قازاقستان پرەزيدەنتى كەزدەسۋ بارىسىندا ءپۋتيننىڭ ەلىمىزگە ساپارىنا دەگەن ءىلتيپاتىن ءبىلدىرىپ، استاناعا ساپارىن ماڭىزدى وقيعا دەپ اتادى.

“ءسىزدىڭ قازاقستانعا سوڭعى مەملەكەتتىك ساپارىڭىز ءتورت جىل بۇرىن بولدى. وسى ۋاقىت ارالىعىندا ورتاق ماسەلەلەرگە كوزقاراسىمىزدى ۇنەمى ءوزارا ۇيلەستىرىپ، ەكىجاقتى قارىم-قاتىناستىڭ وزەكتى ماسەلەلەرىن ءتۇرلى الاڭداردا شەشىپ وتىردىق. ءسىزدىڭ بۇل جولعى ساپارىڭىز دا وسىناۋ كۇردەلى كەزەڭدەگى ىنتىماقتاستىعىمىزدى نىعايتۋعا جانە كەڭەيتە تۇسۋگە سەپتىگىن تيگىزەتىنىنە سەنىمدىمىن”، – دەدى نۇرسۇلتان نازاربايەۆ.

مەملەكەت باسشىسى الداعى 16 قازاندا وتەتىن تمد-عا مۇشە مەملەكەتتەر باسشىلارى كەڭەسى مەن جوعارى ەۋرازيالىق ەكونوميكالىق كەڭەس ماسەلەلەرىن دە قوزعادى.

“بۇگىندە ەاەو حالىقارالىق ارەنادا قۇرمەت پەن بەدەلگە يە بولا وتىرىپ، ءوز اياسىن كەڭەيتىپ كەلەدى. ءبىز دۇرىس جولدا كەلەمىز دەپ ەسەپتەيمىن”، – دەدى قازاقستان پرەزيدەنتى.

سونىمەن قاتار، نۇرسۇلتان نازاربايەۆ قازاقستان مەن رەسەيدىڭ ەكىجاقتى قارىم-قاتىناسىن دامىتۋ كەلەشەگى تۋرالى دا ايتتى.

“ءبىز سوچيدە ءوزارا قارىم-قاتىناستارىمىزعا قاتىستى نەگىزگى ماسەلەلەردى تالقىلاۋعا مۇمكىندىك الدىق، ەندى بۇگىن سولارعا قاتىستى ءتيىستى قۇجاتتار دايىندالىپ وتىر. ءبىزدىڭ قارىم-قاتىناستارىمىز “ءححى عاسىرداعى تاتۋ كورشىلىك جانە وداقتاستىق تۋرالى” ىرگەلى كەلىسىم نەگىزىندە دامىپ جاتقانىن دا ايتقىم كەلەدى. وداقتاستىق ۇجىمدىق قاۋىپسىزدىك تۋرالى شارتپەن، ال ەكونوميكالىق تۇرعىدان ەاەو-نىڭ جارعىلىق قۇجاتتارىمەن بەكىتىلگەن. قازاقستان ءاردايىم رەسەي فەدەراسياسىنىڭ جاقىن ءارى سەنىمدى كورشىسى بولعان، الداعى ۋاقىتتا دا سولاي بولىپ قالا بەرەدى. بۇل قازاقستان حالقىنىڭ تۇپكى مۇددەلەرىمەن ۇندەسىپ جاتىر”، – دەپ اتاپ ءوتتى مەملەكەت باسشىسى.

پۋتين ءوز كەزەگىندە جوعارى دەڭگەيدەگى كەزدەسۋلەر مەن كەلىسسوزدەر جۇيەلى تۇردە جۇرگىزىلىپ كەلە جاتقانىن اتاپ ءوتتى.

“ماعان رەسەي-قازاقستان قارىم-قاتىناسىنا سيپاتتاما بەرۋدىڭ كەرەگى جوق. بۇل – جاي ءوزارا سەنىمدى سەرىكتەستىك قانا ەمەس، بارلىق ماعىناسىندا وداقتاستىق قارىم-قاتىناس. قازاقستان – ءبىزدىڭ ءىرى ساۋدا-ەكونوميكالىق سەرىكتەسىمىزدىڭ ءبىرى. بۇگىندە 6 مىڭعا جۋىق رەسەي كومپانياسى قازاقستاندا جۇمىس ىستەپ جاتىر، دوللارلىق ەكۆيۆالەنتپەن ەسەپتەگەندە مول كولەمدەگى ينۆەستيسيا جيناقتالدى. ءسىزدىڭ ءتول باستاماڭىز – ەۋرازيالىق ەكونوميكالىق وداق قارىشتى دامىپ، ەكونوميكالارىمىزدىڭ ءتيىمدى دامۋىنا جاعداي جاساۋدا. ءبىز كوپتەگەن سەرىكتەستەرىمىزدىڭ ەاەو-مەن ءتۇرلى فورماتتا ىنتىماقتاسۋ نيەتىندە ەكەنىن كورىپ وتىرمىز”، – دەدى رەسەي پرەزيدەنتى.

دەرەككوز: Tengrinews.kz