تارازدا ءوتىپ جاتقان قازاق حاندىعىنىڭ 550 جىلدىعىنا ارنالعان مەرەكەلىك شارالار جالعاسىن تاپتى.
 سونىڭ نەگىزگىلەرى رەتىندە «نۇر وتان» پارتياسىنىڭ تىكەلەي قولداۋىمەن ماڭگىلىك ەل اقىندار ايتىسى جانە حالىقارالىق «ەۋرازيا بارىسى» ءتۋرنيرى بولدى. وسى ورايدا ءبىز «نۇر وتان» پارتياسى ءتوراعاسى ءبىرىنشى ورىنباسارىنىڭ كەڭەسشىسى بەرىك ۋاليمەن سۇحباتتاسىپ، قازاق حاندىعىنىڭ 550 جىلدىعىنا ارنالعان ءىس-شارالاردىڭ ماڭىزدىلىعى تۋرالى سۇرادىق. 
– بەرىك قۇرمانعالي ۇلى، تاراز تورىندە ءوتىپ جاتقان حالىقارالىق اقىندار ايتى­سىنىڭ شىمىلدىعىن ءوزىڭىز اشىپ بەردىڭىز. مۇنداي شارانىڭ تاراز شاھارىندا ءوتۋىنىڭ دە ءبىر ءمانى بار شىعار؟
– ارينە، بۇل شارانىڭ تارازدا ءوتۋىنىڭ ءوزى تاريحي ءمان-ماعىناعا يە. سەبەبى شۋ مەن قوزىباسى ءوڭىرى ۇلى دالانى اق نايزانىڭ ۇشىمەن، اق بىلەكتىڭ كۇشىمەن قورعاپ، بىزدەرگە امانات ەتكەن بابالارى­مىزدىڭ العاش تۋ تىككەن جەرى ەكەنى بارشا­ڭىزعا ايان.  مەملەكەتتىگىمىزگە نەگىز بولعان وسىناۋ تاريحي وقيعاعا 550 جىل تولۋىن بيىلعى جىلى ەلباسىنىڭ باس بولۋىمەن بارشا ەل بولىپ، كەڭ كولەمدە اتاپ وتۋدەمىز. سونداي شارالاردىڭ ءبىرى – وسى اقىندار ايتىسى. بۇل اقىندار دوداسىنا ەلىمىزدىڭ تۇكپىر-تۇكپىرىنەن جانە كورشى جۇڭگو، موڭعوليا ەلدەرىنەن كەلگەن 26 جۇيرىك اقىن قاتىستى. 
– جاسىراتىنى جوق، ەلباسىنىڭ قامقور­لىعىنىڭ ارقاسىندا ايتىس ونەرى جاڭا بەلەسكە كوتەرىلدى. ايتىس بۇقارا مەن بيلىك اراسىنداعى التىن كوپىر بولدى دەسەك تە قاتەلەسپەيتىن شىعارمىز. 
– ارينە، ءتول ونەرىمىز مەملەكەتتىڭ قام­قورلىعىمەن دامۋ بيىگىنە كوتەرىلىپ، ەلگە رۋح بەرەتىن، ىنتىماعىن نىعايتاتىن، سون­داي-اق الەۋمەتتىڭ كوكەيكەستى ماسەلەلەرىن اشىق ايتىپ، ونىڭ شەشىلۋىنە ىقپال ەتە الاتىن تەتىككە اينالدى. تاۋەلسىز ەل بولعان 24 جىل بويى جەر-جەردە ۇيىمداستىرىلعان ۇلكەندى-كىشىلى ايتىس ەلدىگىمىزدى، بىرلىگىمىزدى جىرلادى. قازاقتىڭ ايتىس ونەرىنە، ۇلتتىق سپورتىنا، باسقا دا رۋحاني شارالارعا جۇيەلى قولداۋ كورسەتۋ – «نۇر وتاننىڭ» ەلى ءۇشىن اتقارار قىزمەتىنىڭ اجىراماس بولىگى. «نۇر وتان» ءۇشىن ايتىستى قولداۋ – ۇلتتىق ونەرگە قامقورلىقپەن قاتار، حالقىمىزدىڭ مۇڭ-مۇقتاجىنان تىكەلەي اقپارات الۋدىڭ، ەلگە جاقىن بولۋدىڭ جولى. 
– بۇل جولعى ايتىستىڭ تاقىرىبى، ماڭگىلىك ەل تاقىرىبىندا ءوربىدى. قالاي ويلايسىز، ايتىسكەرلەرىمىز وسى زور تاقىرىپتىڭ اياسىن اشا الدى ما؟ 
– ءيا، ايتىستىڭ تاقىرىبى سوناۋ تونىكوكتەن بەرى كەلە جاتقان، ەلباسى سارابدال ساياساتىنا وزەك ەتكەن – ماڭگىلىك ەل يدەياسى. سوندىقتان دا اقىندارىمىز ەلىمىزدى الەمگە تانىتقان جاسامپاز ىستەردىڭ باياندى بولۋىن جىرلارىنا ارقاۋ ەتتى. ءسوز مايتالماندارى ەكى كۇن بويى ونەرسۇيەر قاۋىمدى رۋحتى جىرىمەن سۋسىنداتىپ، ەلدىگىمىزدى، بابالارىمىزدىڭ تەڭدەسسىز ەرلىگىن، تاۋەلسىزدىكتى جىرلادى. «نۇر وتان» پارتيا­سىنىڭ قولداۋىمەن ۇيىمداس­تىرىلعان بۇگىنگى حالىقارالىق ايتىس – قازاق حاندىعىنىڭ 550 جىل­دىعىنا ارنالىپ، جەر-جەردە ءوت­كىزىلگەن اقىندار دوداسىنىڭ قورى­تىندىسى بولدى. 
– سونىمەن قاتار تارازدا «ەۋرازيا بارىسى» حالىقارالىق ءتۋرنيرى ءوتتى. بۇل شاراعا دا «نۇر وتان» قولداۋ ءبىلدىردى. جەتەكشى پارتيانىڭ قازاق كۇرەسىنىڭ جانا­شىرىنا اينالعانىن ەلدىكتى، ءپاتريوتيزمدى قالىپ­تاستىرۋعا ارنالعان قادام دەپ تۇسىنۋگە بولادى ەكەن.
– حالقىمىزدىڭ ونەرى مەن مادەنيە­ءتىن، رۋحانياتىن قولداۋدى ءوزىنىڭ ساياسي دوكتريناسىندا باسىمدىق رەتىندە بەلگىلەگەن «نۇر وتان» پارتياسى جاڭا قازاقستاندىق ءپاتريوتيزمدى قالىپتاستىرۋ باعىتىندا جۇيەلى جۇمىستاردى قولعا الۋدا. وسى ورايدا پارتيا بىرنەشە جىلدان بەرى قازاق كۇرەسىنەن ەلباسى جۇلدەسى ءۇشىن بولاتىن «قازاقستان بارىسى» جوباسىنا قولداۋ كورسەتىپ كەلەدى. بۇگىندە قازاق كۇرەسى قازاقستانداعى ەڭ تانىمال ءارى جۇرت جاپپاي اينالىساتىن سپورت تۇرىنە اينالدى. 2011 جىلدان باستاپ بيىلعى جىلعا دەيىن ونىمەن شۇعىلدانۋشىلار سانى ەكى ەسەگە ارتىپ، 120 مىڭ ادامعا جەتتى. جوبانىڭ تەليەۆيزيالىق اۋ­ديتورياسىنىڭ جيىنتىق كورسەتكىشى شامامەن 1،3 ميلليارد ادامدى قۇرادى. سونىمەن بىرگە تۋرنير الەمنىڭ 126-دان استام ەلىنە تىكەلەي ترانسلياسيا­لانادى. وسىناۋ جوبانىڭ ارقاسىندا ۇلتتىق كۇرەس ەلىمىزدە عانا ەمەس، سىرت ەلدەردە دە، اتاپ ايتقاندا، ليتۆا، پولشا، ەستونيا، رەسەي، گرەكيا، تۇركيا، يران، ۇلىبريتا­نيا سياقتى مەملەكەتتەردە دە قاناتىن جايا باستادى. قازىرگى كۇنى قازاق كۇرەسىن وليمپيادالىق سپورت تۇرلەرى تىزىمىنە قوسۋ جونىندە ءىس-قيمىلدار قولعا الىنىپ جاتقانى دا كوڭىلگە قۋانىش ۇيالاتادى. 
– راس، «قازاقستان بارىسى» جوباسى قازاق كۇرەسىنىڭ اتىن جاھانعا جايىپ، ەلىمىزدىڭ ۇلتتىق برەندىنە اينالدى. بولاشاقتا دا وسى باعىتىنان تايماۋىن تىلەيمىز! 
– بيىلعى جىلى ەلوردادا استانا كۇنى قارساڭىندا «قازاقستان بارىسىنىڭ» 5-مەرەيتويلىق ءتۋرنيرى ءوتتى. اتا زاڭىمىز بەن قازاقستان حالقى اسسام­بلەياسىنىڭ 20 جىلدىعى جانە قازاق حاندىعىنىڭ 550 جىلدىعى سياقتى ايتۋلى مەرەكەلەرگە ارنالعان ءدۇبىرلى دوداعا ەلباسىنىڭ ءوزى قاتىسۋى جوبانىڭ ماڭىزدىلىعىن ودان ءارى ارتتىرا ءتۇستى. 2013 جىلدان بەرى حالىق­ا­رالىق «ەۋرازيا بارىسى» ءتۋرنيرىن ءوت­كىزۋدىڭ ارقاسىندا «قازاقستان بارىسى» ەلىمىزدىڭ برەندىنە اينالدى دەسە دە بو­لا­دى. وسىناۋ شارالاردى قولعا الۋداعى باس­تى ماقسات – ۇلتقا ورتاق قۇن­دىلىق­تار­دى جۇزەگە اسىرا وتىرىپ، ەلباسى ۇسىنعان حالىقتىق 5 رەفورمادا ايتىل­عانداي، بولاشاعى ءبىرتۇتاس، جاسامپاز ۇلتتىڭ نەگىزىن قالىپتاستىرۋ، ماڭگىلىك ەلگە كوش تۇزەۋ. سول سەبەپتى وسى جوبانى ۇيىم­داس­تىرۋدىڭ باسى-قاسىندا جۇرگەن ازامات­تارعا ۇلكەن العىس ءبىل­دىرەمىن.

دەرەككوز: ايقىن-اقپارات