قازاقستاندىقتار ءۇشىن وتاندىق ءوندىرىستىڭ ەل تاۋەلسىزدىگىن العاننان كەيىنگى دامۋىنىڭ قۋاتتى ىنتالاندىرعىشى ق ر پرەزيدەنتى ن.ءا.نازاربايەۆتىڭ «نۇرلى جول – بولاشاققا باستار جول» اتتى قازاقستان حالقىنا جولداۋى بولدى.
مەملەكەت باسشىسى ءوز سوزىندە «نۇرلى جول» جاڭا ەكونوميكالىق ساياساتىنىڭ الەمدىك ەكونوميكالىق داعدارىسقا توتەپ بەرۋدىڭ باسقا ىس-شارالارىمەن قاتار، يندۋستريالاندىرۋ باعىتىنىڭ دا جالعاسى ەكەنىن اتاپ وتكەن بولاتىن. قازاقستان پرەزيدەنتى بەس ينستيتۋتتىق رەفورما ۇسىندى. ونىڭ ىشىندە يندۋستريالاندىرۋ مەن ەكونوميكالىق ورلەۋ دە بار. 2015-2019 جىلدارعا ارنالعان قازاقستان رەسپۋبليكاسىنىڭ يندۋستريالدى-يننوۆاسيالىق دامۋ مەملەكەتتىك باعدارلاماسى دا يندۋستريالاندىرۋ ساياساتىنىڭ ۇدەسىنەن شىعۋدى ماقسات ەتكەن. بۇل باعدارلاما ەلىمىزدەگى 2010-2014 جىلدارعا ارنالعان ۇدەمەلى يندۋستريالدى-يننوۆاسيالىق دامۋ مەملەكەتتىك باعدارلاماسىنىڭ زاڭدى جالعاسى. ءۇييدمب سايكەس، قازاقستاندا جاڭا زاۋىتتار سالىنىپ، جاڭا وندىرىستەر يگەرىلدى، حالىق ءۇشىن جاڭا ماماندىقتار اشىلدى. مەملەكەتتىك باعدارلامانى جۇزەگە اسىرۋ ارقاسىندا، وتاندىق ءونىمنىڭ جاڭا 150 ءتۇرىن شىعارۋعا قول جەتكىزۋگە مۇمكىندىك تۋدى. ونىڭ ىشىندە، فارماسيا سالاسى دا بار.
ۇدەمەلى يندۋستريالدى-يننوۆاسيالىق دامۋ مەملەكەتتىك باعدارلاماسىنا سايكەس، 2014 جىلعا دەيىن حالىقتىڭ دارى-دارمەك پەن مەديسينالىق بۇيىمدارعا دەگەن سۇرانىسىنىڭ 50 پايىزىن وتاندىق ءفارموندىرىس ءونىمى قامتاماسىز ەتۋى كەرەك بولاتىن. وسى ماقساتقا قول جەتكىزۋگە «سك-فارماسيا» جۇزەگە اسىرۋىمەن 2009 جىلى ارنايى قۇرىلعان ءبىرىڭعاي ديستريبيۋتور جۇيەسى سەبەپشى بولدى. «سك-فارماسيا» ج ش س جۇمىسىنىڭ نەگىزگى ستراتەگيالىق باعىتتارى – مەديسينالىق ماقساتتاعى بۇيىمدار جانە دارى-دارمەكپەن ۇزدىكسىز قامتاماسىز ەتۋ، بيۋدجەت قارجىسىن ۇنەمدەۋ، سونداي-اق وتاندىق تاۋار وندىرۋشىلەردى قولداۋ. ستراتەگيالىق باعىتتىڭ ەكىنشى باعىتى وتاندىق تاۋار وندىرۋشىلەر ءۇشىن، اسىرەسە، وتاندىق ءفارموندىرىسىنىڭ دامۋىنا ۇلكەن قولداۋ بولدى.
ايتالىق، ءۇييدمب بويىنشا اتىراۋ قالاسىندا بوي كوتەرگەن ءبىر رەتتىك شپريستەر شىعاراتىن «BRANDO» زاۋىتى بۇگىندە تولىق قۋاتىنا قوسىلىپ، ىشكى نارىقتىڭ سۇرانىسىن تولىق وتەپ، ونىمدەرىن ەكسپورتقا شىعارۋدا.
باتىس ايماقتاعى العاشقى جوبا
فارماسيا ءوندىرىسى بويىنشا اتىراۋدا تۇڭعىش رەت نەگىزىن قالاعان «BRANDO» جشس-نىڭ ءبىر رەتتىك شپريستەر شىعاراتىن زاۋىتى 2009 جىلى تامىز ايىندا پايدالانۋعا بەرىلدى. جىلدىق قۋاتى 250 ملن داناعا نەگىزدەلگەن زاۋىت 2 مل، 3 مل، 5 مل، 10 مل، 20 مل مەديسينالىق شپريستەردى الدىمەن ىشكى نارىققا شىعاردى.
«BRANDO» جشس-نىڭ ديرەكتورى اسلان ءقابدۋلليننىڭ ايتۋىنشا، ءبىر رەتتىك شپريستەردى شىعارۋ جوباسىن جۇزەگە اسىرۋدى قولعا الار كەزدە ەل نارىعىنىڭ ەكونوميكالىق احۋالى ساراپتالىپ، زەردەلەنىپ قانا قويماي جاڭا جوبانىڭ ەلىمىزگە ەكونوميكالىق جانە قازاقستاندىق ۇلەس سالماعى مۇقيات پىسىقتالعان.
– ءبىزدىڭ جۇزەگە اسىرعان جوبامىز ەڭ الدىمەن حالىقتىڭ ءبىر رەتتىك شپريستەرگە دەگەن سۇرانىسىن قامتاماسىز ەتۋدى ماقسات ەتتى. بۇل ەلىمىزدە پاۆلودار قالاسىنان كەيىن اشىلىپ تۇرعان ەكىنشى زاۋىت. جوبانىڭ جالپى قۇنى – 675 ملن تەڭگە. زاۋىتتاعى قۇرال-جابدىقتار وڭتۇستىك كورەيادان الىندى جانە ونى مەڭگەرۋ ءۇشىن زاۋىتتىڭ ينجەنەرلىك توبى وڭتۇستىك كورەياعا بارىپ تاجىريبەدەن ءوتتى. مۇندا ەڭبەك ەتەتىن 250 قىزمەتكەردىڭ ءبارى جەرگىلىكتى تۇرعىندار. زاۋىتتى پايدالانۋعا بەرگەن كەزدە ءبىزدىڭ الدىمىزدا جوعارى ساپالى ونىمدەرىمىزگە دەگەن سۇرانىستىڭ قانشالىقتى بولاتىنى جانە كىمدەردەن ءبىزدىڭ ونىمگە تاپسىرىس بولاتىنى تۋرالى ماسەلەلەر تولعاندىرعانى اقيقات. ويتكەنى ءبىزدىڭ وتاندىق ساپالى ونىمدەرىمىز شىققانعا دەيىن مەديسينالىق مەكەمەلەردىڭ بارلىعى تۇركيا مەن قىتايدىڭ ساپاسى ناشار ءبىر رەتتىك شپريستەرىمەن قامتىلدى. بىزگە ولارمەن باسەكەلەس بولۋعا تۋرا كەلدى. دەگەنمەن، ەلباسىنىڭ وتاندىق ونىمدەردى قولداۋعا ارنالعان باعدارلامالارىن جۇزەگە اسىرۋ اياسىندا مەديسينادا وتاندىق ءونىمدى 50 پايىزعا جەتكىزۋ تۋرالى تاپسىرماسى ءبىزدىڭ ونىمدەردىڭ كەڭ قولدانىستا بولۋىنا جول اشتى، – دەگەن زاۋىت ديرەكتورى اسلان قابدۋللين قازىرگى كۇنى «سك فارماسيا» جشس-مەن 7 جىلعا كەلىسىمشارتقا وتىرعانىن ايتتى.
بۇگىنگى تاڭدا، «سك-فارماسيا» جشس-مەن قولجەتكىزىلگەن كەلىسىم ناتيجەسىندە وتاندىق زاۋىت ءوز ونىمدەرىن ءبىرىڭعاي ديستريبيۋتور جۇيەسى ارقىلى ەلىمىزدىڭ بارلىق ەمدەۋ-ساۋىقتىرۋ مەكەمەلەرىنە ساتا الادى.
مەديسينالىق قولعاپ پەن سيستەما وزىمىزدە دە بار
باتىس وڭىرلەرىندەگى تۇڭعىش ءبىر رەتتىك شپريستەر شىعاراتىن «BRANDO» زاۋىتى 2012 جىلى ءونىم شىعارۋدا تاعى ەكى جوبانى ىسكە قوستى. ءوندىرىس كولەمىن ۇلعايتۋ ماقساتىندا زاۋىتقا 16 سىعىمداعىش-ماشينا مەن ءۇش ستەريليزاتور ساتىپ الىندى. سونىڭ ناتيجەسىندە مەديسينالىق قولعاپتار مەن ينفۋزيالىق ەرىتىندىلەر قۇيۋعا ارنالعان سيستەمالار شىعارۋعا مۇمكىندىك تۋدى. جىلىنا 60 000 000 دانا مەديسينالىق قولعاپ پەن 20 000 000 دانا ينفۋزيالىق ەرىتىندىلەر قۇيۋعا ارنالعان سيستەمالار شىعاراتىن زاۋىت ءونىمى ءۇشىن شيكىزات وڭتۇستىك كورەيا، بەلگيا، رەسەي، رۋمىنيا، تۇركيا ەلدەرىنەن تاسىمالدانادى. زاۋىتتا شيكىزاتتى وڭدەۋدەن باستاپ، زالالسىزداندىرىپ، دايىن بۇيىم شىعارۋعا دەيىنگى ۇدەرىس تۇگەلدەي اۆتوماتتاندىرىلعان. قورشاعان ورتاعا زياندى بولماۋ ءۇشىن قالدىقتىڭ ءوزى زاۋىت ىشىندە قايتا وڭدەۋدەن وتكىزىلەدى.
«BRANDO» زاۋىتى باسشىلىعى شپريس كولەمىنە بايلانىستى جىل ساناپ تۇتىنۋشىلار سانىنىڭ دا، سۇرانىستىڭ دا ارتا تۇسكەنىن ايتادى. بۇل الدىمەن حالىقتىڭ دەنساۋلىقتارىنا ءمان بەرىپ، ەكپەنى ۋاقىتىلى الۋى، سول سياقتى ەمدەۋ مەكەمەلەرىنىڭ كوبەيۋى سىندى فاكتورلاردىڭ ىقپالى مەن جەرگىلىكتى تۇرعىنداردىڭ وتاندىق ءونىمدى تۇتىنۋعا دەگەن سۇرانىسىنان ورىن الىپ وتىر دەپ سەنىممەن ايتۋعا بولادى. وعان سەبەپ تە جوق ەمەس. ءبىر رەتتىك شپريستەردى شىعاراتىن «BRANDO» زاۋىتى ەلىمىز بويىنشا ساپالى وتاندىق ءونىم وندىرۋشىلەر اراسىنان ۇزدىك دەپ تانىلىپ، 2011 جىلى «التىن ساپا» كونكۋرسىندا جۇلدەلى ءبىرىنشى ورىنعا يە بولدى. ءۇش جىلدىق مەرزىمدە وتاندىق فارماسيادا جەتكەن جەتىستىكتەرىمەن زاۋىت ەلىمىزدىڭ جاڭا يندۋستريالاندىرۋ كارتاسى اياسىندا ءوندىرىسىن ۇلعايتۋدى جالعاستىرا بەرەتىن بولادى.
ءبىر قولدانىستان سوڭ پايداسىز بولاتىن شپريس شىعارىلادى
فارماسيادا وزىندىك ورنى ايقىندالعان، بۇگىندە ونىمدەرى سۇرانىسقا يە «BRANDO» زاۋىتى كەلەر جىلدىڭ العاشقى توقسانىندا جاڭا ءونىم ءتۇرىن پايدالانۋعا بەرۋدى جوسپارلاپ وتىر. بۇگىنگى تاڭدا وسى جوبا پىسىقتالۋدا.
ايتارلىعى، بۇل ءونىم ءتۇرى قازىرگى كۇنى عالامدىق مەديسينادا قولدانىلاتىن وزىنەن-وزى بۇزىلاتىن (بلوكتالاتىن) شپريستەر. قازىرگى كۇنى كەڭىنەن قولدانىستا جۇرگەن ءبىرجولعى شپريستەردىڭ ءوزىن كەي جاعدايلاردا ناشاقورلار سەكىلدى الەۋمەتتىك قولايسىز توپتاردىڭ ەكىنشى قايتارا قولدانىپ جۇرگەن دەرەكتەرى بەلگىلى بولىپ وتىر. جاڭا شپريس ءتۇرى وندايدى مۇلدەم جوققا شىعارىپ، قولدانىلىپ بولعاسىن دەرەۋ ىستەن شىعىپ قالادى.
بولاشاقتا اتىراۋ مۇناي وڭدەۋ زاۋىتىنىڭ جانىنان قالدىقتاردى وڭدەيتىن حيميالىق كەشەن پايدالانۋعا بەرىلگەندە شپريس شىعارۋعا قاجەتتى پوليپروپيلەن شيكىزاتى جەرگىلىكتى وزىمىزدەن وندىرىلەتىن بولادى. شيكىزاتتىڭ وتاندىق بولۋى، ءبىر رەتتىك پايدالانۋدان سوڭ وزىنەن-وزى بۇزىلاتىن شپريستەردىڭ ىشكى نارىقتىق قۇنىنا وڭ اسەرىن تيگىزەتىن بولادى.
بۇل ءونىمدى دە ءوندىرۋ ءۇشىن قۇرال-جابدىقتار وڭتۇستىك كورەيادان اكەلىنەدى.
نار تاۋەكەل ۇستانىم ناتيجەلى بولارىنا سەنىمدى
ەلدە تۋىنداعان كۇردەلى ەكونوميكالىق جاعداي اسەرىنەن، بارلىق وتاندىق ءوندىرىستەر قارجىلىق قيىندىقتارعا تاپ بولىپ وتىر. ديەۆالۆاسيا – «بەلدى بەكەم بۋۋعا» ماجبۇرلەۋدە. وتاندىق وندىرۋشىلەر مەملەكەتتىك جۇيە تاراپىنان كورسەتىلەتىن قولداۋعا بۇرىنعىدان بەتەر ءزارۋ بولىپ وتىر دەسەك، ارتىق ايتقانىمىز ەمەس. بۇل جاعداي وتاندىق وندىرىستەگى فارماسيا سالاسىنداعى جەتەكشى ونەركاسىپ «BRANDO» زاۋىتىنا وزىندىك اسەرىن تيگىزبەي وتپەك ەمەس.
«BRANDO» جشس-نىڭ مەديسينالىق ماقساتتاعى بۇيىمدار شىعاراتىن زاۋىتىنا قاجەتتى شيكىزات يمپورتتالاتىن بولعاندىقتان، تۋىنداپ وتىرعان ەكونوميكالىق جاعدايعا بايلانىستى شيكىزاتقا كەتەتىن قارجى شىعىنى ەسەلەنە ءتۇستى. وسىنىڭ اسەرىنەن، قوسىمشا قارجىلىق شىعىندار، نە جۇمىس ورىندارىن قىسقارتۋعا، نە جالاقىنى ازايتۋعا يتەرمەلەۋدە. الايدا زاۋىت باسشىلىعى اتالعان شارالارعا بارماۋ ءۇشىن بارىن سالۋدا. ونىمەن قوسا، زاۋىت جۇمىسى ءبىرىڭعاي ديستريبيۋتور جۇيەسىمەن تىكەلەي بايلانىستى بولعاندىقتان، «سك-فارماسيا» جشس-نىڭ قولداۋى، البەتتە قاجەت-اق.
– قارجى-قاراجات اينالاسىنداعى وسىناۋ قۇبىلىستىڭ كاسىپكەرلەر كوڭىلىن كۇپتى قىلعانى دا جاسىرىن ەمەس. اسىرەسە، وزدەرىنىڭ كاسىبىنە قاجەتتى شيكىزاتتى وزگە ەلدەردەن، باسقا مەملەكەتتەردەن تاسىمالدايتىن ءبىز سەكىلدى كاسىپكەرلەرگە شىنىمەنەن ويلانۋعا تۋرا كەلدى. قيىندىعى سول، ءونىمنىڭ وزىندىك قۇنى قىمباتقا تۇسۋدە. ءقازىر بىزدە 250 ادام جۇمىس جاسايدى. «ءونىمدى ءوندىرۋ مەن وتكىزۋدە ۇلكەن قيىندىقتار كەزدەسسە، نە ىستەيمىز؟» دەگەن وي دا قىلاڭ بەرمەي قويمايدى. ويتكەنى بۇل – نارىق. ال نارىقتىڭ زاڭى قاتال. ايتكەنمەن جۇمىسشىلار مەن قىزمەتكەرلەردىڭ ءبارى بالا-شاعا اسىراپ وتىرعان وتباسىلى جاندار بولعاندىقتان ءبىز قولىمىزدان كەلگەنشە جۇمىس ورىندارىن ساقتاۋعا تىرىسامىز. ەرتەڭىمىزدەن ۇلكەن ءۇمىت كۇتەمىز. ۇكىمەتىمىز كاسىپكەرلەردى قولدايتىن شارالاردى قولعا الادى دەپ سەنەمىز. ءسوز جوق، بۇل ماسەلە ءوزىمىزدىڭ جەرگىلىكتى جەردە دە شەشىمىن تابۋدا. وبلىسىمىزدىڭ ءبىرىنشى باسشىسى باقتىقوجا ىزمۇحامبەتوۆ وسى ماسەلەگە وراي وتكىزگەن كەزدەسۋىندە مۇنداي قيىندىقتىڭ كەز كەلگەن ەلدىڭ باسىندا بولاتىنىن، ءسال شىداساق، تۇرمىسىمىزدىڭ قالىپقا كەلەتىنىن، ساۋدا ورىندارىنىڭ باعانى ەرىكسىز وسىرمەۋى تۇراقتى باقىلاۋدا بولاتىنىن ايتقان ەدى، – دەگەن زاۋىت ديرەكتورى اسلان مالىك ۇلى، وسىنىڭ ءبارى ەل ءۇشىن، حالىق ءۇشىن، سولاردىڭ باقىتتى دا باياندى تۇرمىسى ءۇشىن جاسالىپ جاتقان جاعدايلار ەكەنىن ەستەن شىعارماۋىمىز كەرەك دەگەن پىكىرىن ايتىپ جەتكىزدى.
سايىپ كەلگەندە، ەلىمىزدىڭ يندۋستريالاندىرۋ كارتاسىنا ەنگىزىلگەن فارماسيا سالاسىنداعى اتىراۋداعى تۇڭعىش «BRANDO» زاۋىتى تالاپقا ساي قىزمەت ەتىپ، شىن مانىندە، جۇزەگە اسقان ومىرشەڭ جوبالاردىڭ بىرەگەيى بولىپ تمد ەلدەرىنە تانىلىپ وتىر. كوپتىڭ سۇرانىسىنا يە ونىمدەردى شىعارىپ وتىرعان زاۋىت بولاشاقتا سىرتقى نارىقتا دا ءوزىن تانىتارىنا سەنىمىمىز مول. سول ءورىستى شاقتا «BRANDO»-نىڭ «قازاقستاندا جاسالعان» ماركاسى ارقىلى ەلىمىزدىڭ الەمدىك فارماسيا سالاسى بويىنشا دا وزىق جوبانى جۇزەگە اسىرعانىن كورەتىن كۇن الىستا بولماسا كەرەك. بۇل جەتىستىككە «BRANDO» زاۋىتىنىڭ ۇجىمى ساپالى ءونىم مەن ۇيىمشىلدىقتىڭ ناتيجەسىندە قول جەتكىزۋگە تالپىنىس جاساۋدا. قورىتا كەلگەندە، ءبىرىڭعاي ديستريبيۋتور جۇيەسىن ەنگىزىپ وتىرعان ەلىمىزدىڭ دەنساۋلىق ساقتاۋ جانە الەۋمەتتىك دامۋ مينيسترلىگى مەن وتاندىق ءونىم وندىرۋشىلەردىڭ اراسىنداعى ورتاق مۇددە تۇرعىسىنداعى ارىپتەستىك بايلانىس، حالىقتىڭ دەنساۋلىعى مەن ونىڭ بولاشاعى ءۇشىن قاندايدا قيىندىقتاردى جەڭىپ، قوعامنىڭ باستى قۇندىلىعى حالىق ءۇشىن ءىس اتقارا بەرەرى ءسوزسىز.
دەرەككوز: "ايقىن-اقپارات"
