ءبارىن ۇمىتىڭىز. قوعامدىق ماسەلەنى قويىپ،  ساياساتتى ىسىرا  تۇرايىق. بۇگىن اسپان مەن جەردىڭ اراسى تۇگەلدەي ءبىر تاقىرىپتى تالقىلاۋدا. جالعىز تاقىرىپ : GGG- گەنناديي گەننادييەۆيچ گولوۆكين. ساراپشىلاردىڭ بارلىعى ءبىر اۋىزدان ونىڭ تاعى ءبىر جەڭىسىنىڭ كۋاگەرى بولامىز دەپ وتىر. گولوۆكين رينگكە شىعادى دەگەندە، ونىڭ قارسىلاسى كىم دەگەن ساۋال قويىلمايدى. سەبەبى وعان تەڭ كەلەر قارسىلاس جوق.

            گولوۆكينگە جەڭىلىسىڭ ءدامىن تاتتىرامىن دەپ كىم كەلمەدى؟ ۋاقىتىنان بۇرىن «جەرلەگەندەر» دە بولدى، قۇلاتامىن دەدى، سىندىرامىن دەدى. ەندى ءبىرى جەدەل جاردەم كولىگىن شاقىرتىپ قويىڭدار، مەن ونى مۇگەدەك قىلامىن دەدى. بۇل اگرەسسيالارعا گولوۆكين قازاققا ءتان سابىرلىلىققا سالىنىپ، جىميىپ قانا ءجۇردى. رينگ كورسەتەدى دەدى. رينگ كورسەتتى دە. رينگ ءوزىنىڭ پاتشاسىنا ادال. ال گگگ -  پاتشا.

            رەسمي تۇردە بۇگىن، ءبىراق ۋاقىت كەستەسىمەن ەرتەڭ تاڭ ەرتەڭ نوكاۋت پاتشاسى جاڭا قارسىلاسىمەن شىعادى. گەنادان تاياق جەگەن كوپ قارسىلاستارى سەكىلدى ول دا گولوۆكيندى العاشقى راۋنتتاردا قۇلاتامىن دەيدى. ول – داۆيد لەمە. كانادالىق بوكسشى. ءقازىر جاسى 26-دا. بۇگىنگە دەيىن 36 جەكپە-جەك وتكىزگەن. ونىڭ 34ء-ىن جەڭىپ، 31 نوكاۋتپەن اياقتاعان. سوڭعى ون جەكپە-جەگى ۋاقىتتان بۇرىن اياقتالعان. ءبىراق لەمەنىڭ 2 جەڭىلىسى بار. ستاتيستيكاعا سۇيەنسەك ادۋىندى قارسىلاس سياقتى. ءبىراق...

            لەمە 2011 جىلدىڭ 8 ساۋىرىندە العاشقى جەڭىلىسىن تاپقان. بۇعان دەيىن 25 جەكپە-جەك وتكىزگەن. ونىڭ 1-ەۋىن تورەشىلەر شەشىمىەن، 24ء-ىن نوكاۋتپەن اياقتاعان. 22 جەكپە-جەگى 2 مينۋتتان ارتىلماعان. بۇل جولعى قارسىلاسى ماركو انتونيو روبيو بولاتىن. لەمە روبيودان 7 راۋندتا جەڭىلەدى. ال رۋبيو بىزگە جاقسى تانىس سپورتشى. ول گولوۆكينمەن دە جەكپە-جەككە شىققان.  ەستەرىڭىزدە بولسا، وسىدان ءبىر جىل بۇرىن گولوۆكين رۋبيونىڭ تۇگىنەن-تۇك قويماي بار بولعانى 2ء-شى راۋندتا قۇلاتقان بولاتىن. ءيا سوڭعى ءۇش جىلدا لەمەنىڭ دەڭگەيى وسكەن بولار. ءبىراق گولوۆكيندە قاققان قازىعىندا تۇرعان جوق.

            بۇل دەگەنىڭىز لەمەنىڭ قارسىلاستارىنىڭ دەڭگەيى قانشالىقتى تومەن بولعانىنىڭ ايعاعى.  لەمە ەندى-ەندى جارقىراپ كەلە جاتقان جۇلدىز. ءبىراق ونىڭ نوكاۋتەر ەكەنىنە دە ۇلكەن كۇمان تۋادى. لەمەنىڭ دا حاسسان ن’دام ن’جيكاممەن بولعان جەكپە-جەگى سوزىمىزگە دالەل. جەكپە-جەك بارىسىندا دا حاسسان ن’دام ن’جيكام 5 رەت نوكداۋدتا بولعان. ءبىراق لەمە ونى سوڭىنا دەيىن قۇلاتا المادى. دەمەك لەمە نوكداۋدىنان كەيىن شابۋىلدى ۇدەتە بىلمەيدى. ال، كاسىپقوي بوكس ءۇشىن بۇل كەشىرىلمەيتىن قاتەلىك.

            داۆيد لەمە تۋرالى تاعى ءبىر دەرەك. لەمە ءقازىر بوكستان گورى كينوعا كوپ كوڭىل بولۋدە. ونىڭ تالانتىنا ءشۇبا جوق. ءبىراق ءوزىن ءارتىس رەتىندە كورسەتكەن، شىنىمەن مىقتى قارسىلاسپەن توبەلەسىپ  كورمەگەن قارسىلاستىڭ گولوۆكينگە قانداي دا  ءبىر قيىندىق ءتۇسىرۋى مۇمكىن دەگەنگە سەنۋ قيىن.

            كانادالىق بوكسشىنىڭ جەكە ومىرىنەن ازداعان مالىمەتتەر لەگىن ۇسىنساق. لەمە كانادا  تۋىلعان. قانى ليتۆا-ارمەنيالىق. اناسى – ارميان قىزى. وگەي اكەسىنىڭ تاربيەسىمەن وسكەن. ءقازىر جالعىزباستى اكە. ليليانا ەسىمدى قىزىن ءوزى تاربيەلەۋدە. ۇلى مەن ايەلى رەسەيدە تۇرىپ جاتىر.  بەس تىلدە ەركىن سويلەيدى. داۆيد جالپى سويلەگەندى ۇناتاتىن بوكسشى ەكەنىن كورسەتتى. «گولوۆكين العاشقى راۋندتاردا قۇلاسا تاڭ قالمايمىن. رينگتە ارىستاندار ايقاسى بولادى»،- دەپ ءبىر شۋلاتتى. الايدا، گولوۆكينمەن شىعاردا كىم نە دەمەدى. رينگتىڭ پاتشاسى ناتيجەنىڭ قالاي اياقتالاتىنىن جاقسى بىلەدى. ءبىز دە بىلەمىز.

ايان مەيراش