"ۇلتتىق قور – بالالارعا" دەگەن بۇل باعدارلاما پرەزيدەنتتىڭ جولداۋىندا تاپسىرىلعان سوڭ، مەملەكەتتىك اپپارات اپىل-عۇپىل ونى 2024 جىلدىڭ 1 قاڭتارىنا دەيىن ىسكە قوسىپ ۇلگەرۋگە تىراشتاندى.
ەڭ قىزىعى – كەزىندە حالىقتىڭ زەينەتاقى قورىنداعى "شەكتەن اساتىن" ءوز اقشاسىن الۋىنا رۇقسات بەرگەندەي، بۇل دا تىكەلەي قولىڭا اقشا كۇيىندە تۇسپەيتىن "اقشا". زەينەتاقى قورىنان ارتىق اقشاسىن شىعارىپ الۋ ءۇشىن قازاقستاندىقتار نەبىر قۋلىق-سۇمدىققا باردى. ويتكەنى بىلاي، "ءما" دەپ قولىڭا بەرمەيدى. بەرۋ ەمەس بۇل! "ميىڭدى قوسىپ، مەملەكەتتى الداپ كور" دەگەن نارسە بولدى ول.
قارجى ءمينيسترى جاماۋبايەۆ ايتقانداي، تۋا سالا شوتىنا ۇلتتىق قوردان اقشا تۇسەتىن ءار بالانىڭ اتىندا 18 جاسقا دەيىن 3-4 مىڭ دوللاردان اسپايتىن اقشا جينالادى ەكەن. مەملەكەتتىك ورگانداردىڭ ابدەن ەسەپتەگەن سوماسى وسى عانا. قازىرگى باعاممەن ارى كەتسە 1،8 ملن تەڭگە!
ارينە، ول دا اقشا عوي. ءبىراق ونى ەشبىر بالا قولىنا المايدى. ومىرىندە قولىنا ۇستاپ كورمەيتىن اقشاسى. ۇلتتىق قورداعى شوتىندا عانا تۇراتىن.
ول اقشانى بالالار ەكى-اق ماقساتتا جۇمساي الادى ەكەن: نە وقۋعا، نە باسپانا الۋعا. بولدى!
ەگەر بالا اقىلى وقۋ وقىمايتىن بولسا، يپوتەكاعا باسپانا المايتىن بولسا، ول اقشانىڭ تاعدىرى نە بولاتىنى بەلگىسىز. تەك بۇل ومىردە قولىڭا المايتىنىڭ عانا بەلگىلى.
"بەرەمىن" دەپ، شىندىعىندا بەرمەيتىن مەملەكەت بولىپ تۇر ەكەن ءالى مىناۋ قازاقستان دەگەن. ءبىراق جوقتى بارداي ەتىپ كورسەتۋدىڭ حاس شەبەرى.
اشىعىندا، مەملەكەتتىڭ ءار بالاعا ۇلتتىق قوردان اقشا تولەنەدى دەگەنى – تازا الداۋ! قۇر پوپۋليزم بوپ تۇر عوي؟ ەگەر ۇكىمەتكە ەس كىرمەسە، وندا ءبۇيتىپ بەرگەنى قۇرسىن.
ەسەسىنە باستالماي جاتقان بۇل ءىستىڭ ۋاكىلەتتى وپەراتورلارى دايىن تۇر: "بجزق" اق، "قازپوشتا" اق، "وتباسى بانكى" اق.
بۇل جوبانى جۇزەگە اسىرۋعا ەكىنشى دەڭگەيلى 9 بانك نيەت ءبىلدىرىپتى.
پىكىر قالدىرۋ