رەسەيدە 15-17 ناۋرىزدا پرەزيدەنت سايلاۋى ءوتۋى ءتيىس. سوناۋ 2000 جىلدىڭ ناۋرىزىندا رەسەي پرەزيدەنتى بوپ سايلانىپ، بيلىككە كەلگەن ۆلاديمير پۋتين ءقازىر 71 جاستا. وسىمەن بەسىنشى مەرزىمىنە بارايىن دەپ وتىر. وزگەرتىلگەن كونستيتۋسيا بويىنشا، ونىڭ ءالى 2036 جىلعا دەيىن پرەزيدەنت بولۋ قۇقىعى بار.

ءبىراق وسى جولى ءپۋتيننىڭ سايلانۋى قيىنداۋ بولايىن دەپ تۇر. ەكى جىلدان اسىپ بارا جاتقان سوعىستان، سانكسيالاردىڭ كەسىرىنەن تۋىنداعان قيىندىقتاردان، پروپاگاندانىڭ تاۋسىلمايتىن وتىرىگىنەن، جان-جاقتان كۇشەيگەن قىسىمنان، جوقشىلىقتان شارشاعان حالىقتىڭ ءتوزىمى تاۋسىلىپ بولىپ قالدى. تۋرا سايلاۋ الدىندا تۇرمەدەگى باستى وپپوزيسيونەرى ناۆالنىيدىڭ ءولىمى نارازى حالىقتىڭ قاتارىن كۇرت كوبەيتكەنى شىندىق.

جالپى، پۋتين وسى جولى سايلانا الماي قالۋى مۇمكىن. شەتەلدەگى وپپوزيسيالىق كۇشتەر ءپۋتيننىڭ سايلانۋىنا قارسى بارىنشا ۇگىت-نايسحاتىن جۇرگىزىپ جاتىر. سايلاۋدان كەيىن رەسەيدىڭ بۇكىل حالقى كوتەرىلسە، قارۋلى كۇشتەر بۇل جولى پۋتيننەن تەرىس اينالۋى مۇمكىن.

سونىمەن، رەسەيدە پۋتين سايلانا الماي قالسا، نە بولادى؟

پۋتين سايلانا الماي قالسا، ۋكرايناداعى سوعىس بىردەن توقتايدى. ويتكەنى بۇل ءپۋتيننىڭ ءوزى باستاعان سوعىس.

پۋتين بيلىكتەن تايسا، بۇگىن كرەملدە وتىرعانداردىڭ اراسىنان ەشكىم بيلىكتە قالا المايدى.

ەندەشە، ونداي جاعدايدا رەسەيدىڭ وزگەرەتىنى انىق. ءبىر پۋتيننەن ارەڭ قۇتىلعان ەل «ەكىنشى ءپۋتيننىڭ» بيلىكتى الۋىنا جول بەرمەس.

ەگەر رەسەي ەركىندىكتى قالاپ، جاڭا بيلىگى دەموكراتيالىق جولدى تاڭداسا، قازاقستان بيلىگىندە ۇلكەن داعدارىس تۋىندايدى!

جۇيەسى بىردەي، زاڭدارى ۇقساس، ءبىرىنىڭ ادەتىن ءبىرى قايتالاپ، بىرىنە ءبىرى سۇيەۋ بولىپ وتىرعان ساياسي مودەل بۇزىلىپ قالادى.

«جاڭا رەسەي» تانىماستاي بولىپ وزگەرىپ سالا بەرسە، قازاقستان بيلىگىنىڭ مۇنداي سەنارييگە ارنالعان جوسپارى جوق سياقتى. ونداي جاعدايعا دايىن وتىرعان بەدەلدى شىن وپپوزيسيا دا جوق ءوزى، قازاقستاندا.

ەڭ انىعى، ءپۋتيننىڭ ءداۋىرى بىتكەن كۇنى قازاقستاننىڭ باستان-اياق وزگەرىسكە ۇشىراۋى باستالادى. «جاڭا قازاقستاننىڭ» كوكەسىن سوندا كورەتىن بولساق كەرەك.