2014 جىلدىڭ جەلتوقسان ايىندا تاراز قالاسىنىڭ وڭتۇستىك شىعىس بەتكەيىندە جامبىل وبلىسى جۇيكە اۋرۋلار ينتەرنات ءۇيىنىڭ جاڭا عيماراتى پايدالانۋعا بەرىلدى.
 ەڭ باستىسى، عيماراتتىڭ ىشىنە كىرمەي جاتىپ-اق، ەسىك الدىنداعى تازالىق پەن تالاپقا ساي ورناتىلعان پاندۋستاردى كورگەن كەزدە بۇل مەكەمەنىڭ قىزمەت الۋشىلارىنا بارلىق جاعداي جاسالىپ وتىرعانىن بىلەسىڭ. ينتەرنات ءۇيىنىڭ ديرەكتورى مۇرات بەردالييەۆتىڭ ايتۋىنشا بۇگىندە مۇندا تۇراتىن ازاماتتارعا الەۋمەتتىك قىزمەت كورسەتۋ سالاسى بويىنشا بارلىق جاعدايلار جاسالىپتى. قىزمەت الۋشىلاردىڭ جاعدايىن جاقسارتۋعا، ولاردى قوعامعا تارتۋعا، الەۋمەتتىك سالادا پسيحولوگ، الەۋمەتتىك قىزمەت كورسەتۋ ماماندارى، مۇعالىم-دەفەكتولوگ، ەڭبەك تەراپياسى نۇسقاۋشىلارى، دەنە شىنىقتىرۋ جانە مۋزىكا مۇعالىمدەرى، مادەني ۇيىمداستىرۋشى ماماندار ايانباي ەڭبەك ەتۋدە. جۇيكە اۋرۋلار ينتەرنات ءۇيىنىڭ ۇجىمى دا تاراز قالاسىنىڭ قوعامدىق ومىرىنە بەلسەنە قاتىسىپ كەلەدى. مەكەمە 2013 جىلى جۇيكە اۋرۋلار ينتەرنات ۇيلەرى اراسىنداعى بايقاۋدا ۇزدىك شىعىپ، «ەڭ ۇزدىك مەديسينالىق-الەۋمەتتىك مەكەمە» اتالىمىندا باس جۇلدەنى قانجىعالاسا، وتكەن جىلى الماتى قالاسىندا وتكەن تۋرنيردە شاعىن فۋتولدان مەكەمەلەر اراسىندا ءبىرىنشى ورىندى يەلەندى. مەكەمەدە قىزمەت الۋشىلاردىڭ قولىنان شىققان بۇيىمدار جاقىندا عانا قازاق حاندىعىنىڭ 550 جىلدىعىنا وراي ۇىمداستىرىلعان كورمەدە دە توپ جاردى.
– مەكەمەدە شتاتتىق كەستە بويىنشا 381 ادام قىزمەت ەتەدى. قىزمەت الۋشىلاردىڭ سانى 500 ادامدى قۇرايدى. ينتەرنات ۇيىندە ستاندارتتىق 8 باعىت بويىنشا قىزمەت كورسەتىلەدى. ولاردىڭ ىشىندە ءبىرىنشى باعىت – الەۋمەتتىك-تۇرمىستىق، ەكىنشى باعىت – الەۋمەتتىك-مەديسينالىق، ءۇشىنشى باعىت – الەۋمەتتىك-پسيحولوگيالىق، ءتورتىنشى باعىت  – الەۋمەتتىك-پەداگوگيكالىق، بەسىنشى باعىت – الەۋمەتتىك-ەڭبەك، التىنشى باعىت – الەۋمەتتىك-مادەني، جەتىنشى باعىت – الەۋمەتتىك-ەكونوميكالىق، سەگىزىنشى باعىت – الەۋمەتتىك-قۇقىقتىق. ءار باعىتتىڭ قىزمەت الۋشىنىڭ قوعامدىق ومىرگە قالىپتاسۋىنا تيگىزەر پايداسى بار. اتاپ ايتقاندا، ءبىرىنشى باعىت قىزمەت الۋشىلاردىڭ كۇندەلىكتى ومىردە تىرشىلىك ارەكەتىنە كومەكتەسەدى. ەكىنشى باعىت قىزمەت الۋشىلاردىڭ دەنساۋلىعىن جاقسارتۋ جانە قولداۋ ارەكەتىنە باعىتتالعان. ءۇشىنشى باعىت قىزمەت الۋشىلاردىڭ قورشاعان ورتاعا الەۋمەتتىك بەيىمدەپ، پسيحولوگيالىق جاعداي تۇزەۋگە كومەكتەسەدى. ءتورتىنشى باعىت قىزمەت الۋشىلاردىڭ تۇرمىستىق داعدىعا ۇيرەتۋگە جانە پەداگوگيكالىق كوررەكسيا مەن وقۋعا بەيىمدەيدى. بەسىنشى باعىت قىزمەت الۋشىنىڭ ەڭبەك قابىلەتىن قالىپتاستىرۋ جانە ەڭبەككە باۋلۋعا، ولارعا جاعداي جاساۋعا باعىتتالعان. التىنشى باعىت قىزمەت الۋشىعا الەۋمەتتىك-مادەني شارالاردى ۇيىمداستىرۋ جانە سونداي شارالارعا تارتۋعا نەگىز بولۋدا. جانە جەتىنشى باعىت قىزمەت الۋشىنىڭ تۇرمىس جاعدايىن جاقسارتۋعا باعىتتالسا، سەگىزىنشى باعىت قىزمەت الۋشىنىڭ قۇقىقتىق ستاتۋسىن دەمەۋگە نەمەسە وزگەرتۋگە بولماسا ولارعا زاڭگەرلىك كومەك كورسەتۋگە باعىتتالعان. ينتەرنات ءۇيىنىڭ قىزمەتكەرلەرى وسىندا تۇراتىن ناۋقاستاردىڭ سپورتپەن اينالىسۋعا دەگەن ىنتاسىن تۋعىزۋعا كومەكتەسىپ، مادەني-تانىمدىق قاجەت­تەلىك­تەرىن، قىزىعۋشىلىقتارىن، سۇراقتارى مەن قالاۋلارىن بىلدىرۋگە مۇمكىنشىلىك جاساۋدا. سونىمەن قاتار، العان بىلىمدەرىن الەۋمەتتىك ماڭىزدى ماقساتتارعا جۇمساۋعا ۇيرەتەدى. ولاردىڭ قىزىعۋشىلىعىن جانە قورشاعان ورتانى تانىپ-بىلۋگە، شىعارماشىلىق ىس-ارەكەتتەرگە قاتىسۋعا، جاڭا نارسەنى بىلۋگە دەگەن تالپىنىستارىن قاناعاتتاندىرۋ ءۇشىن مەكەمەدە ستاندارتقا ساي بىرنەشە ۇيىرمەلەر جۇمىس ىستەيدى. ولار – بي، ءان مەن مۋزىكالىق اسپاپتاردا ويناۋ ۇيىرمەلەرى مەن مانەرلەپ وقۋ توپتارى. ينتەرنات ءۇيىنىڭ تۇرعىندارى ونەردەگى جەتىستىكتەرىن نىعايتۋعا وبلىس، قالا كولەمىندەگى شارالارعا، فەستيۆالدارعا قاتىستىرىلۋدا. وسى جۇمىستاردىڭ ءناتي­جەسىندە، ينتەرناتىمىز سوڭعى ءۇش جىلدىڭ بەلەسىندە ينتەرنات ۇيلەرىنىڭ اراسىندا ەڭ ۇزدىك الەۋمەتتىك-مەديسينالىق مەكەمە اتاعىن جەڭىپ الدى. بىزدەگى تۇرعىندار شاحمات، دويبى جارىستارىندا ۇنەمى جۇلدە الىپ ءجۇر. جاز اي­لارىندا (21 شىلدە مەن 3 تامىز) لوس اندجەلەس قالاسىندا وتكەن ارنايى وليمپيادا ويىندارىندا ەل قۇراماسى ساپىندا قاتىسىپ قايتقان (ەل سپورتشىلارى 125 مەدال يەلەندى) ءبىزدىڭ قىزمەت الۋشىمىز تامارا ۆاسيليەۆا ۆولەيبولدان جاقسى ويىن ۇلگىسىن كورسەتىپ، الەمدىك دودادا جۇلدەلى 5ء-شى ورىننان كورىندى. بۇل ءبىز ءۇشىن ۇلكەن مارتەبە. سپورتتا، ونەردە بولسىن نەمەسە باسقا دا ەڭبەك تەراپياسى ءىس-شارالارىندا بولسىن مۇنداعى مۇگەدەك جاندار نۇسقاۋشىلاردىڭ كومەگىمەن قولونەرمەن، گۇل، تال، جەمىس اعاشتارىن ەگىپ-وسىرۋمەن اي­نالىسادى. مۇمكىندىگى شەكتەۋلى جانداردىڭ قولجەتىمدىلىگىن ارتتىرۋ ماقساتىندا بارلىق جاتىن بولمەلەر تالاپقا ساي جابدىقتالىپ، قولاربا جۇرەتىن جەرلەر مەن پاندۋستار ستاندارتقا سايكەستەندىرىلگەن. تاعى ءبىر ايتا كەتەرلىگى، بۇگىنگى كۇنى قىزمەت الۋشىلاردى ينتەرنات ۇيىندە جەڭىلدەتىلگەن تۇردە، ياعني سوتتىڭ شەشىمىنسىز ورنالاستىرا الامىز. بۇرىندارى سوتتىڭ شەشىمى مىندەتتى تۇردە سۇرالىپ كەلسە، ءقازىر ونىڭ اسا قاجەتتىلىگى جوق، – دەيدى ۇلتتىق مەديسينا قاۋىمداستىعىنىڭ جامبىل وبلىسى بويىنشا پرەزيدەنتى، «التىن دارىگەر» جانە «الەۋمەتتىك سالا قىزمەتكەرلەرىنىڭ ۇزدىگى» توسبەلگىلەرىنىڭ يەگەرى، بىلىكتى باسشى، تاجىريبەلى دارىگەر مۇرات ءازىمحان ۇلى.
راسىندا، ءۇش قاباتتى جاڭا عيماراتتا قىزمەت الۋشىلارعا بار جاعداي جاسالعان. ينتەرنات ءۇيىن ديرەكتوردىڭ الەۋمەتتىك سالا بويىنشا ورىنباسارى سالتانات جانتايەۆا مەن مەديسينا ءبولىمىنىڭ مەڭگەرۋشىسى انارحان دجۋنۋسالييەۆانىڭ جول باستاۋىمان ارالاپ شىققانىمىزدا وعان كوزىمىز جەتە ءتۇستى. «مەيىرىم»، «قارلىعاش»، «ءۇمىت»، «شاپاعات»، «ىزگىلىك»، اقنيەت، «جانشۋاق»، «وقشاۋلاۋ» دەپ اتالاتىن سەگىز بولىمدەگى تىندىرىمدى ىستەر مەنمۇندالاپ-اق تۇر. كوڭىلدى وسىنداعى جارىمجان جاندارعا جاسالىپ جاتقان جاقسىلىقتار تولقىتتى. «وقشاۋلاۋ» بولىمىندە ينتەرنات ۇيىنە جاڭادان تۇسكەن قىزمەت الۋشىعا ستاندارتقا ساي 14 كۇندىك باقىلاۋ جۇرگىزىلەدى ەكەن. «ءۇمىت» بولىمىندە قولارباعا تاڭىلعان 18 قىزمەت الۋشىعا جەكە پالاتالار قاراس­تىرىلىپ، ولار ءۇشىن سىرتقا شىعاتىن ەسىك جانە سىرتتا پاندۋس جاسالعان.
قالاي دەگەندە دە، جۇيكە اۋرۋلار ينتەرنات ۇيىندەگى تۇرعىندار باستارىنا تۇسكەن تاعدىر تالقىسىنا مويىماي، بارلىق مادەني شارالارعا اتسالىسىپ، وزگە دە ينتەرنات ۇيلەرىندەگى جاندارعا قايىرىمدىلىق كونسەرتتەرىن بەرىپ بەلسەندىلىك تانىتۋدا.