قازاقستان پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگتەگى اڭگىمە ەلىمىزدەگى بالالار قۇقىعى ماسەلەسىنە ارنالدى.
وتكەن قىركۇيەكتە جەنيەۆا قالاسىندا بۇۇ-نىڭ بالا قۇقىقتارىن قورعاۋ جونىندەگى كوميتەتىنىڭ كەزەكتى باسقوسۋى ءوتىپ، وندا ەلىمىزدەگى وسى ماسەلەگە قاتىستى بايانداما تىڭدالعان.
بريفينگتە وسى باياندامانىڭ نەگىزگى تاقىرىبىنىڭ ءبىرى جەتكىنشەكتەرگە ءبىلىم بەرۋ ىسىنە ارنالعانىن ايتىپ وتكەن ءبىلىم جانە عىلىم ۆيسە-مينيسترى ەسەنعازى يمانعالييەۆ: «قازاقستاننىڭ ساياساتىنا سايكەس، ەلىمىزدە بارلىق بالا تەگىن ءبىلىممەن قامتاماسىز ەتىلۋى ءتيىس. قازىرگى تاڭدا ەلىمىزدە بالالاردىڭ 99،8 پايىزى تەگىن بىلىممەن قامتىلعان. بۇدان بولەك، حالىقتىڭ از قامتىلعان جىگى مەن ءالءسىز توبىنداعى – از قامتىلعان وتباسىلارداعى بالالار، ءمۇمكىندىگى شەكتەۋلى بالالار قۇقىعىنىڭ قورعالۋىنا ۇلكەن كوڭىل بولىنۋدە. ەلباسىنىڭ تاپسىرماسىمەن 2020 جىلعا قاراي ونداي بالالاردىڭ 70 پايىزىنىڭ بارلىق وقۋ ورىندارىنا قولجەتىمدىلىگى بولۋى ءتيىس»، – دەپ ءارى قاراي سپيكەر بۇۇ ساراپشىلارىنىڭ بالالار قۇقىقتارىن قورعاۋ جۇيەسىن قۇرۋداعى ءبىزدىڭ ەلىمىزدىڭ جەتىستىكتەرىن جوعارى باعالاپ وتىرعانىنا توقتالدى.
ءبىلىم جانە عىلىم مينيسترلىگىنىڭ بالالار قۇقىعىن قورعاۋ كوميتەتى ءتوراعاسىنىڭ ورىنباسارى اياش ماكەنوۆا ءوز ءسوزىندە كوميتەت جانىنان قوعامدىق ۇيىمداردىڭ قاتىسۋىمەن رەسپۋبليكالىق كەڭەستەر قۇرىلعانىن، ولاردىڭ جۇمىسىنا ازاماتتىق سەكتور مەن قالىڭ جۇرتشىلىقتى تارتۋعا مۇمكىندىك تۋعانىن، جالپى، بالالار قۇقىعىن قورعاۋ ماسەلەسىنەن ەشكىمنىڭ دە تىس قالۋى ورىنسىز ەكەنىن ايتتى. سونداي-اق، ول 2013 جىلى وڭىرلىك دەپارتامەنتتەر بىرىكتىرىلگەنىن، دەگەنمەن، ءاربىر ايماقتا ءبىلىم بەرۋ باسقارماسى جانىنان قۇرىلعان ارنايى بولىمشەلەر بالالاردىڭ قۇقىعىن قورعاۋ بويىنشا جۇمىس ىستەيتىنىن جەتكىزدى. ءوز ەلىنىڭ بولاشاعى سانالاتىن بالالار قۇقىعىنا قاتىستى ماسەلەدە ۇساق-تۇيەكءتىڭ بولمايتىنىن كەسىپ ايتقان اياش ءمۇرسالىم قىزى بۇۇ كوميتەتىنىڭ ۇسىنىسىندا بالالاردىڭ قۇقىعىن قورعاۋ بويىنشا قوعامدى كەڭىنەن اقپاراتتاندىرۋ قاجەتتىگى اتاپ كورسەتىلگەن، ال ونىڭ ءبىزءدىڭ ەلىمىزدىڭ مۇددەسىمەن ءسايكەستىگىن ەسكە سالامىن، سوندىقتان، سىزدەر، جۋرناليستەر، ارنايى سەنىم تەلەفونى بارلىعىن وقىرماندارعا جەتكىزۋلەرىڭىزدى سۇرايمىن دەپ، 74-25-28 نومىرىنە حابارلاسۋعا بولاتىنىن جاريا ەتتى. ا.ماكەنوۆا بالا قۇقىعىنا قاتىستى ماتەريالداردىڭ كوميتەت سايتىندا ارنايى قازاق، ورىس، اعىلشىن تىلدەرىندە جاريالانعانىن دا ايتىپ ءوتتى.
مۇنان سوڭ بريفينگكە قاتىسۋشىلار جۋرناليستەر تاراپىنان قويىلعان ساۋالدارعا جاۋاپ بەردى. وندا بالالار ۇيىندەگى بۇلدىرشىندەردى اسىراپ الۋ، بالالاردىڭ شەتەل اسۋى جانە الەۋمەتتىك جەلىلەردە بالالارىنا قاتىستى كومەك سۇراعان جانايقاي جايىندا اڭگىمە بولدى. سۇراق-جاۋاپ بارىسىندا ءمالىم بولعانداي، قازىرگى ۋاقىتتا ەلىمىز بويىنشا ۇكىمەتتىڭ قاراۋىنا بەرىلىپ كەلگەن بالالاردىڭ سانى ازايىپ وتىر جانە بالا اسىراۋدا، ەڭ الدىمەن، باسىمدىق ءوز ازاماتتارىمىزعا بەرىلىپ، ال شەتەلدىكتەر ءوز ىشىمىزدەن اسىراپ الۋشى تابىلماعان كۇندە عانا بالا الا الاتىنى جەتكىزىلدى. شەتەلدەگى بالالاردىڭ دەنساۋلىعى، الەۋمەتتىك جاعدايى ۇكىمەت قاداعالاۋىنا الىنىپ، وعان مونيتورينگ ۇدايى جۇرگىزىلىپ وتىرۋى ايتىلىپ، الەۋمەتتىك جەلىلەردە اۋرۋ بالالالارىنا كومەك سۇراۋشىلارعا دا مونيتورينگ ءجۇرگىزىلىپ، قاجەتتى كومەك كورسەتىلەتىنى ءسوز بولدى.
دەرەككوز: ەگەمەن قازاقستان
