ورىنبورداعى "ياسنايا" الاڭىنان ۇشىرىلاتىن زىمىران قالدىقتارى ماڭعىستاۋ وڭىرىنە قۇلايتىن بولدى. بۇل  تۋرالى «قامشى» پورتالى http://qamshy.kz/home/show/2256   «قازاقستان  120 ميلليون  تەڭگەگە رەسەيدەن ۋ ساتىپ الاتىن بولدى»  دەگەن اتپەن ماتەريال دا ۇسىنعان بولاتىن. ماڭعىستاۋدىڭ نە كۇناسى بار ەدى؟ تاۋەلسىزدىك جىلدارىنان بەرگى ەكونوميكامىزدىڭ نەگىزگى تۇتقاسى مۇنايعا بايلانىستى دامىعانىن كىم جوققا شىعارا الادى؟ ەندەشە، مۇناي قازاندىقتارىنىڭ قاسپاعى كورىنىپ، الەمدىك دەڭگەيدە قارا التىننىڭ قۇنى قاشا باستاعاندا مۇنايلى ولكەگە ۋ توگە بەرۋگە بولادى دەگەن ءسوز با؟

قالدىقتاردىڭ قاي اۋماققا قۇلايتىنى مەن جەر  كولەمى  دە ءالى ناقتىلانباعان. ءبىر انىعى، ماڭعىستاۋ ءوڭىرى زىمىران قالدىقتارى ءۇشىن قوماقتى قاراجاتقا يە بولادى-مىس. بۇل سومما جىلىنا شامامەن جارتى ميلليارد دوللاردى قۇراماق ەكەن.بۇل قالاي سوندا، ەكونوميكالىق داعدارىستان شىعۋدىڭ تاعى ءبىر ءتاسىلى مە؟ حالقىنىڭ دەنساۋلىعىن اقشاعا سارپ ەتە سالاتىن ەلدى قايدان كورىپ ەدىڭىزدەر؟  رەسەي پرەزيدەنتىنىڭ قازاقستانعا رەسمي ساپارى كەزىندە جاسالعان كەلىسىم جاقىن ارادا ارەكەتكە كوشەدى. نەگە ءبىزدىڭ ەلدىڭ تاراپىنان جاسالعان كەلىسىمنىڭ بارلىعى قازاقتىڭ كوزىنەن جاس شىعاراتىنداي ۇنەمى زاھارلى  بولادى؟ ق ر ينۆەستيسيا جانە دامۋ مينيسترلىگى اەروعارىش كوميتەتى ءتوراعاسىنىڭ ورىنباسارى مەيىربەك مولدابەكوۆ جۋرناليستەرگە بەرگەن مالىمدەمەسىندە: "ماڭعىستاۋ وبلىسى جەردى جالعا بەرگەنى ءۇشىن ءتيىستى قاراجاتىن الادى. مەنىڭ بىلۋىمشە شامامەن 500 مىڭ دوللار كولەمىندە.  سومما قوماقتى. ويتكەنى ماڭعىستاۋ وبلىسىنىڭ اكىمدىگى كەلىسىمدى قۋانا ماقۇلدادى. بۇل اقشا وبلىس بيۋدجەتىنە تۇسەدى. زىمىران قالدىقتارىنا بولىنەتىن ناقتى تەرريتوريانى ايتا الامايمىن. ءبىراق ۇلكەن ەمەس"، - دەگەن ەكەن.

ءبىز ادەتتە ءبىر بۇيرەگىن ساتامىن دەگەن ءبىر قازاقتى كورسەك، بارىمىزدى سالىپ تالقىلايمىز. يا، ميلليوندار ىشىندە ءبىر ادامنىڭ بۇيرەك ءساتۋى-سوز بە، ءتايىرى؟! ال، ماڭعىستاۋدىڭ جەرىنە ۋ سەبىلۋ تۋرالى شەشىم- قازاقتىڭ، ياعني ءبۇتىن ءبىر ۇلتتىڭ ءبىر مۇشەسىن ساتقانمەن بىردەي ەمەس پە؟  ەندى ءبىز باۋىرمالدىعىنان ايرىلىپ، تاسباۋىرعا اينالعان ۇلت قانا ەمەس، بۇيرەگى بۇلك ەتپەيتىن قازاققا اينالامىز. يا، اسپاننان الىپ زىمىراننىڭ قالدىعى قۇلاپ جاتسا دا قىڭق ەتپەيتىن نە دەگەن مىقتى قازاق ەدىك. تىم قۇرىعاندا كوزىڭنەن ءبىر تامشىنى ءمولت ەتكىزىپ قويساڭشى. الدە ول مىقتىلىعىمىزعا سىن با؟

اينۇر تولەۋ