قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ Almaty TV ۇجىمىن تەلەارنانىڭ 25 جىلدىق مەرەيتويىمەن قۇتتىقتادى، دەپ حابارلادى Almaty.tv.
مەملەكەت باسشىسى تىلەك حاتىندا تەلەارنانىڭ شيرەك عاسىر ىشىندە كوپتەگەن بىرەگەي جوبالاردى جۇزەگە اسىرىپ، يگى باستامالار الاڭىنا اينالعانىن اتاپ ءوتتى. Almaty TV ارناسىندا كورەرمەندەردىڭ كوڭىلىنەن شىققان اقپاراتتىق، ساراپتامالىق جانە مادەني-تانىمدىق باعدارلامالار از ەمەس.
سونداي-اق تەلەارنا ۇجىمىن سەنات ءتوراعاسى ماۋلەن اشىمبايەۆ، ءماجىلىس ءتوراعاسى ەرلان قوشانوۆ، پرەمەر-مينيستر ولجاس بەكتەنوۆ، الماتى قالاسىنىڭ اكىمى ەربولات دوسايەۆ، مادەنيەت جانە اقپارات ءمينيسترى ايدا بالايەۆا، تاعى باسقالار قۇتتىقتادى.
سالتاناتتى جيىن بارىسىندا ارنانىڭ بارلىق قىزمەتكەرلەرىنە العىس حاتتار مەن ۆەدومستۆولىق ماراپات تاپسىرىلدى.
1999 جىلى Almaty TV نەگىزى قالاندى. 2022 جىلدىڭ تامىزىنان باستاپ تەلەارنا مەملەكەتتىك مارتەبەگە يە بولدى. سول جىلى Almaty TV تەلەارناسىنا رەبرەندينگ جاسالدى.
سوڭعى ەكى جىلدا تەلەارنا رەيتينگى 70% پايىزعا ءوستى. «K Research Central Asia» مالىمەتتەرى بويىنشا سوڭعى جىلى بىرەگەي كورەرمەن سانى 4،2 ملن بولىپ، مەملەكەتتىك تىلدەگى وزىندىك ءوندىرىس مولشەرى 83% جەتتى.
پىكىر قالدىرۋ