مەملەكەت باسشىسى عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا عىلىمعا نەگىز قويعان جاستارعا قولداۋ جوعارى بولاتىنىن ايتتى.

"تۇپتەپ كەلگەندە، قازاقستاندى وركەندەگەن ەلگە اينالدىرۋ – بارىمىزگە ورتاق مىندەت. جاڭا عانا ءسوز سويلەگەن عالىمدار ءبىرقاتار سالماقتى وي ايتتى. باستامالاردى مۇقيات سارالايمىز. ۇتىمدى ۇسىنىستار مىندەتتى تۇردە جۇمىس بارىسىندا ەسكەرىلەدى.

ءقازىر عىلىمعا ارقا سۇيەگەن مەملەكەتتەر الەمنىڭ دامۋ كوشىن باستاپ تۇر. ءبىز سول ەلدەردىڭ قاتارىنا قوسىلۋ ءۇشىن عىلىمعا ايرىقشا ءمان بەرۋىمىز كەرەك، ياعني عىلىمدى قارقىندى دامۋدىڭ توتە جولى رەتىندە قاراستىرۋىمىز كەرەك.

احمەت بايتۇرسىن ۇلى "وزعاندارعا جەتۋ كەرەك، جەتكەندەردەن وزۋ كەرەك" دەگەن ەكەن. بۇدان ءبىر عاسىر بۇرىن ايتىلعان ءسوز ءقازىر، اسىرەسە، وزەكتى"، - دەدى پرەزيدەنت.

سوڭعى جىلدارى عىلىم سالاسىن دامىتۋ ءۇشىن ءبىرشاما جۇمىس اتقارىلدى. ۇلتتىق عىلىم اكادەمياسىنا مەملەكەتتىك مارتەبە بەرىلدى. پرەزيدەنت جانىنان عىلىم جانە تەحنولوگيالار جونىندەگى ۇلتتىق كەڭەس قۇرىلدى.

"بىلتىر عىلىمعا ءۇش جىلدىڭ ىشىندە 625 ميلليارد تەڭگە قارجى ءبولۋ تۋرالى شەشىم قابىلداندى. مەملەكەت الداعى ۋاقىتتا دا بۇل قاراجاتتىڭ كولەمىن كوبەيتە بەرەدى.

ءقازىر عالىمداردىڭ جالاقىسى ەكى ەسە كوبەيدى. وزىق عىلىمي-زەرتتەۋ ينفراقۇرىلىمىن قالىپتاستىرۋعا قوماقتى قارجى ءبولىنىپ جاتىر. دوكتورانتۋرادا وقۋعا ارنالعان ءبىلىم گرانتتارىنىڭ سانى ارتتى. عالىمدارعا الەمنىڭ وزىق عىلىمي ورتالىقتارىندا تاجىريبەدەن ءوتۋ ءۇشىن زور مۇمكىندىك بەرىلىپ وتىر. جاس زەرتتەۋشىلەردى قولداۋ شارالارى كۇشەيتىلدى. سونىڭ ناتيجەسىندە عىلىممەن اينالىسىپ جۇرگەن جاستاردىڭ سانى كوبەيىپ كەلەدى.

ايماقتاردا شەتەلدىڭ جەتەكشى ۋنيۆەرسيتەتتەرىنىڭ فيليالدارى اشىلدى. ءبىراق بۇل شارالارمەن شەكتەلىپ قالۋعا بولمايدى. ەلىمىز تۇراقتى دامۋى ءۇشىن وزگەرىستەرگە تەز بەيىمدەلىپ، تىڭ مۇمكىندىكتەردى ۇتىمدى پايدالانۋ وتە ماڭىزدى. بۇل – ستراتەگيالىق مىندەت. وسى ورايدا مەملەكەت عالىمدارعا، ساراپشىلارعا، ەل ەكونوميكاسىنا جاڭاشىلدىق اكەلەتىن ماماندارعا زور ءۇمىت ارتادى. ولارعا ايرىقشا ميسسيا جۇكتەلەدى. سول ءۇشىن دە عىلىمي الەۋەتىمىزدى نىعايتا بەرەمىز"، - دەدى مەملەكەت باسشىسى.