كەشە رەسەي پرەزيدەنتى ۆلاديمير ءپۋتيننىڭ ەلىمىزگە مەملەكەتتىك ساپارى باستالدى. ساپار بارىسىندا ەكى ەل اراسىنداعى ەكونوميكالىق قارىم-قاتىناستاردى رەتتەيتىن ءبىرقاتار قۇجاتتارعا قول قويىلادى جانە تمد مەملەكەتتەرى باسشىلارى  كەڭەسى مەن جوعارى ەۋرازيالىق ەكونوميكالىق كەڭەسى وتىرىستارى وتەدى دەپ جوسپارلانۋدا.  ءپۋتيننىڭ بۇل ساپارىنىڭ رەسمي ب ا ق قانشا جەردەن تەك قازاقستان مەن رەسەي اراسىنداعى ساۋدا-ەكونوميكالىق قاتىناستارمەن بايلانىستىرۋعا تىرىسقانىمەن كوپكە بەيمالىم تۇستارى كوپ سەكىلدى.

سونىڭ ءبىرى – ۋكراينا ماسەلەسى. بۇلاي دەۋىمىزدىڭ باستى سەبەبى رەسەي پرەزيدەنتىنىڭ ەلىمىزگە ۋكراينا جەتەكشى پەتر پوروشەنكونىڭ ساپارىنان سوڭ ىلە-شالا كەلۋى. ەستەرىڭىزدە بولسا، پ. پوروشەنكو مەن ن.نازاربايەۆ ۋكراينا مەن قازاقستان اراسىنداعى ەكونوميكالىق قاتىناستارعا بايلانىستى ءبىرقاتار كەلىسىمدەرگە قول قويعان بولاتىن. بۇل كەلىسىمدەر سوڭعى جىلدارى كۇرت تومەندەپ كەتكەن ەكى ەل اراسىنداعى ساۋدا قاتىناستارىنا جان بىتىرەدى دەپ كۇتىلۋدە. سەبەبى قازاقستاننان ۋكرايناعا كوگىلدىر وتىن مەن كومىر جەتكىزۋ بويىنشا ماسەلەلەر كوپتىڭ نازارىن اۋدارتتى.

قازاقستاندىق ءونىمدى ۋكرايناعا جەتكىزەتىن قاتىناس جولدارىنىڭ بارلىعى رەسەي ارقىلى وتەتىنىن ەسكەرسەك پۋتين ساپارى بارىسىندا پرەزيدەنت نازاربايەۆ وسى ماسەلەلەر بويىنشا رەسەيلىك ارىپتەسىمەن ءبىرقاتار ماسەلەلەردى تالقىلايتىنى ءسوزسىز.

ۋكراينا جەتەكشىسى، سونىمەن قاتار، ءوز ساپارى بارىسىندا قازاقستاندا ان ماركالى ۇشاقتارىن قۇراستىرۋ ماسەلەسىن دە قاراستىرعانى بەلگىلى. ول كەلىسىمدەر ءساتتى جۇزەگە اسقان جاعدايدا ەلىمىزدە ۇشاق قۇراستىرۋمەن اينالىساتىن بىرىككەن كاسىپورىندار اشىلماق. اۋە كولىگى، ونىڭ ىشىندە اسكەري ۇشاقتار مەن تىكۇشاقتار ءوندىرۋ مەن ساتۋ ىسىندە ءوزىن تەڭدەسسىز يمپورتەر سانايتىن رەسەيدىڭ بۇل نارىقتا دا ءوز مۇددەسى جوق دەي المايسىز.

رەسەي باسشىلىعىنىڭ نارازىلىعىن تۋدىرۋى مۇمكىن تاعى ءبىر ءجايت – قىرىمنىڭ اننەكسيالانۋى تۋرالى قازاقستاننىڭ مەكتەپ وقۋلىقتارىندا كەتكەن ساياسي قاتەگە بايلانىستى داۋ. ەستەرىڭىزدە بولسا، 10-سىنىپ وقۋشىلارىنا ارنالعان گەوگرافيا وقۋلىقتارىنداعى ۋكراينا تەرريتورياسىنىڭ اننەكسيالانۋىنىڭ «قىرىمنىڭ رەسەيگە قوسىلۋى» دەپ باعالانۋى ۋكراينا تاراپىنان نارازىلىق تۋعىزىپ، ەلىمىزدىڭ سىرتقى ىستەر مينيسترلىگىنە ارنايى نوتا تاپسىرىلعان ەدى. ەلىمىزدىڭ ءبىلىم جانە عىلىم مينيسترلىگى داۋعا دەر كەزىندە ارالاسىپ، مەكتەپ وقۋلىعىندا كەتكەن ساياسي قاتەلىكتى مويىنداعانى، ول وقۋلىقتاردى جارامسىز دەپ تانىعانى دا ۇمىتىلا قويعان جوق. ەندى استانانىڭ قىرىم ماسەلەسىندەگى بۇل ەكى-ۇشتى ۇستانىمى ماسكەۋ بيلىگىنىڭ شىمبايىنا باتۋداي-اق باتاتىنىن اڭعارۋ قيىن ەمەس.

ۆ. پۋتين ساپارى بارىسىنداعى ەلەۋسىزدەۋ وقيعا دەۋگە كەلمەيتىن تاعى ءبىر جاعدايدى ايتپاي كەتۋگە بولماس. ول – رەسەي پرەزيدەنتىنىڭ ساپارىنىڭ العاشقى كۇنى استاناداعى اۋليە ۋسپەنسكيي كافەدرالدى سوبورىنا باس سۇعۋى. ەكى ەلدىڭ اقپارات قۇرالدارىندا ۆ.پۋتين سوبورعا اۋليە بوگوروديسا يكوناسىن سىيلاپ، شىراق جاقتى دەپ حابارلانۋدا. بۇگىندە كەڭەستىك يمپەريانى كوكسەگەن «ورىس الەمى» باعدارلاماسى ورىس-پراۆوسلاۆيە شىركەۋى ارقىلى بەلسەندى تۇردە ناسيحاتتالىپ وتىرعانىن ەسكەرسەك، ۆ. ءپۋتيننىڭ قازاقستاننىڭ باس سوبورىنا باس سۇعۋى ەل تۇتاستىعى مەن ۇلت بىرلىگىنە سىزات ءتۇسىرۋدى كوكسەيتىن الگىندەي ارامپيعىلدىلاردىڭ قولتىعىنا سۋ بۇركىپ جۇرمەي مە دەگەن دە ويعا قالاسىز.

دارحان مۇقان