋرالى جازارىمىز بار، نازارىڭىز اۋىسپاسىن.

گەنناديي جولى

            اۋەسقوي بوكس

            گەنناديي گولوۆكين 1981 جىلى ءساۋىردىڭ 8-ىندە قاراعاندى قالاسىندا دۇنيەگە كەلگەن. بىلە بىلسەڭىزدەر، ول – ەگىزدىڭ سىڭارى. گەنناديي سىڭار باۋىرى ماكسيممەن بوكس جولىن بىرگە باستاعان. ماكسيم دە جاقسى جۇدىرىقتاسقان دەسەدى. بىلەتىندەردىڭ ايتۋىنشا، وتە دارىندى بوكسشى بولعان. ءبىراق ءتۇرلى جاعدايعا بايلانىستى ءسال ەرتەرەك ۇلكەن سپورتتان قول ءۇزىپ كەتكەن. ءقازىر ول گەناعا قولداۋ كورسەتىپ، باپكەرلەر ساپىندا ءجۇر. ءوزىن شىڭعا كوتەرىپ، قارسىلاستارىن شىڭىراۋعا ءتۇسىرىپ جۇرگەن بوكسشى ءوزىنىڭ سپورتتىق مانسابىن اۋەسقوي بوكستان باستاعان.

            ايگىلى بىلعارى قولعاپ شەبەرى اۋەسقوي بوكسقا 11 جاسىندا كەلەدى. قازاقستاننىڭ جەتى دۇركىن چەمپيونى. 2000 جىلى جاستار اراسىندا الەم چەمپيونى اتانادى. 2001 جىلى شىعىس ازيا ويىندارىنىڭ، 2002 جىلى ازيا ويىندارىنىڭ چەمپيونى اتانادى. تالاناتتى ءھام دارىندى بوكسشى 2004 جىلى افينا قالاسىندا وتكەن وليمپيادا ويىندارىنىڭ كۇمىس جۇلدەگەرى اتانادى. فينالدىق كەزەڭگە دەيىن قارسىلاستارىنا ەسە جىبەرمەگەن جەرلەسىمىز اقتىق سىندا ورىس بوكسشىسى گايداربەك گايداربەكوۆتەن 18:28 ەسەبىمەن ەسە جىبەرىپ الادى. «كەلەسى وليمپيادا ويىندارىندا التىن الاتىنى ءسوزسىز، ءالى جاس قوي» دەگەندەر كوپ-تىن سول ۋاقىتتا. الايدا گولوۆكيننىڭ جولى كۇرت وزگەردى. ءاۋ باستا ونىڭ بۇل باستاماسىن قولداۋشىلار از بولعانىمەن، بۇگىندە گولوۆكين باعىتىنىڭ انىق ەكەنىن دالەلدەدى.

            گولوۆكين – ينتەلليگەنت بوكسشى. ونىڭ مادەنيەتى، قازاققا ءتان سابىرلى، قوڭىر مىنەزى الەم جۋرناليستەرىن تاڭ قالدىرۋدا. «اۋەسقوي بوكس گولوۆكينگە نە بەردى؟» دەگەن ساۋال ەرىكسىز تۋۋى مۇمكىن. جاۋاپ – تاربيە. قازىرگى كاسىبي بوكس شەبەرلەرىنە جەتىسپەي جاتقان تۇس – بۇل. دورەكىلىك، قارسىلاسىن سىيلاماۋشىلىق. گەنا بۇل ادەتتەن اۋلاق. ارتىق ءسوزى جوق. اۋەسقوي بوكس گەننادييدى وسىعان ۇيرەتتى. «بورات» فيلمىنەن كەيىن ەلىمىزدىڭ ءيميدجى ءبىرشاما قۇلدىراعانى انىق. الايدا ەش نەگىزگە سۇيەنبەي تۇسىرىلگەن بۇل فيلمگە جالعىز گەنناديي گولوۆكيننىڭ پاڭ تۇرىپ، بەرگەن جاۋابى جەتكىلىكتى. مادەنيەت – قازاققا ءتان، دىلمەن ەگىز وسكەن ۇعىم.

            كاسىبي بوكس

            گەنناديي اۋەسقوي بوكستان جەتەر جەتىستىكتەرگە جەتىپ، الارىن الدى. سونىمەن، 2006 جىلى گەنناديي گولوۆكين اۋەسقوي بوكستان كاسىبي بوكسقا اۋىساتىنىن جاريا ەتتى. اتالعان جىلى ورتا سالماقتا 8 جەكپە-جەك وتكىزىپ، سەگىزىن دە مەرزىمىنەن بۇرىن جەڭىسپەن اياقتادى. قارقىندى دامىپ كەلە جاتقان بوكسشىنىڭ اياق الىسى كوپشىلىكتىڭ نازارىن وزىنە اۋدىردى وسىلاي. 2009 جىلى 12 راۋندتىق العاشقى جەكپە-جەگىندە برازيليالىق بوكسشى دجون اندەرسون كارۆالونى العاشقى راۋندتا نوكاۋتقا ءتۇسىرىپ، WBA دارەجەسى بويىنشا الەم چەمپيونى اتاندى. بۇل ناتيجەلى جەڭىستەرى گولوۆكيندى اعايىندى كليچكولار قۇرعان «K2 Promotions» پروموۋتەرلىك كومپانياسىنىڭ قۇرامىنا قوسادى. ءبىر جىل وتكەن سوڭ گەنناديي بۇكىلالەمدىك كاسىبي بوكس سەرياسىنىڭ IBO بەلدىگىن جەڭىپ الادى. مۇنىڭ ورتا سالماقتا جۇدىرىق ءتۇيىستىرىپ جۇرگەن بوكسشىلار ءۇشىن جاڭالىق بولعانى انىق. ەندى ولاردىڭ تاۋلارىن شاعىپ، تۇعىرلارىنان تايدىراتىن تەگەۋرىندى قارسىلاس شىققانى بەلگىلى بولدى. 2012 جىلى جەرلەسىمىز جەڭىلىستىڭ ءدامىن تاتىپ كورمەگەن رەسەي بوكسشىسى ميحايل ماكاروۆتى جەڭىپ تىنادى. ارتىنشا سول كەزدىڭ مىقتىسى سانالاتىن دميتريي پيروگتى جەكپە-جەككە شاقىردى. الايدا، بۇل جۇدىرىق ءتۇيىستىرۋ جۇزەگە اسپادى. كەزدەسەر كۇن جاقىنداعاندا پيروگ ارقاسىنان جاراقات الىپ، كەزدەسۋدەن باس تارتۋعا ءماجبۇر بولدى.

            بۇل جوسپارلانعان كۇن گەنناديي ءۇشىن جەكپە-جەكسىز وتپەدى. پيروگتىڭ ورنىنا گولوۆكيننىڭ سپورت مانسابىنداعى ەڭ ءقاۋىپتى قارسىلاسى گجەگوش پروكسامەن كەزدەسۋ ءوتتى. پروكسا دا وسال ەمەس-تىن. ول گولوۆكينگە دەيىن 29 جەكپە-جەك وتكىزىپ، 28-ىندە جەڭىسكە جەتكەن. الايدا گەنانىڭ ارىنىنا ول دا شىدامادى. اتالعان جەكپە-جەك گولوۆكيننىڭ ايگىلى نۆو تەلەارناسىندا كورسەتىلگەن كەزدەسۋى بولدى. الەم گولوۆكين دەگەن ەسىمدى تاني باستادى.

            بۇگىنگى كۇندە گەننايديي گولوۆكين كاسىبي بوكس سەرياسىندا 33 جەكپە-جەك وتكىزگەن. ونىڭ بارلىعىن جەڭىپ، 30-ىن مەرزىمىنەن بۇرىن اياقتاعان. قازىرگى تاڭدا ەڭ ۇزدىك نوكاۋتەر اتانىپ وتىر.

            لەمەدەن نە كۇتەمىز؟

            گولوكيننىڭ كەلەسى قارسىلاسى داۆيد لەمە. كانادالىق بوكسشى. بوكسشىلار رەيتينگىسىندە 6-شى ورىنعا تۇراقتاعان. سپورتتىق مانسابىندا 36 جەپە-جەك وتكىزىپ 34-دە جەڭىسكە جەتكەن. ونىڭ 31 نوكاۋتپەن اياقتالعان. 2- رەت جەڭىلىس تاپقان. وسال  قارسىلاس ەمەس. قارقىنى دا كەرەمەت.

            بۇگىن گولوۆكين مەن لەمە رينگكە شىعار الدىنداعى پرەسس-كونفەرەنسياعا قاتىسقان بولاتىن. مۇندا كانادالىق سپورتشى ەگەر گولوۆكيندى العاشقى راۋندتاردا قۇلاتاتىن بولسام، ەش تاڭ قالمايمىن دەپ مالىمدەدى. ال، ءوز كەزەگىندە گولوۆكيننىڭ باپكەرى ابەل سانچەز لەمەنى گولوۆكيننىڭ ەڭ ءقاۋىپتى قارسىلاسى ەمەس دەپ مالىمدەدى.

            ەندى بارلىق سۇراققا جاۋاپتى رينگ بەرەدى. ال، گولوۆكيندى قۇلاتامىن دەگەندەردىڭ بوكستان كەيىنگى ءتۇرىن ءبىز جاقسى بىلەمىز. ەستەرىڭىزگە سالا كەتەيىك ەكەۋ -ارا كەزدەسۋ 17 قازاندا (ءبىزدىڭ ۋاقىت بويىنشا 18 قازان)وتەتىن بولادى.

ايان ازامات